ອັບເດດ!!! ປກສ ແຂວງ ບໍ່ແກ້ວ ຢືດຢາບ້າໄດ້ 55.664.000 ເມັດ ແລະ ຢາໄອ໋ 1.537 ກິໂລ
ອີງຕາມການລາຍງານຂອງ ເຈົ້າໜ້າທີ່ ປກສ ແຂວງບໍ່ແກ້ວ ກ່ຽວກັບການຈັບກຸ່ມ ແລະ ຢຶດຢາເສບຕິດ ໃນວັນທີ 27 ຕູລາ 2021 ທີ່ຜ່ານມາ, ໃຫ້ຮູ້ວ່າ: ເວລາ 5:30 ໂມງ ຂອງວັນທີ 27 ຕູລາ 2021 ມີພົນລະເມືອງດີ ໄດ້ລາຍພະນັກງານ ບ້ານໂພນທອງ ເມືອງຫ້ວຍຊາຍ ແຂວງບໍ່ແກ້ວ ຈະມີລົດບັນທຸກສິນຄ້າ ປະເພດໄມ້ ຈາກບ້ານຫ້ວຍຊາຍນ້ອຍ ພໍຜ່ານໄປໃນໄລຍະໜຶ່ງ ກໍເຫັນລົດຫມາຍເລກທະບຽນ ບຄ 1194 ກໍາແພງນະຄອນ ຕິດທັບກັບທະບຽນເກົ່າ ບຍ 5689 ກໍາແພງນະຄອນ ໄດ້ແລ່ນອອກມາທາງບ້ານປຸ່ງ ເຈົ້າໜ້າທີ່ປະຈໍາບ້ານໂພນທອງ ສົົມທົບພາສີ, ອາກອນ, ຊັບສິນ ແລະ ກະສິກໍາ ໄດ້ຂໍກວດຄົ້ນ ລົດຄັນດັ່ງກ່າວ.
ເຈົ້າໜ້າທີ່ ໄດ້ສອບຖາມຜູ້ຂັບລົດວ່າແມ່ນສິນຄ້າຫຍັງ ຜູ້ຂັບຂີ່ໄດ້ຕອບກັບຂົນລາງເບຍເປົ່າ, ໃນເບື້ອງຕົ້ນການກວດກາ ແມ່ນລາງເບຍເປົ່າແທ້ ແຕ່ທາງເຈົ້າໜ້າທີ່ ມີຄວາມສົງໄສວ່າລົດຄັນດັ່ງກ່າວຜິດປົກກະຕິ ແລະ ໄດ້ສັງເກດເບິ່ງລົດມີນໍ້າໜັກຫຼາຍ ສະນັ້ນ ຈຶ່ງປະສານເອົາລົດມາກວດກາຄືນໃໝ່ຢ້ານມີສິນຄ້າ ສິ່ງທີ່ຜິດກົດໝາຍປະປົນມາ ແລະ ໄດ້ເອົາໄປກວດກາຢູ່ທີ່ຈຸດກວດການໍ້້າເລັງ ພໍຮອດຈຸດກວດກາກໍໄດ້ກວດພົບເຫັນຖົງສີດໍາ; ຈຶ່ງນໍາລົດຄັນດັ່ງກ່າວມາກວດຄົ້ນຢູ່ທີ່ ປກສ ແຂວງ.
ຜ່ານການກວດຄົ້ນ ພົບເຫັນຢາເສບຕິດ ປະເພດຢາບ້າຈໍານວນ 262 ເປົ໋າເທົ່າກັບ 27.832 ມັດ 55.664.000ເມັດ ມີນໍາໜັກ 5.566,4 ກິໂລ, ຢາໄອສ໌ ຈໍານວນ 65 ເປົ໋າ ເທົ່າກັບ 1.537 ຫໍ່ ມີນໍ້າໜັກ 1.537 ກິໂລ, ລົດບັນທຸກ 12 ລໍ້ 1 ຄັນ.
ເຈົ້າຫນ້າທີ່ ໄດ້ກັກຕົວ ທ້າວ ທອງໄຊທໍ ອາຍຸ 22 ປີ, ຜູ້ຂັບລົດ ຢູ່ບ້ານນໍ້າສະໝອກເໜືອ ເມືອງຫ້ວຍຊາຍແຂວງບໍ່ແກ້ວ, ຜູ້ກ່ຽວໄດ້ໃຫ້ການວ່າ ເຄື່ອງດັ່ງກ່າວແມ່ນຂອງທ້າວ ໄຊຕົງທໍ່ ອາຍຸ 40 ປີ, ນັກທຸລະກິດ ຢູ່ບ້ານຫ້ວຍຊາຍນ້ອຍ ເມືອງຫ້ວຍຊາຍ ແຂວງບໍ່ແກ້ວ.
ຈາກນັ້ນເຈົ້າໜ້າທີ່ສົມທົບກັບພາກສ່ວນທີ່ກ່ຽວໄດ້ຈັບຕົວ ທ້າວ ໄຊຕົ່ງທໍ່ ແລະ ກວດຄົ້ນເຮືອນ ພົບເຫັນ ຢາເສບຕິດ ປະເພດຢາບ້າ 4 ຖົງໃຫຍ່ ນໍ້າໜັກ 45.5 ກິໂລ, ແປ້ງຝຸ່ນສີແດງ ຈໍານວນ 21 ຖົງໃຫຍ່ ນໍ້າໜັກ 159 ກິໂລ, ແປ້ງຝຸ່ນສີຂາວ 20 ກິໂລ, ແປ້ງຝຸ່ນສີຟ້າ 2 ຖົງນ້ອຍ ຈໍານວນ 300 ກຼາມ, ນໍ້າຢາເຄມີ 1 ຕຸກໃຫຍ່ 3 ຕຸກນ້ອຍນໍ້າໜັກ 10 ກິໂລ, ຢາບ້າເມັດສີຂຽວ 2 ຖົງໃຫຍ່ ນໍ້າໜັກ 2 ກິໂລ, ຢາບ້າເມັດສີຂາວ ຈໍານວນ 1 ຖົງນ້ອຍ ນໍ້າໜັ້ກ 200 ກິໂລ, ເຄື່ອງອັດຢາເສບຕິດ 1 ເຄື່ອງ, ອາວຸດເສິກປະເພດປືນ Ak47 ຈຳນວນ 1 ກະບອກ ແລະ ປືນສັ້ນ 9 ມມ ຈຳນວນ 1 ກະບອກ ພ້ອມລູກປືນ. ນອກນັ້ນ, ໃນຕູ້ເຊັບຍັງພົບເງິນ ແລະ ວັດຖຸ ຄ້າຍຄືຄຳຈຳນວນຫນຶ່ງ ເຈົ້າຫນ້າທີ່ໄດ້ຢຶດໄວ້ເປັນຂອງກາງ ເພື່ອທຳການກວດສອບຕາມຂັ້ນຕອນຕໍ່ໄປ.
……….
ຂໍ້ມູນ: ປກສ ແຂວງບໍ່ແກ້ວ
