15 ສິ່ງທີ່ຕ້ອງປ່ຽນ ກ່ອນຈະອາຍຸ 45 ປີ ຊີວິດບັ້ນປາຍຈະໄດ້ບໍ່ລຳບາກ

ຖ້າທ່ານຢາກມີອິດສະລະພາບທາງການເງິນເມື່ອອາຍຸບໍ່ເກີນ 45 ປີ ແລະ ມີຊັບສິນທີ່ສ້າງລາຍຮັບພຽງພໍໃຫ້ໃຊ້ໄປໄດ້ ຕະຫລອດຊີວິດ ທ່ານຄວນຮູ້ຫລັກການຕໍ່ໄປນີ້ :

1. ຈົ່ງເລືອກເຮັດວຽກທີ່ຕົນເອງມັກ ແລະ ຊ່ຽວຊານ ຫລື ຊຳນານ : ການຫາຈຸດຢືນທີ່ເໝາະສົມກັບຕົນເອງມັນຊ່ວຍເຮັດ ໃຫ້ເງິນເດືອນ ແລະ ຕຳແໜ່ງເຕີບໃຫຍ່ໄດ້ໄວ. ສິ່ງສຳຄັນຄວນເລືອກເຮັດວຽກກັບຫົວໜ້າສະຫລາດໆ ຈະຊ່ວຍສົ່ງເສີມ ໃຫ້ເຮົາກ້າວໜ້າໄດ້ໄວຂຶ້ນ.
2. ຈົ່ງທ້ອນເງິນໂບນັດໄວ້ໃຫ້ດີ : ມັນເປັນເງິນກ້ອນທີ່ເອົາໄປລົງທຶນໄດ້ ຈົ່ງໃຫ້ລາງວັນກັບຕົນເອງໃນແຕ່ລະປີບໍ່ເກີນ 30% ຂອງເງິນໂບນັດ ແລ້ວໃນສ່ວນທີ່ເຫລືອກໍທ້ອນໄປລົງທຶນ ເຮັດແບບນີ້ໄດ້ທ່ານຈະມີຄວາມສຸກກັບການທ້ອນເງິນຫລາຍ ກ່ວາການໃຊ້ເງິນ.
3. ຫລຸດຄ່າໃຊ້ຈ່າຍທີ່ເຮັດໄດ້ງ່າຍ ແລະ ເຫັນຜົນແທ້ : ເຊັ່ນ : ຫລຸດຈຳນວນດອກໄຟໃນເຮືອນລົງຫາກມີຫລາຍດອກ ເກີນໄປ, ຍາມອາກາດເຢັນ ກໍປິດແອ ແລ້ວເປີດພັດລົມແທນ, ປ່ຽນແພັກເກັດອິນເຕີເນັດລາຄາແພງມາໃຊ້ແບບລາຍ ເດືອນທີ່ລາຄາຖືກລົງ ເປັນຕົ້ນ.
4. ສຶກສາຫາຄວາມຮູ້ເລື່ອງການເງິນໃຫ້ສະໝໍ່າສະເໝີ : ຄວາມຮູ້ຫາໄດ້ຈາກໜັງສື ຫລື ເຂົ້າຝຶກອົບຮົມ, ຢູທູບ, ເວັບບອດ, ແຟນເພຈ ແລະ ຈາກໝູ່ເພື່ອນ ຊ່ອງທາງເຂົ້າເຖິງຄວາມຮູ້ມີຫລວງຫລາຍ ເຮັດໃຫ້ເຮົາມີຄວາມຮູ້ເລິກເຊິ່ງຫລາຍຂຶ້ນ ໃນປັດຈຸບັນນີ້.
5. ຮຽນຮູ້ການລົງທຶນໂດຍໃຊ້ເງິນຜູ້ອື່ນ : ເຊັ່ນ ການກູ້ຢືມເງິນຊື້ຄອນໂດ, ຫ້ອງເຊົ່າ, ອະພາດເມັ້ນ ເຮົາຈະໄດ້ກຳໄລຫລາຍ ຈາກເງິນລົງທຶນໜ້ອຍ ເຊິ່ງເມື່ອເວລາຜ່ານໄປອະສັງຫາລິມະຊັບເຫລົ່ານັ້ນຈະມີລາຄາແພງຂຶ້ນ ໂດຍທ່ານອາດຈະໃຊ້ ເງິນຕົນເອງສ່ວນໜຶ່ງ ແລະ ເງິນກູ້ມາອີກສ່ວນໜຶ່ງ ຈາກນັ້ນກໍເອົາຄ່າເຊົ່າຈ່າຍຜ່ອນທະນາຄານ.
6. ທ້ອນເງິນຕັ້ງແຕ່ອາຍຸຍັງນ້ອຍ : ຄວບຄຸມຄວາມຢາກຂອງຕົນເອງໃຫ້ໄດ້ ໂດຍທະຍອຍຊື້ສິ່ງຂອງໃຫຍ່ໆ ຢ່າຊື້ເທື່ອດຽວ ຫລາຍໆອັນ ເຊັ່ນ: ໂທລະສັບມືຖື, ແພັກເກັດທ່ອງທ່ຽວ ແລະ ລົດ ໃຫ້ເວັ້ນໄລຍະຫ່າງໆກັນ ເພາະຄວາມຢາກຂອງຄົນ ເຮົາບໍ່ມີທີ່ສິ້ນສຸດ ເຮົາຄວນຊື້ສິ່ງຂອງທີ່ມີໂອກາດໄດ້ໃຊ້ແທ້ ສິ່ງຂອງທີ່ບໍ່ຄິດຈະໃຊ້ກໍຢ່າໄປຊື້ມັນມາ.
7. ໃຊ້ບັດເຄຣດິດເປັນເຄື່ອງມືຫລຸດຄ່າໃຊ້ຈ່າຍໃຫ້ກັບເຮົາ : ຢ່າໃຊ້ຈ່າຍເກີນໂຕ ສາເຫດທີ່ແນະນຳຈ່າຍດ້ວຍບັດເຄຣດິດ ເພາະໄດ້ສ່ວນຫລຸດຄະແນນສະສົມ ໄດ້ເງິນຄືນມາ ດີກ່ວາການໃຊ້ເງິນສົດ ເຊິ່ງຫາກໃຊ້ເຄຣດິດຫລາຍໃບໂດຍຈ່າຍວົງ ເງິນເຕັມຈຳນວນ ແລະ ເລືອກໃຊ້ບັດທີ່ໃຫ້ສ່ວນຫລຸດຫລາຍທີ່ສຸດ.
8. ທ້ອນເງິນແບບອື່ນ ນອກຈາກຝາກເງິນກັບທະນາຄານ : ການທ້ອນເງິນທາງເລືອກມີຫລາກຫລາຍຊ່ອງທາງ ບໍ່ສະ ເພາະແຕ່ການຝາກໄວ້ກັບທະນາຄານເພື່ອກິນດອກເບ້ຍພຽງຢ່າງດຽວເທົ່ານັ້ນ.
9. ຈົ່ງເລືອກຊັບສິນທີ່ບໍ່ແມ່ນການລົງທຶນໃຫ້ດີ ເຊັ່ນ : ເຮືອນ ແລະ ລົດທີ່ເຮົາໃຊ້ຢູ່ ເພາະບໍ່ໄດ້ປ່ຽນກັນຕະຫລອດ ມັນຖືວ່າ ເປັນຕົ້ນທຶນຈົມຈົນກ່ວາຈະຂາຍອອກໄປ. ສະນັ້ນ ຈົ່ງເລືອກເຮືອນທຳເລດີໆ, ລາຄາກຸ້ມຄ່າ ແລະ ໄປເຮັດວຽກງານສະ ດວກສະບາຍ ໂດຍກ່ອນຈະຊື້ເຮືອນໃຫ້ໄປເລາະເລືອກເບິ່ງຫລາຍໆບ່ອນກ່ອນຕັດສິນໃຈຊື້, ເລືອກລົດລຸ້ນທີ່ເປັນທີ່ນິຍົມ ຂອງຕະຫລາດ, ກຸ້ມຄ່າ ແລະ ບໍ່ເປ່ເພງ່າຍ.
10. ທ້ອນເງິນ 10 ລ້ານທຳອິດໃຫ້ໄດ້ ແລ້ວ 10 ລ້ານຕໍ່ໄປກໍຈະງ່າຍຂຶ້ນ : ເພາະເມື່ອເຮົາຮຽນຮູ້ວິທີການບໍລິຫານເງິນທີ່ຖືກ ຕ້ອງ ຈົນມີ 10 ລ້ານທຳອິດໄດ້ແລ້ວ ຕໍ່ໄປມັນກໍຈະງ່າຍຂຶ້ນຫລາຍ ບວກກັບເຮົາມີທຶນ 10 ລ້ານທຳອິດ ເອົາໄປຕໍ່ຍອດ ຄວາມຮັ່ງມີໝັ້ນຄົງ.
11. ຮຽນຮູ້ຈາກການລົງທຶນຂອງເຮົາທີ່ຜິດພາດ : ທຸກຄົນທີ່ເຄີຍລົງທຶນເຄີຍຂາດທຶນເປັນເລື່ອງປົກກະຕິ, ແຕ່ກໍບໍ່ຄວນເຊົາ ລົງທຶນ ຈົ່ງລົງທຶນຕໍ່ໄປ ແຕ່ໃຫ້ເລືອກຮູບແບບໃໝ່ໄປຕະຫລອດ ແລະ ຢ່າກັບໄປລົງທຶນກັບສິ່ງທີ່ເຄີຍຜິດພາດມາກ່ອນ.
12. ເລີ່ມບັນທຶກການເຕີບໃຫຍ່ຂອງຊັບສິນ ແລະ ລາຍຮັບທຸກໆປີ : ການບັນທຶກຊ່ວຍໃຫ້ເຮົາເຫັນຈຸດບົກພ່ອງວ່າຄວນປັບ ປຸງພາກສ່ວນໃດ ແລະ ໃຊ້ກຳນົດແນວທາງໄປສູ່ເປົ້າໝາຍ ໄດ້ແກ່ : ການເຕີບໃຫຍ່ຂອງລາຍຮັບ, ການເຕີບໃຫຍ່ຂອງ ຊັບສິນ ແລະ ຜົນຕອບແທນຈາກການລົງທຶນ ເພື່ອໃຫ້ບັນລຸອິດສະລະພາບທາງການເງິນ.
13. ຈົ່ງເລືອກເອົາເງິນໄປລົງທຶນສະເພາະເງິນເຢັນ : ການລົງທຶນຕ້ອງໃຊ້ເວລາ ແລະ ມີໂອກາດຂາດທຶນ ແລະ ຖ້າຂາດທຶນ ແທ້ ເຮົາຈະໄດ້ບໍ່ເດືອດຮ້ອຍຫລາຍ ເຊິ່ງທ່ານຄວນກຳນົດເງິນສົດຂັ້ນຕ່ຳໄວ້ໃຊ້ຈ່າຍຢ່າງໜ້ອຍ 12 ເດືອນ. ສ່ວນທີ່ ເຫລືອກໍເອົາໄປລົງທຶນໄດ້ ຈັກມື້ໜຶ່ງການມີອິດສະລະພາບທາງການເງິນຕ້ອງເກີດຂຶ້ນ ການຢາກຈະເຮັດຫຍັງກໍໄດ້ທີ່ ເຮົາຢາກເຮັດໂດຍທີ່ຍັງມີລາຍຮັບເຂົ້າມາຢ່າງສະໝ່ຳສະເໝີໂດຍບໍ່ຕ້ອງເຮັດວຽກ ເຊື່ອວ່າທຸກທ່ານເຮັດໄດ້.
14. ຝຶກລົງທຶນເພື່ອໃຫ້ມີລາຍຮັບເສີມຢູ່ສະເໝີ : ອະນາຄົດອາດກາຍເປັນລາຍຮັບຫລັກກໍໄດ້ ເຊັ່ນ : ລົງທຶນໃນຫຸ້ນ, ລົງທຶນ ໃນອະສັງຫາລິມະຊັບ ແລະ ຂາຍເຄື່ອງອອນລາຍ, ແຕ່ກ່ອນລົງທຶນຕ້ອງສຶກສາໃຫ້ຮູ້ກ່ອນ ແລະ ຈະຮັບຄວາມສ່ຽງໄດ້ ຫລາຍປານໃດ.
15. ລະວັງວິກິດເສດຖະກິດໃຫ້ດີ : ຫາຄວາມຮູ້ເລື່ອງການລົງທຶນຫລາຍໆ, ປຶກສານັກລົງທຶນ, ໃຫ້ເຂົ້າໃຈວົງຈອນເສດຖະ ກິດທີ່ມີທັງເຕີບໃຫຍ່ ແລະ ຕົກຕ່ຳສະຫລັບກັນຕະຫລອດ ການສັງເກດດັດຊະນີຊີ້ທາງເສດຖະກິດ ມັນຊ່ວຍໃຫ້ລົງທຶນ ຖືກຈັງຫວະ ແລະ ຄວາມສ່ຽງບໍ່ສູງ.