ປກສ ເມືອງ ຕົ້ນເຜິ້ງ ຢຶດຢາບ້າ 6 ລ້ານເມັດ ສ່ວນເຈົ້າຂອງເອົາຕົວຫລົບຫນີ
ວັນທີ 25 ຕຸລາ 2021, ເວລາ ປະມານ 2 :14 ໂມງ ປກສ ເມືອງຕົ້ນເຜິ້ງ ແຂວງບໍ່ແກ້ວ ໄດ້ສືບຮູ້ຈະມີການຂົນສົ່ງຢາເສບຕິດຈຳນວນຫລາຍ ຈາກເມືອງຕົ້ນເຜິ້ງ ຫາ ເມືອງຫ້ວຍຊາຍ.
ຈາກນັ້ນ, ຈຶ່ງໄດ້ຈັດຕັ້ງກຳລັງວິຊາສະເພາະລົງສົມທົບກັບ ປກສ – ປກຊ ທີ່ປະຈຳຢູ່ຈຸດກວດທາງເຂົ້າໂຄງການກໍ່ສ້າງສະໜາມບີນ ເຂດບ້ານໃຫຍ່ສີເມືອງງາມ ພົບເຫັນລົດເປົ້າໝາຍ 2 ຄັນ ບໍ່ມີປ້າຍທະບຽນ ລົດຍີຫໍ້ປາຣາໂດ 1 ຄັນ ແລະ ລົດຣີໂວສີຂາວ 1 ຄັນ ແລ່ນອອກຈາກເສັ້ນທາງເວັ້ນສະໝາມບີນເຂດຫາງບ້ານໃຫຍ່ສີເມືອງງາມ ທາງເຈົ້າໜ້າທີ່ຈຶ່ງໄດ້ສະແດງຕົວເພື່ອກວດກາລົດເປົ້າໝາຍດັ່ງກ່າວ ແຕ່ຄັນທີ່ໜຶ່ງຂັບໜີດ້ວຍຄວາມໄວ ໄປທາງເສັ້ນທາງຈາກບ້ານໃຫຍ່ສີເມືອງງາມໄປຫາບ້ານດອນທາດ ແລະ ຄັນທີສອງ ລົດຣີໂວ ໄດ້ຈອດ ຫ່າງຈາກເຈົ້າໜ້າທີ່ 50 – 60 ແມັດ ແລ້ວຜູ້ຂັບລົດໄດ້ລົງລົດແລ່ນໜີເຂົ້າປ່າ ທາງເຈົ້າໜ້າທີ່ໄດ້ແລ່ນນໍາແຕ່ບໍ່ທັນ.
ທາງເຈົ້າຫນ້າທີ່ ປກສ – ປກຊ ເມືອງ ຈຶ່ງໄດ້ສົມທົບກັບພາກສວນທີ່ກ່ຽວຂ້ອງກວດກາລົດຣີໂວທີ່ຈອດປະໃວ້ຄັນດັ່ງກ່າວ ພົບຢາເສບຕິດປະເພດຢາບ້າຈຳນວນ 30 ເປົ໋າ, ມີຢາບ້າທັງໝົດ 6.000.000 ເມັດ, ປັດຈຸບັນເຈົ້າໜ້າທີ່ກຳລັງເລັ່ງຕິດຕາມນຳຈັບຕົວຜູ້ກະທຳຜິດທີ່ເອົາຕົວຫລົບຫນີຢູ່ ມາລົງໂທດຕາມກົດໝາຍ.
ພາບ-ຂ່າວ: ປກສ ເມືອງຕົ້ນເຜິ້ງ
