ຮອງລັດຖະມົນຕີກະຊວງ ປກສ ຕອບຄໍາຖາມເຈາະຈີ້ມຕໍ່ຄວາມສົນໃຈ ຂອງ ສສຊ

ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງ ປ້ອງກັນຄວາມສະຫງົບ ໄດ້ຕອບຄໍາຖາມເຈາະຈີ້ມ ຂອງ ສະມາຊິກສະພາແຫ່ງຊາດ ໃນກອງປະຊຸມສະ ໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX  ໃນຮູບແບບທາງໄກ ໃນວັນທີ 8 ພະຈິກ 2021 ນີ້,  ກ່ຽວກັບສະພາບການຈັດຕັ້ງປະຕິບັດສິດ ແລະ ໜ້າທີ່ຂອງຫົວໜ້າອົງການສືບສວນ-ສອບສວນຕາມມາດຕາ 53 ຂອງກົດໝາຍ ວ່າດ້ວຍການດໍາເນີນຄະດີອາ ຍາສະບັບ ປີ 2017 ມີດ້ານດີ ແລະ ຂໍ້ຄົງຄ້າງໃນການຈັດຕັ້ງປະຕິບັດກົດໝາຍ ເປັນຕົ້ນກົນໄກການປະສານງານລະຫວ່າງອົງການສືບສວນ-ສອບສວນ ກັບ ອົງການໄອຍະການປະຊາຊົນ ຕາມມາດຕາ 53 ຂໍ້ 8 ກ່ຽວກັບການສະເໜີຂໍຄໍາສັ່ງຈັບຕົວ, ກັກຂັງພາງ, ກວດຄົ້ນເຄຫະສະຖານ, ປົດໜ້າທີ່ ຫລື ຕຳແໜ່ງ , ການຕໍ່ກໍານົດເວລາການສືບສວນ- ສອບສວນ ແລະ ຕໍ່ກໍານົດເວລາກັກຂັງພາງຈາກຫົວໜ້າ ໄອຍະການປະຊາຊົນ ເພື່ອດຳເນີນຄະດີໃຫ້ມີຄວາມຍຸຕິທຳ.

ຕໍ່ບັນຫາດັ່ງກ່າວເຊິ່ງສະແດງອອກດັ່ງນີ້:  ການຕໍ່ກຳນົດເວລາສືບສວນ- ສອບສວນ: ອົງການສືບສວນ-ສອບສວນ ຂອງເຈົ້າໜ້າທີ່ຕຳຫລວດ ແມ່ນໄດ້ປະຕິບັດຕາມ ມາດຕາ 92 ຂອງກົດໝາຍວ່າດ້ວຍການດຳເນີນຄະດີອາຍາໄດ້ເປັນຢ່າງດີ ເພາະມັນເປັນບ່ອນອີງທີ່ສໍາຄັນໃນການຈັດຕັ້ງປະຕິບັດບາດກ້າວ ການສືບສວນ-ສອບສວນຄະດີເພື່ອຮັບປະກັນໃນການມ້າງລາຍຄະດີ, ວິທີການສືບສວນ-ສອບສວນຕົວຈິງ ແລະ ການນຳໃຊ້ມາດຕະການສະກັດກັ້ນໃຫ້ຖືກຕ້ອງຕາມກົດໝາຍ, ກັບດ້ານວິຊາສະເພາະ ໃນໄລຍະທີ່ກົດໝາຍໄດ້ກຳນົດໄວ້, ການສະເໜີຂໍຄຳສັ່ງຈັບຕົວ, ອົງການສືບສວນ-ສອບສວນຂອງ ເຈົ້າໜ້າທີ່ຕຳຫລວດຖືເປັນບັນຫາທີ່ສໍາຄັນ ແລະ ລະອຽດອ່ອນເພາະມັນແຕະຕ້ອງກັບສິດເສລີພາບຂອງພົນລະ ເມືອງ.

ສະນັ້ນ, ການຈັດຕັ້ງປະຕິບັດຕົວຈິງໃນໄລຍະຜ່ານມາແມ່ນຖືກຕ້ອງຕາມມາດຕາ 139 ຂອງກົດໝາຍວ່າດ້ວຍການດຳເນີນຄະດີອາຍາ, ຖືກຕ້ອງຕາມຄວາມເປັນຈິງຂອງຄະດີ, ຮັບປະກັນບໍ່ໃຫ້ລ່ວງລະເມີດສິດ  ແລະ ເສລີພາບຂອງພົນລະເມືອງທີ່ໄດ້ການຂໍຄຳສັ່ງກວດຄົ້ນ ແລະ ໄດ້ຮັບການຮ່ວມມືເປັນຢ່າງດີ, ການປົດໜ້າທີ່ ຫລື ຕຳແໜ່ງ: ແມ່ນໄດ້ດຳເນີນຄະດີຕໍ່ຜູ້ຖືກຫາທີ່ເປັນພະນັກງານ, ມີໜ້າທີ່, ມີຄວາມຮັບຜິດຊອບ ແຕ່ໄດ້ກະທຳຜິດໂດຍສະເພາະແມ່ນການສໍ້ລາດບັງຫລວງ, ໃນໄລຍະຜ່ານມາເຈົ້າໜ້າທີ່ສືບສວນ-ສອບສວນ ບໍ່ໄດ້ດຳເນີນໂດຍກົງເພາະບໍ່ໄດ້ນອນຢູ່ໃນສິດ ແລະ ໜ້າທີ່ ແຕ່ໄດ້ຮ່ວມມືປະສານສົມທົບກັບກະຊວງ ຫລື ອົງການ ທີ່ຜູ້ກະທຳຜິດໄດ້ສັງກັດຢູ່.

ທ່ານ ຮອງລັດຖະມົນຕີ ເນັ້ນວ່າ: ໃນໄລຍະຜ່ານມາເຖິງຈະມີດ້ານດີ ແຕ່ກໍຍັງມີຂໍ້ຄົງຄ້າງ ໂດຍສະເພາະການຕໍ່ກໍານົດເວລາການສືບສວນ-ສອບສວນ ນຳອົງການໄອຍະການ ນໍາການດໍາເນີນຄະດີຕົວຈິງ ຍັງມີເຈົ້າໜ້າທີ່ສືບສວນ-ສອບສວນ ຈຳນວນໜຶ່ງບໍ່ທັນຈັດຕັ້ງປະຕິບັດໄດ້ດີ ແລະ ບັນຫາອື່ນໆ. ເຊິ່ງໃນຕໍ່ໜ້າ ກະຊວງປ້ອງກັນຄວາມສະຫງົບ ຈະໄດ້ເອົາໃຈໃສ່ຊີ້ນຳໆພາສຶກສາອົບຮົມການເມືອງແນວຄິດໃຫ້ແກ່ ອົງການສືບສວນ-ສອບສວນ ເຈົ້າໜ້າທີ່ຕໍາຫລວດ ແລະ ຄ້າຍຄຸມຂອງດັດສ້າງແຕ່ສູນກາງລົງຮອດທ້ອງຖິ່ນໃຫ້ຮັບຮູ້ເຂົ້າໃຈ ແລະ ມີ ຄວາມຮັບຜິດຊອບສູງໃນການຄຸ້ມຄອງລັດດ້ວຍກົດໝາຍ, ການດຳເນີນຄະດີອາຍາ ຕ້ອງຮັບປະກັນທາງດ້ານການເມືອງ, ກົດໝາຍ ແລະ ຫລັກວິຊາສະເພາະຢ່າງເຂັ້ມງວດ ເພື່ອນຳເອົາຄວາມຍຸຕິທໍາມາສູ່ສັງຄົມ.