ຮຽນອອນລາຍ ເຮັດແນວໃດ ບໍ່ໃຫ້ “ອ່ອນຫລາຍ”

ໂດຍ: ມຶກບໍ່ແຫ້ງ

ການຮຽນທາງໄກ ໃນໄລຍະການລະບາດຂອງພະຍາດໂຄວິດໄດ້ກາຍເປັນສິ່ງທ້າທາຍຂອງຂະແໜງການສຶກສາ ທີ່ຈະຮີບຮ້ອນໃນການປັບຕົວເຂົ້າກັບສະພາບການປົກກຕະໃໝ່ໃຫ້ໄດ້ໄວ ເພື່ອໃຫ້ລູກຫຼານ ໄດ້ຮັບການສຶກສາຮຽນຮູ້ທີ່ດີ.

ມາຮອດປັດຈຸບັນ ການຕິດເຊື້ອຂອງພະຍາດໂຄວິດ 19 ໃນ ສປປລາວ ເພີ່ມຂຶ້ນເປັນ 1000 ກວ່າຄົນໃນແຕ່ລະວັນ ເຊິ່ງບໍ່ອາດສາມາດເປັນໄປໄດ້ເລີຍວ່າ ຈະສາມາດເປີດ ການຮຽນ-ການສອນຄືນໃໝ່ໄດ້ໄວ ໂດຍສະເພາະ ໃນເຂດທີມີການລະບາດຢ່າງໜັກ ເຊັ່ນ ນະຄອນຫຼວງວຽງຈັນ ແລະຍິ່ງກວ່ານັ້ນຜູ້ຕິດເຊື້ອສ່ວນໃຫຍ່ ເປັນ ນັກຮຽນ, ຄູ-ອາຈານ ຍິ່ງເພີ່ມຄວາມທ້າທາຍຂຶ້ນຕື່ມ.

ນັບແຕ່ການປິດ ການຮຽນ-ການສອນ ທຸກຊັ້ນຮຽນ ທີ່ໄດ້ເລີ່ມມາແຕ່ ເດືອນເມສາ 2021​ແລະ ມາຮອດ ເດືອນພະຈິກ ໃນປັດຈຸບັນ ນັ້ນກໍໄດ້ກ້າວເຂົ້າສູ່ເດືອນທີ 8 ແລ້ວ ເພື່ອປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ 19 ເຊິ່ງ ນັກຮຽນ-ນັກສຶກສາກໍບໍ່ໄດ້ເຂົ້າໂຮງຮຽນປົກກະຕິ.

ທາງເລືອກໜຶ່ງທີ່ກະຊວງສຶກສາທິການ ແລະ ກິລາເຮັດໄດ້ກໍຄືການຮຽນອອນລາຍ ເຊິ່ງຫຼາຍປະເທດກໍໄດ້ເຮັດ ເພື່ອການປັບຕົວເຂົ້າກັບສະພາບການໃໝ່ ແຕ່ການຮຽນອອນລາຍກຳລັງພົບພໍ້ກັບສິ່ງທ້າທາຍຫລາຍປະການ.

“ສະພາບການຮຽນ-ການສອນ ຜ່ານອອນລາຍຄືດັ່ງ ໄດ້ປະຕິບັດໃນປັດຈຸບັນນີ້ ເຫັນວ່າຍັງບໍ່ທັນມີຄວາມເປັນ ເອກະພາບກັນ ໂດຍລວມເຫັນວ່າໄດ້ພຽງຮູບການ, ແຕ່ຄຸນນະພາບໃນການຮັບຮູ້ເຂົ້າໃຈຂອງນັກຮຽນ ແລະ ການເອົາໃຈໃສ່ຂອງຄູອາຈານແມ່ນບໍ່ສູງ, ບໍ່ມີປະສິດທິພາບ” ກ່າວໂດຍທ່ານ ທ່ານ ແດງ ປະທຸມທອງ ສສຊ ເຂດເລກຕັ້ງທີ 18 ແຂວງ ໄຊສົມບູນ ໃນວາລະ ກອງຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ກຳລັງເນີນໃນປັດຈຸບັນ.

ສິ່ງທ້າທາຍຕົ້ນຕໍ ແມ່ນລວມມີ ການຂາດເຂີນເຄື່ອງມືຮັບໃຊ້ ເຊັ່ນ ໂທລະສັບ, ຄອມພິວເຕີ ໂດຍສະເພາະໃນເຂດຊົນນະບົດ, ການຮຽນບໍ່ປົກກະຕິ, ພໍ່ແມ່ ບໍ່ມີເວລາ ໂດຍສະເພາະ ໃນກໍລະນີ ທີ່ພໍ່ແມ່ ເຮັດວຽກ ນຳຫ້ອງລ້າຫ້ອງການ ກໍຕ້ອງໄປປະຈຳການ ຕາມການຊີ້ນຳຂອງຫົວໜ້າ ແລ້ວປະປ່ອຍໃຫ້ລູກ ຢູ່ເຮືອນຮຽນຕາມລຳພັງ ເຊິ່ງແນ່ນອນ ຕອນບໍ່ໄດ້ຮຽນອອນລາຍນັ້ນ ໄວໜຸ່ມ, ເດັກນ້ອຍ ເຮົາກໍຕິດໂທລະສັບມືຖືຢູ່ແລ້ວ ຍິ່ງສະພາບ ອຳນວຍຄືແນວນີ້ ຖ້າບໍ່ມີຜູ້ຄຸມ ການຮຽນອອນລາຍ ຊິກາຍເປັນ ອ່ອນຫຼາຍ ເພາະວ່າຕິດໜ້າຈໍໝົດມື້ ແຕ່ບໍ່ຖືການຮຽນເປັນຫຼັກ.

ການຮຽນ-ການສອນ ໃນປະເທດເຮົາກ່ອນໂຄວິດລະບາດ ກໍມີຄວາມທ້າທາຍບໍ່ໜ້ອຍຢູ່ແລ້ວໃນຂະແໜງການສຶກສາ ບໍ່ວ່າຈະເປັນອັດຕາການອອກ ໂຮງຮຽນກາງປີ ຂອງນ້ອງນັກຮຽນເຂດຊົນນະບົດ, ການຄວບຄຸມ ຄຸນນະພາບການຮຽນ-ການສອນ ໃຫ້ທຽບທັນ ກັບພາກພື້ນ ແລະສາກົນ, ການປັບປຸງຫຼັກສູດການຮຽນ-ການສອນ ໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ ແລະ ອື່ນໆ ແຕ່ເມື່ອມາພົບກັບ ການລະບາດໜັກຂອງໂຄວິດ ຄືແນວນນີ້ ພວກເຮົາກໍຍິ່ງຫຍຸ້ງຍາກ ແລະຍັງຈະຕ້ອງໃຊ້ເວລາໃນການປັງປຸງ ເພື່ອປັບຕົວ ໃນການຮຽນ-ການສອນອອນລາຍ.

ເຮັດແນວໃດ ຈະແກ້ໄຂສິ່ງທ້າທາຍນີ້ໄດ້? ສິ່ງທີ່ສຳຄັນທີ່ສຸດກໍຄື ການຮີບຮ້ອນ ຄວບຄຸມການລະບາດ ໃນຊຸມຊົນ ຂອງພະຍາດໂຄວິດ ໃນປັດຈຸບັນ ໃຫ້ໄດ້ໂດຍໄວ ເພື່ອຈະສາມາດເປີດໂຮງຮຽນຄືນໃໝ່ໄດ້ ເຊິ່ງກໍເຂົ້າໃຈວ່າ ລັດຖະບານ ກໍໃຫ້ ບູລິມະສິດນີ້ອັນດັບໜຶ່ງຢູ່ແລ້ວ, ແຕ່ຖ້າຫາກວ່າ ພວກຍັງຈະຕ້ອງ ມີການຮຽນອອນລາຍ ຕໍ່ໄປ ກໍຕ້ອງເອົາໃຈໃສ່ ໃນການປັບປຸງຫລັກສູດການຮຽນ-ການສອນ ອອນລາຍສະເພາະ ເລີ່ມຈາກ ການສອນ ວິທີນຳໃຊ້ ອຸປະກອນຕ່າງໆ.

ພ້ອມນັ້ນ ການໃຫ້ເວລາຂອງພໍ່ແມ່ ຕໍ່ລູກຜູ້ຍັງນ້ອຍ ເພື່ອການຮຽນ ການສອນອອນລາຍກໍສຳຄັນ, ອັນນີ້ ແມ່ນຕິດພັນ ກັບນະໂຍບາຍ ການໄປການ ຂອງພໍ່ແມ່ ຜູ້ເຮັດວຽກນຳລັດ, ເອກະຊົນ ແລະ ອື່ນໆ ຄວນພິຈາລະນາ ຄືນວ່າ ຍັງຈະໃຫ້ ພໍ່ແມ່ ຜູ້ມີລູກນ້ອຍ ທີ່ຕ້ອງການຄວາມຊ່ວຍເຫລືອ ເພື່ອຮຽນອອນລາຍຢູ່ບໍ່?.

ພ້ອມນັ້ນ ການເລັ່ງ ສັກວັກຊີນ ໂດຍສະເພາະ ຜູ້ທີ່ມີອາຍຸ 12-17 ປີນັ້ນ ກໍອາດເປັນເງື່ອນໄຂອັນດີ ທີ່ຈະສາມາດ ເຮັດໃຫ້ ການເປີດການຮຽນ-ການສອນໂດຍໄວ.

ການຮຽນອອນລາຍ ເປັນສິ່ງທ້າທາຍ ທົ່ວທຸກປະເທດໃນໂລກນີ້ ແລະ ພວກເຮົາບໍ່ຄວນຖິ້ມໂທດໃສ່ແຕ່ ກະຊວງສຶກສາທິການ ແລະກິລາ ແຕ່ຫາວິທີຊ່ວຍກັນ ເພື່ອປັບຕົວເຂົ້າກັບສະພາບປົກກະຕິໃໝ່ນີ້ໃຫ້ໄດ້ ໂດຍສະເພາະ ການຍົກສູງ ປະສິດທິພາບ ແລະປະສິດຜົນ ຂອງການຮຽນ-ການສອນອອນລາຍ ເພື່ອຫລີກລ່ຽງບໍ່ໃຫ້ອອ່ນຫລາຍ.