190 ປະເທດ ແລະ ອົງກອນທົ່ວໂລກ ປະກາດຄຳໝັ້ນກຽມເລີກຜະລິດ ພະລັງງານໄຟຟ້າຈາກຖ່ານຫີນ
ລັດຖະບານອັງກິດ ໃນຖານະເຈົ້າພາບຈັດກອງປະຊຸມລັດພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ ຫລື COP26 ຢູ່ເມືອງກລາສໂກຂອງສະກອດແລນ ເປີດເຜີຍໃນຖະແຫລງການຮ່ວມເມື່ອວັນທີ 3 ພະຈິກວ່າ: 190 ປະເທດ ແລະ ອົງກອນຕ່າງໆທົ່ວໂລກ ໄດ້ໃຫ້ຄຳໝັ້ນທີ່ຈະຍົກເລີກການຜະລິດໄຟຟ້າຈາກຖ່ານຫີນ ໂດຍກຽມລົງນາມຂໍ້ຕົກລົງໃນວັນທີ 4 ພະຈິກ ເພື່ອຢຸດການລົງທຶນສ້າງໂຮງໄຟຟ້າຖ່ານຫີນແຫ່ງໃໝ່ທັງໃນປະເທດ ແລະ ຕ່າງປະເທດ, ພ້ອມທັງກຽມໃຫ້ຢຸດການຜະລິດພະລັງງານໄຟຟ້າຈາກຖ່ານຫີນທັງໝົດພາຍໃນປີ 2030 ສຳລັບປະເທດຮັ່ງມີ ແລະ ພາຍໃນປີ 2040 ສຳລັບປະເທດທຸກຍາກ.
ປະເທດທີ່ຕອບຮັບຂໍ້ຕົກລົງສະບັບນີ້ ຄືປະເທດຜູ້ໃຊ້ຖ່ານຫີນລາຍໃຫຍ່ເຊັ່ນ: ໂປແລນ, ຫວຽດນາມ ແລະ ຊິລີ. ຂະນະທີ່ປະເທດທີ່ອາໄສພະລັງງານໄຟຟ້າຈາກຖ່ານຫີນລາຍໃຫຍ່ຄືອົດສະຕຣາລີ, ອິນເດຍ, ຈີນ ແລະ ອາເມລິກາ ບໍ່ໄດ້ເຂົ້າຮ່ວມ.
ຖ່ານຫີນຖືເປັນເຊື້ອໄຟຟໍຊິວ (Fossil Fuel) ທີ່ສ້າງມົນລະພິດຫລາຍທີ່ສຸດ ແລະ ເປັນຕົວການສຳຄັນໃນການແຜ່ກະຈາຍແກັສກາກບອນສູ່ຊັ້ນບັນຍາກາດໂລກດ້ວຍການເຜົາໄໝ້ ເຊິ່ງເປັນປັດໄຈສຳຄັນທີ່ສົ່ງຜົນຕໍ່ການເພີ່ມຂຶ້ນຂອງອຸນຫະພູມໂລກ ແລະ ການປ່ຽນແປງຂອງສະພາບອາກາດ.
ຂໍ້ມູນໃນປີ 2019 ພົບວ່າ: ທົ່ວໂລກຍັງໃຊ້ພະລັງງານໄຟຟ້າທີ່ຜະລິດຈາກຖ່ານຫີນ ຄິດເປັນ 37% ຂອງພະລັງງານໄຟຟ້າທັງໝົດ ເຊິ່ງຂໍ້ດີຈາກການໃຊ້ຖ່ານຫີນຜະລິດໄຟຟ້າທີ່ມີຄ່າໃຊ້ຈ່າຍໜ້ອຍ ເຮັດໃຫ້ຫລາຍປະເທດເຊັ່ນ: ອາຟຣິກາໃຕ້, ໂປແລນ ແລະ ອິນເດຍ ມີການສ້າງໂຮງໄຟຟ້າຖ່ານຫີນຈຳນວນຫລາຍ ສົ່ງຜົນໃຫ້ການປ່ຽນຜ່ານໄປສູ່ພະລັງງານທາງເລືອກທີ່ສະອາດກວ່ານັ້ນຈຳເປັນຕ້ອງໃຊ້ເງິນລົງທຶນຈຳນວນຫລາຍ.
ເຖິງຢ່າງໃດກໍຕາມ, ໃນໄລຍະຫລາຍປີຜ່ານມາພົບວ່າ: ການສ້າງທໍ່ສົ່ງສຳລັບໂຄງການໂຮງໄຟຟ້າຖ່ານຫີນແຫ່ງໃໝ່ທົ່ວໂລກມີຈຳນວນຫລຸດລົງຢ່າງຕໍ່ເນື່ອງ, ເຖິງວ່າຈີນ, ອິນເດຍ, ຫວຽດນາມ ແລະ ອິນໂດເນເຊຍ ຈະຍັງມີແຜນລົງທຶນກໍ່ສ້າງໂຮງໄຟຟ້າຖ່ານຫີນແຫ່ງໃໝ່ເພີ່ມອີກ.
ຂະນະທີ່ຈີນ ເຊິ່ງເປັນຜູ້ຜະລິດໄຟຟ້າຈາກຖ່ານຫີນລາຍໃຫຍ່ຂອງໂລກ ໃຫ້ຄຳໝັ້ນໃນເດືອນກັນຍາຜ່ານມາວ່າ: ຈະຢຸດສະໜັບສະໜູນການລົງທຶນໃນໂຄງການສ້າງໂຮງໄຟຟ້າຖ່ານຫີນແຫ່ງໃໝ່ໃນຕ່າງປະເທດ ແຕ່ບໍ່ລະບຸເຖິງການຢຸດການສ້າງໂຮງໄຟຟ້າຖ່ານຫີນໃນປະເທດ.
ອ້າງອີງ:
- https://www.bbc.com/news/science-environment-59159018
- https://www.reuters.com/business/cop/cop26-coal-deals-take-aim-dirtiest-fossil-fuel-2021-11-03/
