ໂຄງການ Safe and Fair Programme ມອບເຄື່ອງຊ່ວຍເຫລືອ ໃຫ້ ສູນຈໍາກັດບໍລິເວນ ແຂວງ ສະຫວັນນະເຂດ ແລະ ຈໍາປາສັກ
ກະຊວງ ແຮງງານ ແລະ ສະຫວັດດີການສັງຄົມ ຮ່ວມກັບ ອົງການແຮງງານສາກົນ (ILO) ໄດ້ມອບເຄື່ອງຊ່ວຍເຫລືອ ໃຫ້ແກ່ບັນດາສູນຈໍາກັດບໍລິເວນຂອງແຂວງ ສະຫວັນນະເຂດ ແລະ ຈໍາປາສັກ, ຕາງຫນ້າແຂວງ ສະຫວັນນະເຂດ ມອບເຄື່ອງຊ່ວຍເຫລືອ ໂດຍແມ່ນ ທ່ານ ນາງ ພາວັນ ບົວຫລວງລາດ ຫົວໜ້າພະແນກ ຮສສ ແຂວງ ແລະ ຕາງໜ້າຮັບໂດຍ ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງໆ ສະຫວັນນະເຂດ; ແຂວງ ຈໍາປາສັກ ຕາງໜ້າມອບໂດຍ ທ່ານ ອຸດົມສັກ ດີວິໄຊ ຫົວຫນ້າພະແນກ ຮສສ ແຂວງ ແລະ ຕາງໜ້າຮັບໂດຍ ທ່ານ ບຸນເນື່ອງ ວົງພະທອງຄຳ ຕາງໜ້າສູນຈຳກັດບໍລິເວນ ຫລັກ 21.
ເຊິ່ງເຄື່ອງຊ່ວຍເຫລືອດັ່ງກ່າວ ຈະໄດ້ແຈກຢາຍໃຫ້ແກ່ແຮງງານ ຢູ່ພາຍໃນສູນຈໍາກັດບໍລິເວນ ເພື່ອນໍາໃຊ້ ແລະ ປ້ອງກັນຕົນເອງຈາກພະຍາດໂຄວິດ-19 ໃນໄລຍະການກັກຕົວ ແລະ ປິ່ນປົວ. ການຊ່ວຍເຫລືອດັ່ງກ່າວປະກອບດ້ວຍ: ເຈວລ້າງມື 500 ຂວດ, ສະເປເອວກໍຮໍ 500 ຂວດ, ຜ້າປິດປາກ 850 ກັບ, ຕຽງພັບ 400 ຜືນ, ສາດຢາງ 450 ຜືນ, ຜ້າຫົ່ມ 500 ຜືນ, ໝອນ 500 ໜ່ວຍ, ມຸ້ງ 500 ດາງ ແລະ ແຜ່ນພັບກ່ຽວກັບຂໍ້ມູນການປ້ອງກັນພະຍາດໂຄວິດ-19, ຂໍ້ມູນການສະໝັກງານພາຍໃນ ປະເທດ ແລະ ຄູ່ມືການບໍລິການສຳລັບແຮງງານເຄື່ອນຍ້າຍເພດຍິງໃນພາກພື້ນອາຊຽນ ຈໍານວນ 20,000 ແຜ່ນ ລວມມູນຄ່າທັງໝົດຫລາຍກວ່າ283.800,000 ກີບ.
ກິດຈະກຳດັ່ງກ່າວຖືເປັນການປະກອບສ່ວນອັນສໍາຄັນ ເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຮອບໃໝ່ ທີ່ກຳລັງເປັນບັນຫາທ້າທາຍ ສໍາລັບ ສປປ ລາວ ໃນປັດຈຸບັນ.
ການມອບເຄື່ອງຊ່ວຍເຫລືອ ໃນຄັ້ງນີ້ ແມ່ນພາຍໃຕ້ໂຄງການເຄື່ອນຍ້າຍແຮງງານແບບປອດໄພ ແລະ ມີຄວາມຍຸຕິທໍາ: ການຮັບຮູ້ເຖິງສິດທິ ແລະ ກາລະໂອກາດ ຂອງແຮງງານເຄື່ອນຍ້າຍເພດຍິງ ໃນພາກພື້ນອາຊຽນ (Safe and Fair Programme) ເຊິ່ງເປັນໂຄງການຮ່ວມມື ລະຫວ່າງ ກະຊວງ ແຮງງານ ແລະ ສະຫວັດດີການສັງຄົມ ແລະ ອົງການແຮງງານສາກົນ (ILO) ໂດຍການສະໜັບສະໜູນ ງົບປະມານຈາກ ສະຫະພາບເອີຣົບ (EU). ໂຄງການດັ່ງກ່າວ ມີຈຸດປະສົງໃນການເພີ່ມທະວີເຮັດໃຫ້ການ ເຄື່ອນຍ້າຍແຮງງານຂອງເພດຍິງມີຄວາມ ປອດໄພ ແລະ ມີຄວາມຍຸດຕິທຳ ໃນພາກພື້ນອາຊຽນ.
ສະນັ້ນ, ໂຄງການນີ້ ຈິ່ງມີຄວາມສໍາຄັນ ແລະ ຈໍາເປັນທີ່ສຸດສໍາລັບ ສປປ ລາວ ໃນເງື່ອນໄຂປັດຈຸບັນໃນຖານະທີ່ເປັນ ປະເທດສົ່ງ. ເນື່ອງຈາກໂຄງການດັ່ງກ່າວ ຈະສຸມໃສ່ເຮັດໃຫ້ແຮງງານເຄື່ອນຍ້າຍເພດຍິງໄດ້ຮັບການປົກ ປ້ອງ, ຄຸ້ມຄອງ ແລະ ຮັບຮູ້ສິດຂອງຕົນໂດຍຜ່ານການຮ່ວມມືຂອງລັດ ແລະ ອົງການຈັດຕັ້ງສາກົນ ທີ່ກ່ຽວຂ້ອງ ໃນການສ້າງແຜນງານ, ການພັດທະນາລະບົບການປົກປ້ອງ ແລະ ຄຸ້ມຄອງ ແລະ ການປັບປຸງນະໂຍບາຍຕ່າງໆ ທີ່ກ່ຽວຂ້ອງແນ່ໃສ່ເຮັດໃຫ້ແຮງງານເຄື່ອນຍ້າຍເພດຍິງມີສ່ວນຮ່ວມຫຼາຍຂຶ້ນ ໃນການພັດທະນາເສດຖະກິດສັງຄົມໃນຂົງເຂດ ແລະ ພາກພື້ນອາຊຽນ.
