ໂຄລອມເບຍລະດົມເຈົ້າໜ້າທີ່ 500 ຄົນ ບຸກຈັບພໍ່ຄ້າຢາເບີໜຶ່ງສຳເລັດ ໃຫຍ່ສຸດນັບແຕ່ໂຄ່ນ ພາໂບລ ເອັສໂຄບາຣ
ໂຄລອມເບຍບຸກຈັບ ໂອໂຕນຽວ ພໍ່ຄ້າຢາເສບຕິດເບີໃຫຍ່ສຸດຂອງປະເທດ ຄາບ່ອນລີ້ຊ້ອນ ຫລັງຕາມລ່າມາກວ່າ 10 ປີ.
ວັນທີ 24 ຕຸລາ 2021, ສຳນັກຂ່າວບີບີຊີ (BBC) ລາຍງານວ່າ: ທາງການໂຄລອມເບຍໄດ້ເຂົ້າຈັບກຸມ ໄດໂຣ ອັນໂຕນິໂກ ຢູຊູກາ ຫລື ໂອໂຕນຽວ ຫົວໜ້າຂະບວນການຄ້າຢາເສບຕິດໃຫຍ່ທີ່ສຸດໃນປະເທດ ຈາກບ່ອນລີ້ຊ້ອນໃນບໍລິເວນຊາຍແດນໃກ້ປານາມາ.
ປະທານາທິບໍດີ ອິບັນ ດູເກ ມາຣເກດ ຂອງໂຄລອມເບຍ ອອກມາຖະແຫລງເຖິງການຈັບກຸມຄັ້ງນີ້ ພ້ອມຍົກຍ້ອງວ່າເປັນການທຳລາຍແກ້ງຄ້າຢາໃຫຍ່ທີ່ສຸດຂອງສະຕະວັດນີ້ ທຽບເທົ່າກັບການລົ້ມສະຫລາຍຂອງ ພາໂບລ ເອສໂຄບາຣ ພໍ່ຄ້າຢາເສບຕິດລະດັບຕຳນານ ເມື່ອກວ່າ 20 ປີກ່ອນ.
ປະຕິບັດການຄັ້ງນີ້ເປັນການຮ່ວມມືກັນລະຫວ່າງທະຫານບົກ, ທະຫານອາກາດ ແລະ ຕຳຫລວດ ໂດຍມີເຈົ້າໜ້າທີ່ເຂົ້າຮ່ວມ 500 ຄົນ ແລະ ໃຊ້ເຮລິກົບແຕ 22 ລຳ ໂດຍມີໜ່ວຍງານຂອງອາເມລິກາ ແລະ ອັງກິດເຂົ້າຮ່ວມໃນການຫາທີ່ຕັ້ງນຳ ໂດຍຫລັງຈາກປະຕິບັດການສຳເລັດ ມີເຈົ້າໜ້າທີ່ຕຳຫລວດ 1 ຄົນເສຍຊີວິດ.
ຕາມລາຍງານລະບຸວ່າ: ໂອໂຕນຽວ ມັກຈະຍ້າຍບ່ອນລີ້ຊ້ອນໄປເລື້ອຍໆ ສ່ວນຫລາຍແລ້ວເປັນບ່ອນທີ່ຢູ່ຫ່າງໄກ ພ້ອມທັງຫລີກລ່ຽງການໃຊ້ໂທລະສັບ ໂດຍໃຊ້ຄົນສົ່ງຈົດໝາຍໃນການຕິດຕໍ່ສື່ສານແທນ.
ແຕ່ເມື່ອ 2 ອາທິດກ່ອນ ທາງການໂຄລອມເບຍເລີ່ມຈັບການເຄື່ອນໄຫວໄດ້ ໂດຍໃຊ້ຜູ້ຊ່ຽວຊານກວ່າ 50 ຄົນໃນການກວດສອບຜ່ານຮູບຖ່າຍຈາກດາວທຽມ.
ໂອໂຕນຽວ ກ້າວຂຶ້ນມາເປັນຫົວໜ້າຂອງກັລແຄລນ ເຄື່ອນຂ່າຍອາດຊະຍາກຳລະດັບນາໆຊາດ ນັບແຕ່ອ້າຍຂອງລາວທີ່ເປັນອະດີດຫົວໜ້າ ຖືກຕຳຫລວດວິສາມັນຂາດຕະກຳໃນງານສະຫລອງປີໃໝ່ເມື່ອເກືອບ 10 ປີກ່ອນ.
ເຈົ້າໜ້າທີ່ຄາດວ່າ ໂອໂຕນຽວ ມີລູກນ້ອງຢູ່ປະມານ 1.800 ຄົນ ສ່ວນຫລາຍດຶງຕົວມາຈາກກອງກຳລັງເຄິ່ງທະຫານຝ່າຍຂວາຈັດ, ຜ່ານມາເຄີຍມີການຈັບກຸມສະມາຊິກຂອງແກ້ງໄດ້ມາແລ້ວທັງໃນອາເຈນຕິນາ, ບຣາຊິວ, ຮອນດູຣັດ, ເປຣູ ແລະ ສະເປນ.
ນອກຈາກນີ້, ໂອໂຕນຽວ ຍັງຖືກອາເມລິກາຕັ້ງຄ່າຕົວໄວ້ 5 ລ້ານໂດລາສະຫະລັດ ແລະ ຖືກຍື່ນຟ້ອງມາແຕ່ປີ 2009 ຫລັງຈາກນີ້ອາດໄດ້ເຫັນການປາກົດຕົວຂອງລາວໃນສານທີ່ນິວຢອກໄດ້.
ອ້າງອີງ:
https://www.bbc.com/news/world-latin-america-59026214
https://www.aljazeera.com/…/otoniel-colombias-most…
