ເສັ້ນທາງລົດໄຟ ລາວ-ຈີນ ແມ່ນໜຶ່ງໃນຊັບສົມບັດຂອງຊາດ

ໂດຍ: ທິດກໍ່າ

ມາຮອດປັດຈຸບັນນີ້ ໂຄງການກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ ເກືອບສຳເລັດໄປຮ້ອຍເປີເຊັນແລ້ວ, ສ່ວນໜ້າວຽກທີ່ຍັງເຫລືອກໍພຽງແຕ່ວຽກປະດັບປະດາຕາມອາຄານສະຖານທີ່, ປູກຫຍ້າ, ປູກດອກໄມ້ ແລະ ຈັດສັນສິ່ງແວດລ້ອມອ້ອມຂ້າງແຕ່ລະສະຖານນີໃຫ້ມີຄວາມສະອາດ, ສວຍສົດງົດງາມ ແລະ ໂອ້ໂຖງ. ສະເພາະຄວາມພ້ອມພື້ນຖານດ້ານເຕັກນິກວິຊາການຕາມເສັ້ນທາງ ແລະ ດ້ານບຸກຄະລາກອນທີ່ຈະເຮັດໜ້າທີ່ບໍລິການແຕ່ລະໜ່ວຍງານ ເພື່ອບໍລິການຈັດການໃນລົດໄຟ ແລະ ໃນສະຖານນີລົດໄຟນັ້ນກໍຖືວ່າມີຄວາມພ້ອມຮ້ອຍເປີເຊັນແລ້ວ.
ຫລ້າສຸດມາຮອດວັນທີ 16 ຕຸລາ 2021 ຜ່ານມາ, ຂະບວນລົດໄຟຄວາມໄວສູງ ລາວ-ຈີນ ຂະບວນທຳອິດ ຊື່ “ຂະບວນລ້ານຊ້າງ” ກໍໄດ້ເດີນທາງມາເຖິງນະຄອນຫລວງວຽງຈັນ ແລະ ມີການມອບ-ຮັບຢ່າງເປັນທາງການຮຽບຮ້ອຍແລ້ວ. ຄາດວ່າໃນວັນທີ 2 ທັນວາ 2021 ໂອກາດສະຫລອງວັນຊາດຕ້ອງໄດ້ເປີດຮັບໃຊ້ມວນຊົນຢ່າງແນ່ນອນ.
ຄືດັ່ງພວກເຮົາຮູ້ນຳກັນແລ້ວວ່າ, ໂຄງການສ້າງທາງລົດໄຟຄວາມໄວສູງ ລາວ-ຈີນ ແມ່ນໝາກຜົນແຫ່ງການຮ່ວມມືເພື່ອຮ່ວມຊະຕາກຳລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໂດຍລວມ, ທັງແມ່ນໂຄງການທີ່ນອນຢູ່ໃນໜຶ່ງແຖບໜຶ່ງເສັ້ນທາງທີ່ຈະຂະຫຍາຍເຊື່ອມຈອດໄປທົ່ວພາກພື້ນ ແລະ ທົ່ວໂລກຂອງ ສປ ຈີນ.

ແຕ່ແນວໃດກໍຕາມ, ສະເພາະເສັ້ນທາງລົດໄຟຄວາມໄວສູງ ລາວ-ຈີນ ຖືເປັນຊັບສົມບັດອັນລ້ຳຄ່າຂອງຊາດລາວ ແລະ ປະຊາຊົນລາວບັນດາເຜົ່າໃນທົ່ວປະເທດ. ເສັ້ນທາງລົດໄຟສາຍນີ້ເປັນເສັ້ນທາງປະຫວັດສາດຂອງຊາດລາວທີ່ຈະນຳພາບ້ານເມືອງກ້າວສູ່ຄວາມຈະເລີນຮຸ່ງເຮືອງສີວິໄລ, ທັງຈະປະກອບສ່ວນຊ່ວຍຊາດລາວເຮົາຫລຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາໃນອະນາຄົດ.

ເພາະສະນັ້ນ, ສິ່ງທີ່ໜ້າເປັນຫ່ວງ ກໍຄືບັນຫາການຄຸ້ມຄອງ ແລະ ປົກປັກຮັກສາ ເພາະວ່ານັບແຕ່ເລີ່ມມີການກໍ່ສ້າງເປັນຕົ້ນມາຮອດປັດຈຸບັນ ຍັງມີພວກຈັງໄຮພາກັນໄປລັກເອົາຫົວນ໊ອດລາງລົດໄຟ, ໄປລັກຕັດເອົາສາຍໄຟຕາມແລວທາງ ອັນເປັນເຫດໃຫ້ມີປາກົດການຫຍໍ້ທໍ້ຫລາຍຢ່າງຕາມມາ ເຊິ່ງຫລ້າສຸດໄດ້ມີຂ່າວວ່າໃນວັນທີ 17 ຕຸລາ 2021 ຜ່ານມາ ມີຄົນໄປລັກເອົາສາຍໄຟຟ້າທີ່ຢັ່ງໄປຕາມແລວທາງ ເຮັດໃຫ້ໄຟຟ້າຊັອດຕາຍຄາທີ່ໜຶ່ງຄົນ. ນີ້ຖືວ່າເປັນອຸທາຫອນສອນໃຈຢ່າງໃຫຍ່ຫລວງ ຍັງດີແຕ່ຕາຍຄົນດຽວ ແຕ່ຖ້າຫາກໄປລັກເອົານ໊ອດທີ່ຫັນລາງລົດໄຟອອກຫລາຍນ໊ອດ ເວລາລົດໄຟແລ່ນໄປມາດ້ວຍຄວາມໄວເສຍຫລັກກໍເປັນອັນວ່າພາກັນຕາຍເປັນສິບເປັນຮ້ອຍ ກາຍເປັນບັນຫາຂອງຊາດບ້ານເມືອງ.

ເພາະສະນັ້ນ, ເພື່ອເປັນການປົກປັກຮັກສາຊັບສິນລວມໝູ່ ກໍຄືຂອງຊາດ, ທາງບໍລິສັດລົດໄຟ ລາວ-ຈີນ ຈຶ່ງໄດ້ອອກແຈ້ງ 11 ຂໍ້ເຖິງທຸກພາກສ່ວນໃນສັງຄົມ ໂດຍສະເພາະຜູ້ທີ່ຢູ່ໃກ້ແລວທາງຈົ່ງໄດ້ມີສະຕິຢ່າໄປໃກ້ເຂດເພິ່ນຫວງຫ້າມເດັດຂາດ ເພາະຢ້ານໄຟຟ້າຊັອດຕາຍ. ພ້ອມກັນນີ້ ກໍຮຽກຮ້ອງມາຍັງອຳນາດການປົກຄອງທຸກຂັ້ນຈົ່ງໄດ້ກຳຊັບຕັກເຕືອນພົນລະເມືອງຂອງຕົນໃຫ້ຮັບຮູ້ ແລະ ເຂົ້າໃຈຢ່າງທົ່ວເຖິງ ເພາະນັ້ນຄືຊັບສິນຂອງຊາດຢ່າພາກັນໄປທຳລາຍເດັດຂາດ.