ທ່ານ ບຸນເຫຼືອ ສິນໄຊວໍຣະວົງ ເຂົ້າຮ່ວມກອງປະຊຸມຮອງລັດຖະມົນຕີ ແລະ ຮອງຜູ້ວ່າການທະນາຄານກາງອາຊຽນ+3
ອາທິດທີ່ຜ່ານມາ, ທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ຜູ້ຊີ້ນຳວຽກງານການຕ່າງປະເທດ, ພ້ອມດ້ວຍຄະນະໄດ້ເຂົ້າຮ່ວມກອງປະຊຸມຮອງລັດຖະມົນຕີ ແລະ ຮອງຜູ້ວ່າການທະນາຄານກາງອາຊຽນ +3 (ແບບທາງໄກ) ໂດຍພາຍໃຕ້ການເປັນປະທານຮ່ວມລະຫວ່າງອົງການຕິດຕາມເສດຖະກິດມະຫາພາກອາຊຽນ +3 (AMRO) ແລະ ປະເທດ ສ. ເກົາຫຼີ.
ກອງປະຊຸມໃນຄັ້ງນີ້ປະກອບດ້ວຍ 2 ກອງປະຊຸມຄື: ກອງປະຊຸມແບບບໍ່ເປັນທາງການ ແລະກອງປະຊຸມແບບເປັນທາງການ, ກອງປະຊຸມດັ່ງກ່າວ,ໄດ້ຮັບຟັງການລາຍງານຕີລາຄາສະພາບການ ແລະ ການຄາດຄະເນການຂະຫຍາຍ ຕົວຂອງເສດຖະກິດມະຫາພາກຂອງພາກພື້ນ ແລະ ສາກົນລວມທັງສປປ ລາວ ໂດຍສະຖາບັນການເງິນສາກົນ ຫຼື (IMF) ແລະ ອົງການຕິດຕາມເສດຖະກິດມະຫາພາກອາຊຽນ +3 ຫຼື (AMRO); ການປະກອບຄໍາຄິດເຫັນຂອງບັນດາປະເທດຕໍ່ສະພາບການ ແລະ ນະໂຍບາຍພັດທະນາເສດຖະກິດຢູ່ພາຍໃນປະເທດ ແລະ ພາກພື້ນ. ໃນປີ 2021 ສະຖາບັນການເງິນສາກົນໄດ້ຄາດຄະເນວ່າເສດຖະກິດໂລກຈະຂະຫຍາຍຕົວຢູ່ໃນລະດັບ 5,9% ແລະ ເສດຖະກິດອາຊີ ຈະຂະຫຍາຍຕົວ 6,5%.
ໃນຂະນະທີ່ອົງການຕິດຕາມເສດຖະກິດມະຫາພາກອາຊຽນ +3 ໄດ້ຄາດຄະເນເສດຖະກິດພາກພື້ນອາຊຽນ ຂະຫຍາຍຕົວໃນລະດັບ 2,7% ແລະ ອັດຕາເງິນເຟີ້ຢູ່ໃນລະດັບ 3 %; ອາຊຽນ+3 ຂະຍາຍຕົວຢູ່ໃນລະດັບ 6,1 %ແລະ ອັດຕາເງິນເຟີ້ຢູ່ໃນລະດັບ 2,4 %; ສໍາລັບເສດຖະກິດສປປ ລາວ ຄາດວ່າຈະຂະຫຍາຍຕົວໃນລະດັບ 2,9 %ແລະ ອັດຕາເງິນເຟີ້ຢູ່ໃນລະດັບ 4 %, ສາເຫດທີ່ເຮັດໃຫ້ມີການປັບການຂະຫຍາຍຕົວຂອງເສດຖະກິດລົງເນື່ອງມາຈາກການລະບາດຂອງພະຍາດໂຄວິດ-19 ທີ່ພວມສືບຕໍ່ແຜ່ລາມເປັນວົງກວ້າງຢູ່ໃນພາກພື້ນ ແລະ ສາກົນ.
ພ້ອມກັນນັ້ນໃນກອງປະຊຸມຍັງໄດ້ຮັບຟັງການລາຍງານ, ປຶກສາຫາລື ແລະ ຮັບຮອງເອົາບັນຫາຈຳນວນໜຶ່ງ ເປັນຕົ້ນ: ການຈັດຕັ້ງປະຕິບັດຂໍ້ລິເລີ່ມຊຽງໃໝ່ເປັນກົນໄກຫຼາຍຝ່າຍ ແລະ ວຽກງານປິ່ນອ້ອມ; ການບໍລິຫານອົງການຕິດຕາມເສດຖະກິດມະຫາພາກອາຊຽນ+ 3 ; ວຽກງານຂໍ້ລິເລີ່ມພັດທະນາຕະຫຼາດພັນທະບັດອາຊີ ແລະ ວຽກງານຂໍ້ລິເລີ່ມບຸລິມະສິດການຮ່ວມມືໃນອະນາຄົດຂອງອາຊຽນ +3.
ໃນໂອກາດທີ່ທ່ານ ບຸນເຫຼືອ ສິນໄຊວໍຣະວົງ ຕາງໜ້າກະຊວງການເງິນມີຄຳເຫັນຕໍ່ກອງປະຊຸມໂດຍເຫັນດີເປັນເອກະພາບຕໍ່ການຕີລາຄາສະພາບເສດຖະກິດ ແລະ ຄາດຄະເນການຂະຫຍາຍຕົວຂອງເສດຖະກິດພາກພື້ນ ແລະ ສາກົນດັ່ງກ່າວ. ສຳລັບສປປ ລາວ ໃນປີ 2021 ກະຊວງການເງິນໄດ້ຖືເອົາການປະຕິຮູບດ້ານການເງິນຮອບດ້ານ ແລະ ດຳເນີນນະໂຍບາຍ, ມາດຕະການຕ່າງໆເປັນຕົ້ນເພີ່ມທະວີການຄຸ້ມຄອງລາຍຮັບ ແລະ ຕ້ານການຮົ່ວໄຫຼຂອງລາຍຮັບງົບປະມານ, ຈໍາກັດລາຍຈ່າຍທີ່ບໍ່ຈໍາເປັນ, ປະຕິບັດມາດຕະການປະຢັດ ແລະ ຕ້ານການຟູມເຟືອຍເພື່ອເຮັດໃຫ້ການຂາດດຸນງົບປະມານຢູ່ໃນຂອບທີ່ກຳນົດ.
ທັງນີ້, ກໍເພື່ອເຮັດເປັນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍ ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນທີ່ພັກ ແລະ ລັດຖະບານວາງອອກ, ຊຶ່ງບັນດານະໂຍບາຍ ແລະ ມາດຕະການຈະມີຜົນເປັນຮູບປະທຳຢ່າງຊັດເຈນໃນຕົ້ນປີ 2022 ເປັນຕົ້ນໄປ. ພ້ອມດຽວກັນນັ້ນ, ໃນດ້ານການບໍລິຫານໜີ້ສິນ, ລັດຖະບານ ກໍ່ຄືກະຊວງການເງິນສາມາດບໍລິຫານໜີ້ສິນໄດ້ຢ່າງເປັນປົກກະຕິ ແລະ ຖ່ວງທັນຕາມກຳນົດເວລາເຖິງແມ່ນວ່າສປປ ລາວຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໜັກໜ່ວງສົມຄວນກໍຕາມ.
