ກອງກຳລັງອີຣັກຈັບນັກຮົບ IS ປອມເປັນຜູ້ຍິງໜີອອກຈາກເມືອງໂມຊຸນ
ເວັບໄຊເດລີ ເມລ ຂອງອັງກິດ ລາຍງານວ່າ: ວັນທີ 22 ກໍລະກົດ, ກອງກຳລັງອີຣັກໄດ້ຈັບກຸມນັກຮົບຂອງກຸ່ມກໍ່ການຮ້າຍ IS ຄົນໜຶ່ງທີ່ພະຍາຍາມປອມເປັນຜູ້ຍິງ ເພື່ອຫລົບໜີອອກຈາກເມືອງໂມຊຸນ ເມືອງໃຫຍ່ອັນດັບ 2 ຂອງປະເທດ ທີ່ທາງກອງກຳລັງອີຣັກໄດ້ພະຍາຍາມຍຶດຄືນຈາກກຸ່ມ IS ມາດົນກວ່າ 9 ເດືອນ ຈົນສາມາດປົດປ່ອຍເມືອງໃຫ້ຫລຸດພົ້ນຈາກການຍຶດຄອງຂອງກຸ່ມ IS ເຊິ່ງຍຶດເມືອງມາເຖິງ 3 ປີນັບແຕ່ເດືອນມິຖຸນາ 2014.
ໂດຍການແຕ່ງເຄື່ອງແບບຜູ້ຍິງ ທັງເສື້ອຜ້າ, ຊົງຜົມ, ແຕ່ງໜ້າແຕ່ງຕາ ລວມທັງຕິດໄຝອີກ 2 ຈຸດ ແຕ່ພັດລືມແຖໜວດ ລວມທັງຂົນຄິ້ວທີ່ດົກໜາກໍບໍ່ໄດ້ຕົບແຕ່ງໃຫ້ເຂົ້າຮູບເຂົ້າຊົງ ຈົນເຮັດໃຫ້ຖືກຈັບໄດ້ໃນທີ່ສຸດ.
ໂດຍກອງກຳລັງອີຣັກເປີດເຜີຍວ່າ: ນອກຈາກຊາຍຄົນນີ້ແລ້ວ ຍັງມີນັກຮົບກຸ່ມ IS ຄົນອື່ນອີກຈຳນວນບໍ່ໜ້ອຍທີ່ພະຍາຍາມແຕ່ງຕົວປອມເປັນຜູ້ຍິງ ເພື່ອຫລົບໜີອອກໄປຈາກເມືອງ ເຊິ່ງມີບາງຄົນເຖິງຂັ້ນຍັດຟອງນ້ຳເສີມໜ້າເອິກ ເພື່ອເຮັດໃຫ້ຕົນເອງເບິ່ງຄືຜູ້ຍິງຫລາຍທີ່ສຸດ ແຕ່ກໍຖືກຈັບໄດ້.
