ຕອງກາປະກາດລັອກດາວ ຫລັງພົບຜູ້ຕິດໂຄວິດຄົນທຳອິດຂອງປະເທດ ນັບແຕ່ທ້າຍປີ 2019
ວັນທີ 2 ພະຈິກ 2021, ທາງການຕອງກາງປະກາດລັອກດາວ ຫລັງກວດພົບຜູ້ຕິດເຊື້ອໂຄວິດຄົນທຳອິດຂອງປະເທດ ນັບແຕ່ທ້າຍປີ 2019 ທີ່ມີການກວດພົບເຊື້ອຄັ້ງທຳອິດ ແລະ ແຜ່ລະບາດໃນເວລາຕໍ່ມາ ໂດຍຜູ້ຕິດເຊື້ອຄົນດັ່ງກ່າວ ເປັນຜູ້ໂດຍສານທີ່ເດີນທາງມາຈາກນິວຊີແລນ ມີຜົນກວດເປັນລົບກ່ອນອອກເດີນທາງ ກ່ອນຈະກວດພົບການຕິດເຊື້ອເວລາຢູ່ໃນຊ່ວງກັກຕົວ.
ລັດຖະບານຕອງກາປະກາດລັອກດາວເກາະຕອງກາຕາປູປະມານ 1 ອາທິດ ພ້ອມປະກາດເຄີຟິ້ວໄລຍະເວລາ 20:00-06:00 ໂມງ ໃຫ້ປະຊາຊົນຢຸດການເຮັດວຽກ ແລະ ຢູ່ແຕ່ພາຍໃນທີ່ພັກອາໄສ ຍົກເວັ້ນແຕ່ມີເຫດຜົນຈຳເປັນ, ບໍລິການຂົນສົ່ງສາທາລະນະ, ຮ້ານອາຫານ, ເທັກ, ຮ້ານບັນເທີງ, ໂຮງຮຽນ ແລະ ໂບດ ຈະປິດໃຫ້ບໍລິການຊົ່ວຄາວ ລວມທັງແນະນຳໃຫ້ມີການເວັ້ນໄລຍະຫ່າງທາງສັງຄົມ.
ການກວດພົບຜູ້ຕິດໂຄວິດຄົນທຳອິດຂອງຕອງກາ ສົ່ງຜົນໃຫ້ມີປະເທດທີ່ພົບຜູ້ຕິດເຊື້ອແລ້ວ 189 ຈາກ 193 ປະເທດທົ່ວໂລກ ໂດຍປະເທດທີ່ຍັງບໍ່ພົບຜູ້ຕິດເຊື້ອຄົນທຳອິດຢ່າງເປັນທາງການ ໄດ້ແກ່ ສປປ ເກົາຫລີ, ເຕິກເມນິສະຖານ, ຕູວາລູ ແລະ ນາອູຣູ.
ຕອງກາເປັນປະເທດເຂດໂພລີນີເຊຍ ຕັ້ງຢູ່ໃນມະຫາສະໝຸດປາຊີຟິກ ປະກາດເອກະລາດຈາກອັງກິດເມື່ອປີ 1970 ມີຈຳນວນປະຊາກອນປະມານ 1 ແສນຄົນ, ປະຊາກອນປະມານ 1 ໃນ 5 ຂອງປະເທດຢູ່ພາຍໃຕ້ເສັ້ນຄວາມທຸກຍາກ, ອຸປະກອນທາງການແພດ ແລະ ສະຖານທີ່ໃຫ້ບໍລິການດ້ານສາທາລະນະສຸກມີຈຳກັດ ໂດຍຫລ້າສຸດ ມີປະຊາຊົນປະມານ 3,7 ໝື່ນຄົນ ເຂົ້າຮັບວັກຊີນຕ້ານໂຄວິດຄົບໂດສແລ້ວ ເຊິ່ງວັກຊີນສ່ວນຫລາຍໄດ້ຮັບມອບຜ່ານໂຄງການ COVAX ຂອງອົງການອະນາໄມໂລກ ແລະ ພັນທະມິດ ລວມທັງການຊ່ວຍເຫລືອຈາກລັດຖະບານຍີ່ປຸ່ນທີ່ມອບໃຫ້ຫລາຍປະເທດໃນເຂດປາຊີຟິກ.
ອ້າງອີງ:
- https://edition.cnn.com/2021/11/02/asia/tonga-lockdown-covid-intl-hnk/index.html
- https://www.abc.net.au/news/2021-11-01/tonga-records-first-covid-19-case-goes-into-lockdown/100585656
- https://www.aljazeera.com/news/2021/10/30/tonga-faces-lockdown-as-first-covid-case-detected
