ບໍຣິສ ຈອນສັນ ກ່າວເປີດ COP26 ຊີ້ເປັນໂອກາດສຸດທ້າຍໃນການຊ່ວຍໂລກ ຈາກບັນຫາ Climate Change
ນາຍົກລັດຖະມົນຕີອັງກິດຮຽກຮ້ອງໃຫ້ຜູ້ນຳໂລກຈິງຈັງຕໍ່ບັນຫາກ່ອນສາຍເກີນແກ້, ເຜີຍໂມງວັນສິ້ນໂລກເດີນມາໃກ້ຈຸດສິ້ນສຸດ.
ວັນທີ 1 ພະຈິກ 2021, ກອງປະຊຸມສະມັດຊາປະເທດພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ ຫລື COP26 ເຊິ່ງຈັດຂຶ້ນຢູ່ເມືອງກລາສໂກຂອງສະກອດແລນ ໄດ້ເລີ່ມຕົ້ນຂຶ້ນແລ້ວ ໂດຍມີນາຍົກລັດຖະມົນຕີ ບໍຣິສ ຈອນສັນ ຂອງອັງກິດ ກ່າວເປີດປະຊຸມ.
ໃນກອງປະຊຸມ COP26 ຄັ້ງນີ້ ເປັນທີ່ຈັບຕາເບິ່ງຂອງທົ່ວໂລກ ເນື່ອງຈາກຖືກເບິ່ງວ່າເປັນໂອກາດສຸດທ້າຍຂອງມະນຸດໃນການຮັບມືບັນຫາສະພາບອາກາດປ່ຽນແປງ ໂດຍຖ້າບໍ່ສາມາດກຳນົດເປົ້າໝາຍ ແລະ ວິທີການໄດ້ໃນປີນີ້ ອາດຊ້າເກີນໄປສຳລັບການແກ້ໄຂບັນຫາ ທີ່ອາດນຳມາສູ່ຈຸດຈົບຂອງການໃຊ້ຊີວິດຕາມປົກກະຕິໃນປັດຈຸບັນ.
ທ່ານນາຍົກລັດຖະມົນຕີ ຈອນສັນ ຍົກຕົວຢ່າງວ່າ: ຖ້າອຸນຫະພູມເພີ່ມ 2 ອົງສາ ຈະເປັນໄພຕໍ່ແຫລ່ງອາຫານຂອງເຮົາ ຖ້າເພີ່ມ 3 ອົງສາ ຈະນຳມາເຊິ່ງໄພທຳມະຊາດຫລາຍຂຶ້ນ ແລະ ຖ້າເພີ່ມຂຶ້ນ 4 ອົງສາ ໃຫ້ບອກລາທົ່ວເມືອງໄດ້ເລີຍ.
ຍິ່ງເຮົາປ່ອຍໃຫ້ເວລາຜ່ານໄປໂດຍບໍ່ເຮັດຫຍັງ ບັນຫານີ້ຈະຍິ່ງແກ້ໄຂໄດ້ຍາກຂຶ້ນ ແລະ ເຮົາຈະຕ້ອງຈ່າຍໃນລາຄາທີ່ສູງຂຶ້ນ ເມື່ອໄພພິບັດມາເຖິງ.
ປັດຈຸບັນ ໂມງວັນສິ້ນໂລກເຫລືອອີກໜຶ່ງນາທີກ່ອນເຖິງທ່ຽງຄືນແລ້ວ ແລະ ເຮົາຕ້ອງເຮັດມັນນັບແຕ່ຕອນນີ້ ຖ້າເຮົາບໍ່ຈິງຈັງກັບເລື່ອງການປ່ຽນແປງຂອງສະພາບອາກາດໃນວັນນີ້ ຈະຊ້າເກີນແກ້ສຳລັບລູກຫລານເຮົາໃນມື້ອື່ນ.
ຜູ້ນຳອັງກິດກ່າວອີກວ່າ: ຄວາມຄຽດແຄ້ນຂອງສາທາລະນະຈະເພີ່ມຂຶ້ນໄປເຖິງລະດັບທີ່ບໍ່ສາມາດຄວບຄຸມໄດ້ ຖ້າກອງປະຊຸມຄັ້ງນີ້ລົ້ມເຫລວມ.
ສຳລັບກອງປະຊຸມ COP26 ຈະມີຂຶ້ນໄປຈົນເຖິງວັນທີ 12 ພະຈິກນີ້.
