ລັດຖະບານໄດ້ອະນຸມັດງົບປະມານ 11,4 ຕື້ກີບເພື່ອກໍາຈັດການແຜ່ລະບາດຂອງຕັກແຕນຢູ່ 5 ແຂວງພາກເໜືອ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ຫລັງຈາກມີການແຜ່ລະບາດຂອງຕັກແຕນຢູ່ 5 ແຂວງພາກເໜືອ, ເຮັດໃຫ້ພື້ນທີ່ການຜະລິດຂອງປະຊາຊົນໄດ້ຮັບຄວາມເສຍຫາຍສົມຄວນ ແລະ ມາຮອດປັດຈຸບັນນີ້ສາມາດສີດຢາເພື່ອກໍາຈັດໂຕອ່ອນຂອງຕັກແຕນທີ່ພວມແຜ່ລະບາດໄດ້ແລ້ວໃນເນື້ອທີ່ປະມານ 1.400 ກວ່າເຮັກຕາທຽບໃສ່ຜ່ານມາເຫັນວ່າການຄວບຄຸມການລະບາດຂອງຕັກແຕນໃນ 5 ແຂວງເນື້ອທີ່ປະມານ 6.200 ກວ່າເຮັກຕາ. ປັດຈຸບັນລັດຖະບານໄດ້ອະນຸມັດງົບປະມານ 11,4 ຕື້ກີບ ເພື່ອນໍາໃຊ້ເຂົ້າໃນວຽກງານດັ່ງກ່າວໃຫ້ມີປະສິດທິຜົນ.

ກະຊວງກະສິກໍາ ແລະ ປ່າໄມ້ ໃຫ້ຮູ້ອີກວ່າ: ມາຮອດປັດຈຸບັນທົ່ວປະເທດສາມາດປັກດໍານາປີຂອງຕົນສໍາເລັດແລ້ວ 571.178 ເຮັກຕາເທົ່າກັບ 70% ຂອງເນື້ອທີ່ແຜນການວາງໄວ້. ສໍາລັບການປູກພືດລະດູຝົນກໍສາມາດບັນລຸໄດ້ແລ້ວ 267.000 ກວ່າເຮັກຕາເທົ່າກັບ 36% ຂອງເນື້ອທີ່ແຜນການວາງໄວ້.