ພະຍາດ ຊີກາ ລະບາດຢ່າງໜັກໃນອິນເດຍ ຕິດເຊື້ອເກືອບ 100 ຄົນ
ສຳນັກຂ່າວ ຣອຍເຕີ ລາຍງານຈາກເມືອງ ລັດເນົາ ປະເທດອິນເດຍ ເມື່ອວັນທີ 8 ພະຈິກວ່າ: ພະຍາດ ຊີກາ (ZiKa) ເລີ່ມລະບາດຢ່າງໜັກ ໃນເມືອງຄັນປູຣ ລັດອຸດຕະປະເທດ ທາງພາກເໜືອຂອງອິນເດຍ ໂດຍເຈົ້າໜ້າທີ່ກວດພົບຜູ້ຕິດເຊື້ອແລ້ວ ຢ່າງໜ້ອຍ 89 ຄົນ ໃນນັ້ນ ລວມມີ ເດັກນ້ອຍ 17 ຄົນ. ພະຍາດ ຊີກາ ຊຶ່ງມີຍຸງເປັນພາຫະນະນຳເຊື້ອພົບຄັ້ງທຳອິດ ເມື່ອປີ 1947 ແລະ ເກີດການແພ່ລະບາດ ຄັ້ງໃຫຍ່ໃນປະເທດ ບຣາຊິນ ເມື່ອປີ 2015 ເຮັດໃຫ້ເດັກນ້ອຍເກີດໃໝ່ເກີດມາພິການຫົວນ້ອຍຜິດປົກກະຕິ ແລະ ສະໝອງພັດທະນາຊ້າ.
ທ່ານ ເນປາລ ຊິງ ຜູ້ອຳນວຍການສຳນັກງານ ສາທາລະນະສຸກ ເມືອງ ຄັນປູຣ ເປີດເຜີຍວ່າ: ຈຳນວນຜູ້ຕິດເຊື້ອພະຍາດ ຊີກາ ໃນເມືອງຄັນປູຣ ພວມເພີ່ມສູງຂຶ້ນ, ສ່ວນກະຊວງສາທາລະນະສຸກ ໄດ້ຈັດຕັ້ງ ທີມງານຫລາຍທີມ ເພື່ອຄວບຄຸມການແພ່ລະບາດ.
ທ່ານ ອາມິດ ໂມຮັນ ປຣາສາດ ຜູ້ອຳນວຍການສຳນັກງານ ສາທາລະນະສຸດ ລັດອຸດຕະປະເທດ ກ່າວວ່າ: ມີລາຍງານການຕິດເຊື້ອພະຍາດ ຊີກາ ໃນຫລາຍລັດຂອງອິນເດຍໃນໄລຍະຫລາຍປີຜ່ານມາ ແຕ່ນີ້ ເປັນການແພ່ລະບາດຄັ້ງທຳອິດໃນລັດອຸດຕະປະເທດ, ໂດຍເຈົ້າໜ້າທີ່ກວດພົບຜູ້ຕິດເຊື້ອໃນເມືອງອຸດສາຫະກຳ ຄັນປູຣ ຄົນທຳອິດ ແລະ ຈຳນວນຜູ້ຕິດເຊື້ອເພີ່ມສູງຂຶ້ນ.
