ຜົນສຳເລັດກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ 11

ໃນ 5 ປີຜ່ານມາ, ການຈັດຕັ້ງປະຕິບັດແນວທາງການຈັດຕັ້ງຂອງພັກ ໄດ້ຄຽງຄູ່ກັບການຈັດ ຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການພັດທະນາເສດຖະກິດ-ວັດ ທະນະທຳ-ສັງຄົມ ເຫັນວ່າມີຜົນສຳເລັດໃນແຕ່ລະໄລຍະ ເປັນຕົ້ນ ການປັບປຸງລະບົບການເມືອງ ໄດ້ສຸມໃສ່ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນທັງ 4 ດ້ານ ຄື: ດ້ານການເມືອງ, ດ້ານແນວຄິດ, ດ້ານການຈັດຕັ້ງ ແລະ ດ້ານແບບແຜນນຳພາວິທີເຮັດວຽກ ມີບາດກ້າວດີຂຶ້ນ ເຮັດໃຫ້ການຈັດຕັ້ງຮາກຖານພັກ, ສະມາຊິກພັກໄດ້ເພີ່ມຂຶ້ນທາງດ້ານຈຳນວນ ແລະ ຄຸນນະພາບ, ຮອດປີ 2020 ໄດ້ສໍາເລັດການສ້າງແຜນກໍານົດພະນັກງານຂັ້ນສູນກາງຄຸ້ມຄອງ 53 ພາກສ່ວນ, ຕໍາແໜ່ງຂຶ້ນກັບສິດຄຸ້ມຄອງຂອງກະຊວງ-ອົງການ 168 ພາກສ່ວນ, ແຂວງ-ນະຄອນຫລວງ 490 ພາກສ່ວນ, ຂັ້ນບ້ານ 1.279 ບ້ານ. ແຜນກໍານົດດັ່ງກ່າວ, ໄດ້ເປັນບ່ອນອີງໃນການວາງແຜນບໍາລຸງ-ກໍ່ສ້າງ, ຊັບຊ້ອນ, ຈັດວາງພະ ນັກງານ. ນອກນັ້ນ, ຄະນະພັກແຕ່ລະຂັ້ນ ຍັງໄດ້ເອົາໃຈໃສ່ບໍາລຸງ-ກໍ່ສ້າງພະນັກງານຢູ່ໃນສິດຄຸ້ມຄອງຂອງຕົນ, ສະເພາະການບໍາລຸງ-ກໍ່ສ້າງສາຍການເມືອງ-ການປົກຄອງ ຄະນະຈັດຕັ້ງສູນກາງພັກ ໄດ້ເປັນເຈົ້າການສົມທົບກັບບັນດາກະຊວງ-ອົງການ, ແຂວງ-ນະຄອນຫລວງ ຄົ້ນຄວ້າເປົ້າໝາຍໄປບໍາລຸງ-ກໍ່ສ້າງຢູ່ພາຍໃນ ແລະ ຕ່າງປະເທດ.

ຜ່ານການຈັດຕັ້ງປະຕິບັດຕົວຈິງ ເຮັດໃຫ້ຖັນແຖວພະນັກງານມີຄວາມຮູ້, ຄວາມສາມາດ, ກໍາ ແໜ້ນແນວທາງ, ແຜນນະໂຍບາຍຂອງພັກ, ຫລັກມູນພື້ນຖານທິດສະດີມາກ-ເລນິນ, ການບໍລິຫານຄຸ້ມຄອງລັດ-ຄຸ້ມຄອງສັງຄົມ ແລະ ວິຊາສະເພາະຕ່າງໆ ນັບມື້ເພີ່ມຂຶ້ນ, ເປັນກໍາລັງແຮງໃນການປະຕິບັດໜ້າທີ່ການເມືອງຢູ່ແຕ່ລະຂົງເຂດວຽກງານ; ກົງຈັກການຈັດຕັ້ງຢູ່ກະຊວງ-ອົງການ ແລະ ທ້ອງຖິ່ນ ໄດ້ຮັບການປັບປຸງໃຫ້ສອດຄ່ອງ ກັບກົນໄກການບໍລິຫານຄຸ້ມຄອງລັດ ຕາມທິດຄຸ້ມຄອງມະຫາພາກ, ສັງ ລວມແລ້ວ ກົງຈັກການຈັດຕັ້ງໃນລະບົບການເມືອງແຕ່ລະຂັ້ນ ໄດ້ຮັບການປັບປຸງຢ່າງເປັນລະບົບຕໍ່ເນື່ອງ, ຖືກຕາມທິດກະທັດຮັດ, ສົມເຫດສົມຜົນ, ເຄື່ອນໄຫວມີປະສິດທິພາບ, ສອດຄ່ອງກັບສະພາບຄວາມເປັນຈິງ ເຮັດໃຫ້ການຈັດຕັ້ງແຕ່ລະຂັ້ນມີຄວາມໜັກແໜ້ນ, ເຂັ້ມແຂງ ແລະ ປະຕິບັດພາລະບົດ ບາດ, ສິດ, ໜ້າທີ່ຂອງຕົນ ຕອບສະໜອງຄວາມຮຽກຮ້ອງຕ້ອງ ການຂອງໜ້າທີ່ການເມືອງມີຜົນສໍາເລັດ ແລະ ອື່ນໆ.

ໂອກາດນີ້, ສະຫາຍ ທອງລຸນ ສີສຸລິດ ກໍໄດ້ເນັ້ນໜັກບາງບັນຫາຕໍ່ກອງປະຊຸມ ເປັນຕົ້ນ ວຽກງານກໍ່ສ້າງພັກ: ໃຫ້ເພີ່ມທະວີການນໍາພາການເມືອງ-ແນວຄິດ ໃຫ້ຫລາຍຂຶ້ນກວ່າເກົ່າ, ເຮັດໃຫ້ຖັນແຖວພະນັກງານນຳພາຂັ້ນຍຸດທະສາດ, ພະນັກງານຫລັກແຫລ່ງແຕ່ລະຂັ້ນ ໄດ້ຮັບການປະກອບຄວາມຮູ້ ລັດທິມາກ-ເລນິນ ແລະ ແນວຄິດປະທານ ໄກສອນ ພົມວິຫານ ທີ່ເປັນຜົນງານແຫ່ງການຄົ້ນຄວ້າ, ໝູນໃຊ້ ແລະ ປະດິດສ້າງທິດສະດີ ເຂົ້າໃນພາລະກິດປະຕິວັດຂອງພັກເຮົາ, ເຄື່ອນໄຫວກໍ່ສ້າງ ແລະ ປັບປຸງຕົນເອງໃນໄລຍະໃໝ່ ຕາມ 5 ຫລັກການ ແລະ 3 ທິດນໍາ ທີ່ໄດ້ກໍານົດໄວ້ໃນກົດລະບຽ ບສະໄໝທີ XI ຂອງພັກ, ໃນນັ້ນໃຫ້ຖືເອົາການສ້າງຄວາມເຂັ້ມແຂງ ຂອງການຈັດຕັ້ງພັກແຕ່ລະຂັ້ນ ແລະ ຍົກສູງຄຸນນະພາບຂອງສະມາຊິກພັກ ດ້ວຍການສ້າງການຈັດຕັ້ງພັກຮາກຖານ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ມີແບບແຜນນໍາພາທີ່ຖືກຕ້ອງ, ເວົ້າ ແລະ ປະຕິບັດຕາມມະຕິຢ່າງເຂັ້ມງວດ, ເຄົາລົບ ແລະ ປະຕິບັດຕາມລັດຖະທໍາມະນູນ, ກົດໝາຍ ແລະ ລະບຽບການຕ່າງໆ, ປະ ຕິບັດຕາມຫລັກການລວມສູນປະຊາທິປະໄຕ, ຕົກລົງເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບ, ມີການສ້າງແຜນການເຄື່ອນໄຫວວຽກງານລະອຽດ, ມີການຕິດຕາມກວດກາ, ປະເມີນຜົນການຈັດຕັ້ງປະຕິບັດເນື້ອໃນວຽກງານທີ່ວາງອອກຢ່າງປົກກະຕິ, ເພີ່ມທະວີການຕິດຕາມ, ກວດກາ ແລະ ເດັດດ່ຽວແກ້ໄຂປະກົດການຫຍໍ້ທໍ້ຢູ່ພາຍໃນພັກ, ເພີ່ມທະວີຄວາມສາມັກຄີເປັນປຶກແຜ່ນພາຍໃນພັກໃຫ້ໜັກແໜ້ນ, ເປັນຄັນທຸງ ແລະ ເປັນຫລັກແຫລ່ງເຕົ້າໂຮມຄວາມສາມັກຄີໃນທົ່ວພັກ, ທົ່ວລັດ ແລະ ທົ່ວປວງຊົນ.

ສ່ວນວຽກງານພະນັກງານ: ໃຫ້ຂຶ້ນແຜນກໍານົດພະນັກງານຢ່າງເປັນລະບົບຕໍ່ເນື່ອງ, ສືບຕໍ່ກໍ່ສ້າງພະນັກ ງານ ທີ່ພວມປະຈຳຕຳແໜ່ງນຳພາ-ຄຸ້ມຄອງ ແລະ ພະນັກງານສືບທອດປ່ຽນແທນຢູ່ແຕ່ລະຂັ້ນ, ການ ບໍາລຸງ-ສ້າງພະນັກງານໃນເປົ້າໝາຍດັ່ງກ່າວ ຕ້ອງປະຕິບັດຕາມແຜນກຳນົດ-ສ້າງພະນັກງານ, ຕ້ອງສ້າງ ແລະ ປັບປຸງລະບອບເລືອກເຟັ້ນ ແລະ ຊັບຊ້ອນພະນັກງານ ດ້ວຍການວາງລະບຽບ, ກົນໄກ, ມາດຕະຖານ ຕໍ່ພະນັກງານນຳພາຄຸ້ມຄອງແຕ່ລະປະເພດ ໃຫ້ລະອຽດ, ຊັດເຈນ, ຈະແຈ້ງ, ຕອບສະໜອງການເລັ່ງທວງຂອງສະພາບການໃນໄລຍະໃໝ່, ເອົາໃຈໃສ່ປັບປຸງລະບອບນະໂຍບາຍ ແລະ ສະ ຫວັດດີການຕໍ່ພະນັກງານຢ່າງສົມເຫດສົມຜົນ, ຕ້ອງປະຕິບັດລະບອບຄຸ້ມຄອງພະນັກງານ ຢ່າງເຂັ້ມງວດ ເຮັດຢ່າງເປັນລະບົບຕໍ່ເນື່ອງ ນັບແຕ່ການເກັບກຳບັນຊີ, ສະຖິຕິ, ປະຫວັດການເຄື່ອນໄຫວ ແລະ ການປ່ຽນແປງຂອງສະມາຊິກພັກ-ພະນັກງານ ແລະ ລັດຖະກອນ, ປັບປຸງກົງຈັກການຈັດຕັ້ງໃຫ້ເຂັ້ມແຂງ ແລະ ມີປະສິດທິພາບ, ເພີ່ມທະວີການຊີ້ນໍາ, ນໍາພາຂອງພັກຕໍ່ກົງຈັກການຈັດຕັ້ງທີ່ເປັນເສ ນາທິການໃຫ້ຄະນະພັກ ໃນວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວລະບົບການເມືອງຂອງພັກ; ຄະນະພັກທຸກຂັ້ນຕ້ອງເອົາໃຈໃສ່ຈັດຕັ້ງເຊື່ອມຊຶມ, ເຜີຍແຜ່, ປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການປັບປຸງກົງຈັກການຈັດຕັ້ງຂອງບັນດາກະຊວງ-ອົງ ການ ແລະ ທ້ອງຖິ່ນຢ່າງເຂັ້ມງວດ ແລະ ທັນຕາມກໍານົດເວລາ, ສຸມໃສ່ແກ້ໄຂສະພາບຊ້ຳຊ້ອນ ດ້ານພາລະບົດບາດ ແລະ ເຮັດໃຫ້ສາຍໄຍການຈັດຕັ້ງ ມີການກຳນົດພາລະບົດບາດ ທີ່ຈະແຈ້ງ ແລະ ຮັດກຸມ

ຂ່າວ-ພາບ: ນັກຂ່າວ ກໍ່ສ້າງພັກ ຄະນະຈັດຕັ້ງສູນກາງພັກ