ອາເມລິກາເປີດປະເທດຮັບຊາວຕ່າງປະເທດ ທີ່ສັກວັກຊີນຄົບໂດສແລ້ວ ຫລັງຈຳກັດການເດີນທາງມາກວ່າ 20 ເດືອນ
ວັນທີ 8 ພະຈິກ 2021, ທາງການອາເມລິກາເປີດປະເທດຮັບນັກທ່ອງທ່ຽວທີ່ສັກວັກຊີນຄົບໂດສແລ້ວ ຫລັງຈຳກັດການເດີນທາງມາກວ່າ 20 ເດືອນ ໂດຍສະເພາະຜູ້ທີ່ເດີນທາງມາຈາກພື້ນທີ່ສ່ຽງຕິດເຊື້ອໂຄວິດ ເຊິ່ງປະກາດໃຊ້ມາແຕ່ສະໄໝອະດີດປະທານາທິບໍດີ ໂດນັລ ທຣຳ ເປັນເຫດໃຫ້ຜູ້ທີ່ບໍ່ໄດ້ເປັນພົນລະເມືອງອາເມລິກາຈາກຫລາຍປະເທດທົ່ວໂລກອາດບໍ່ໄດ້ພົບກັບຄອບຄົວ ຫລື ແຜນການເດີນທາງຕ້ອງຢຸດສະງັກລົງ.
ທາງການອາເມລິກາພະຍາຍາມຈະຄວບຄຸມສະຖານະການການແຜ່ລະບາດຂອງໂຄວິດພາຍໃນປະເທດ ໂດຍເລີ່ມຈາກການປິດຊາຍແດນ, ຫ້າມຜູ້ທີ່ເດີນທາງມາຈາກປະເທດຈີນ ເມື່ອຕົ້ນປີ 2020 ກ່ອນຈະຂະຫຍາຍໄປປະເທດອື່ນໆເຊັ່ນ: ອັງກິດ, ປະເທດສະມາຊິກໃນສະຫະພາບເອີຣົບ, ອິນເດຍ, ອາຟຣິກາໃຕ້ ລວມທັງບຣາຊິວ.
ພາຍໃຕ້ກົດຂໍ້ບັງຄັບໃໝ່ ຊາວຕ່າງປະເທດທີ່ຈະເດີນທາງເຂົ້າອາເມລິກາຈຳເປັນຕ້ອງສະແດງຫລັກຖານເພື່ອຢືນຢັນວ່າໄດ້ຮັບການສັກວັກຊີນແລ້ວກ່ອນອອກເດີນທາງ ອີກທັງຕ້ອງສະແດງຜົນການກວດໂຄວິດທີ່ຢືນຢັນວ່າບໍ່ພົບການຕິດເຊື້ອໂຄວິດພາຍໃນ 3 ວັນກ່ອນອອກເດີນທາງ ລວມທັງໃຫ້ຂໍ້ມູນທີ່ເປັນປະໂຫຍດຕໍ່ທາງການ ເພື່ອພິຈາລະນາຍົກເວັ້ນການກັກຕົວຫລັງຈາກເດີນທາງເຖິງອາເມລິກາແລ້ວ.
ໂດຍສະຫະພາບເອີຣົບອະນຸຍາດໃຫ້ຜູ້ທີ່ເດີນທາງມາຈາກອາເມລິກາເຂົ້າກຸ່ມປະເທດສະມາຊິກໄດ້ ນັບແຕ່ເດືອນມິຖຸນາຜ່ານມາ, ຂະນະທີ່ທາງການອັງກິດໄດ້ອະນຸຍາດໃຫ້ຜູ້ທີ່ເດີນທາງມາຈາກອາເມລິກາເຂົ້າປະເທດໄດ້ນັບແຕ່ວັນທີ 28 ກໍລະກົດຜ່ານມາ.
ອ້າງອີງ:
- https://www.straitstimes.com/world/united-states/us-finally-reopening-borders-after-20-months-to-vaccinated-travellers
- https://www.bbc.com/news/world-us-canada-59201107
- https://www.business-standard.com/article/news-ani/us-reopens-land-air-borders-to-foreign-visitors-fully-vaccinated-against-covid-19-from-today-121110800070_1.html
