ຫົວໜ້າຄະນະລັດຖະປະຫານຊູດານອ້າງ ຈຳເປັນຕ້ອງຢຶດອຳນາດການປົກຄອງ ເພື່ອບໍ່ໃຫ້ເກີດສົງຄາມພາຍໃນ
ກອງທັບຊູດານຮັບຕ້ອງເຮັດລັດຖະປະຫານ ເພື່ອຢຸດການປະທະກັນລະຫວ່າງພົນລະເຮືອນ ແລະ ກອງທັບ ພ້ອມໂຍນຄວາມຜິດໃຫ້ນັກການເມືອງທີ່ອອກມາຍຸໃຫ້ສອງຝ່າຍປະທະກັນ.
ວັນທີ 26 ຕຸລາ 2021, ສຳນັກຂ່າວບີບີຊີ (BBC) ລາຍງານວ່າ: ພົນເອກ ອັບເດລ ຟັດຕາ ອັລ-ເບີຮານ ຖະແຫລງຂ່າວເພື່ອຊີ້ແຈງເຖິງສາເຫດທີ່ກອງທັບຕ້ອງເຮັດລັດຖະປະຫານ ໂດຍລະບຸວ່າຕ້ອງການປ້ອງກັນບໍ່ໃຫ້ສົງຄາມກາງເມືອງເກີດຂຶ້ນ.
ນອກຈາກນີ້ ຍັງໄດ້ກ່າວວ່າ: ໄດ້ຄວບຄຸມນາຍົກລັດຖະມົນຕີ ອັບດັລລາ ແຮມດອກ ມາໄວ້ຢູ່ເຮືອນຂອງຕົນເອງ ເພື່ອຄວາມປອດໄພຂອງນາຍົກ ທີ່ຖືກຢຶດອຳນາດ ແລະ ຫລ້າສຸດໄດ້ປ່ອຍກັບເຮືອນໄປແລ້ວ.
ປະຊາຊົນໃນນະຄອນຫລວງຄາທູມ ເມືອງຫລວງຂອງຊູດານ ຍັງອອກມາປະທ້ວງ ເຮັດໃຫ້ຖະໜົນຫົນທາງ, ຂົວ ແລະ ຮ້ານຄ້າຍັງປິດຢູ່ ຍັງມີລາຍງານວ່າສັນຍານໂທລະສັບ ແລະ ອິນເຕີເນັດຂັດຂ້ອງ.
ເຫດການວຸ້ນວາຍຫລັງລັດຖະປະຫານເຮັດໃຫ້ມີຜູ້ເສຍຊີວິດຢ່າງໜ້ອຍ 10 ຄົນແລ້ວ ແລະ ມີລາຍງານຈາກໂຮງໝໍວ່າມີຜູ້ໄດ້ຮັບບາດເຈັບຈາກລູກປືນ.
ຜູ້ນຳຄະນະລັດຖະປະຫານຍັງອ້າງວ່າ: ຈຳເປັນຕ້ອງລົ້ມລ້າງການປົກຄອງ ພ້ອມທັງຈັບນັກການເມືອງ ແລະ ປະກາດສະຖານະການສຸກເສີນ ເນື່ອງຈາກມີກຸ່ມການເມືອງທີ່ພະຍາຍາມຍຸໃຫ້ພົນລະເຮືອນປະທະກັບກອງທັບ.
ຕາມລາຍງານຍັງລະບຸວ່າ: ນັບແຕ່ວັນທີ 25 ຕຸລາຜ່ານມາ ທະຫານຍັງພະຍາຍາມຈະຄົ້ນຫາເຮືອນແຕ່ລະຫລັງ ເພື່ອຈັບກຸມແກນນຳໃນການປະທ້ວງນຳອີກ.
ອ້າງອີງ:
https://www.bbc.com/news/world-africa-59052260
https://apnews.com/…/middle-east-africa-sudan-arrests…
