ອີຣານຍອມກັບເຂົ້າສູ່ໂຕະເຈລະຈາ ຮື້ຟື້ນຂໍ້ຕົກລົງນິວເຄຼຍ ແລກກັບຍົກເລີກມາດຕະການຂວ້ຳບາດ

ອີຣານຫວນຄືນສູ່ໂຕະເຈລະຈາຮື້ຟື້ນຂໍ້ຕົກລົງນິວເຄຼຍປີ 2015 ຍອມຮ່ວມປະຊຸມກັບ 6 ປະເທດມະຫາອຳນາດທີ່ວຽນນາ 29 ພະຈິກນີ້.

ວັນທີ 4 ພະຈິກ 2021, ສຳນັກຂ່າວຕ່າງປະເທດລາຍງານວ່າ: ທ່ານ ອາລີ ບາເກຣີ ການີ ຮອງລັດຖະມົນຕີກະຊວງຕ່າງປະເທດ ແລະ ຜູ້ນຳການເຈລະຈາດ້ານນິວເຄຼຍຂອງອີຣານ ເປີດເຜີຍວ່າ: ອີຣານຕົກລົງຈະເຂົ້າຮ່ວມການເຈລະຈາເພື່ອຮື້ຟື້ນຂໍ້ຕົກລົງນິວເຄຼຍ ທີ່ຮູ້ຈັກກັນໃນຊື່ “ແຜນປະຕິບັດການຮ່ວມທີ່ຄວບຄຸມ (Joint Comprehensive Plan for Action) ຫລື JCPOA ກັບ 6 ປະເທດມະຫາອຳນາດ ເຊິ່ງຈະມີຂຶ້ນຢູ່ນະຄອນຫລວງວຽນນາ ປະເທດໂອຕຣິດ ໃນວັນທີ 29 ພະຈິກນີ້ ຫລັງຫາລືທາງໂທລະພສບກັບ ເອນຣິກ ໂມຣາ ຜູ້ແທນພິເສດຂອງສະຫະພາບເອີຣົບ (EU) ເຊິ່ງເຮັດໜ້າທີ່ເປັນຄົນກາງໃນການໄກ່ເກ່ຍ.

ການເຄື່ອນໄຫວຫລ້າສຸດມີຂຶ້ນຫລັງຈາກການເຈລະຈາເພື່ອຮື້ຟື້ນຂໍ້ຕົກລົງນິວເຄຼຍອີຣານໄດ້ຢຸດສະງັກມາເປັນເວລາກວ່າ 5 ປີ ນັບແຕ່ອີຣານຈັດການເລືອກຕັ້ງປະທານາທິບໍດີ ແລະ ປ່ຽນຜ່ານລັດຖະບານໃໝ່.

ທັງນີ້, ຂໍ້ຕົກລົງ JCPOA ເປັນຂໍ້ຕົກລົງທີ່ອີຣານເຮັດໄວ້ກັບ 6 ປະເທດມະຫາອຳນາດໃນປີ 2015 ໂດຍກຳນົດໃຫ້ອີຣານຈຳກັດການເພີ່ມສະມັດຖະພາບຢູເຣນຽມ ເພື່ອແລກກັບການຍົກເລີກການຂວ້ຳບາດທົ່ວໂລກ, ແຕ່ຕໍ່ມາໃນປີ 2018 ອະດີດປະທານາທິບໍດີ ໂດນັລ ທຣຳ ຂອງອາເມລິກາ ໄດ້ປະກາດຖອນຕົວອອກຈາກຂໍ້ຕົກລົງດັ່ງກ່າວ ແລະ ກັບມາໃຊ້ມາດຕະການຂວ້ຳບາດອີຣານອີກ ນັບແຕ່ນັ້ນມາ ອີຣານໄດ້ເລີ່ມຝ່າຝືນຂໍ້ຕົກລົງ ກັບມາເພີ່ມສະມັດຖະພາບຢູເຣນຽມ ແລະ ມີການກັກຕູນຈົນເກີນຂີດຈຳກັດ.

ຫລັງຈາກປະທານາທິບໍດີ ໂຈ ໄບເດນ ເຂົ້າຮັບຕຳແໜ່ງ, ອາເມລິກາໄດ້ສະແດງເຈດຕະນາວ່າອາດຈະກັບເຂົ້າສູ່ຂໍ້ຕົກລົງນິວເຄຼຍ ແລະ ຕ້ອງການໃຫ້ກັບມາເລີ່ມເຈລະຈາອີກ. ຂະນະທີ່ອີຣານໄດ້ຍື່ນຂໍ້ສະເໜີວ່າ: ຫົນທາງດຽວທີ່ຈະເຮັດໃຫ້ການເຈລະຈາເກີດຂຶ້ນ ອາເມລິກາຈະຕ້ອງຍົກເລີກມາດຕະການລົງໂທດທັງໝົດກ່ອນ.

ອ້າງອີງ:

https://www.aljazeera.com/…/iran-nuclear-talks-with…

https://www.bbc.com/news/world-middle-east-59154988