ສ່ວຍສາອາກອນ ປະຈຳແຂວງອັດຕະປືສ້າງແຜນກໍານົດພະນັກງານນໍາພາ-ຄຸ້ມຄອງໄລຍະ 5 ປີ
ໃນວັນທີ 19 ຕຸລາ 2021 ນີ້, ສ່ວຍສາອາກອນ ປະຈຳແຂວງອັດຕະປື, ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງແຕ່ປີ 2021-2025, ຊຶ່ງພິທີໄດ້ຈັດຂຶ້ນທີ່ຫໍປະຊຸມໃຫຍ່ຂອງແຂວງໂດຍການເປັນປະ ທານຂອງທ່ານ ບຸນຍົງ ໄຊຍະແສງ ຄະນະພັກຮາກຖານພະແນກການເງິນແຂວງ, ເລຂາໜ່ວຍພັກ, ຫົວໜ້າສ່ວຍສາອາກອນ ປະຈຳແຂວງອັດຕະປື, ມີທ່ານ ຈິດປະສົງ ສິງສະຫວັດ ກຳມະການພັກແຂວງ ຄະນະກວດກາພັກລັດແຂວງ,ມີບັນດາຮອງຫົວໜ້າພະແນກການເງິນແຂວງ, ຄະນະຈັດຕັ້ງແຂວງພ້ອມດ້ວຍພະນັກງານໃນຂົງເຂດສ່ວຍສາອາ ກອນປະຈຳແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບຸນຍົງ ໄຊຍະແສງ ຄະນະພັກຮາກຖານພະແນກການເງິນແຂວງ, ເລຂາໜ່ວຍພັກ, ຫົວໜ້າສ່ວຍສາອາກອນປະຈຳແຂວງອັດຕະປື, ໄດ້ຜ່ານບົດສະຫລຸບຕີລາຄາການເຄື່ອນໄຫວຈັດຕັ້ງປະຕິບັດແຜນກໍານົດພະນັກງານ ນໍາພາ-ຄຸ້ມຄອງໃນໄລຍະ 5 ປີ (2016-2020) ຊຶ່ງໄດ້ຍົກໃຫ້ເຫັນຜົນສໍາເລັດລວມທັງດ້ານດີ-ດ້ານອ່ອນ ແລະ ບົດຮຽນຖອດຖອນໄດ້, ໃນການຈັດຕັ້ງນໍາພາ-ຄຸ້ມຄອງ, ການຕິດຕາມກວດກາ,ປັບປຸງ,ບໍາລຸງກໍ່ສ້າງ,ຍົກຍ້າຍ, ແຕ່ງ ຕັ້ງ, ບັນຈຸຊັບຊ້ອນພະນັກງານທີ່ນອນໃນແຜນກໍານົດພະນັກງານນໍາພາ-ຄຸ້ມຄອງແຕ່ລະຂະແໜງການ, ເພື່ອແນໃສ່ປັບປຸງໂຄງປະກອບບຸກຄະລາກອນຢູ່ໃນຂົງເຂດສ່ວຍສາອາກອນໃຫ້ມີຄວາມຫນັກແຫນ້ນ, ເຂັ້ມແຂງ ແລະ ສາມາດສັງລວມໄດ້ຕາມເປົ້າໝາຍທີ່ວາງໄວ້.
ພ້ອມກັນນີ້, ຜູ້ເຂົ້າຮ່ວມຍັງໄດ້ຮັບຟັງການເຊື່ອມຊຶມບັນດາເອກະສານສໍາຄັນທີ່ກ່ຽວຂ້ອງເປັນຕົ້ນ: ພາລະບົດບາດສະບັບປັບປຸງໃໝ່ ສະບັບເລກທີ 2058/ກງ, ລົງວັນທີ29 ເມສາ 2021, ແຈ້ງການແນະນຳເພີ່ມຕື່ມຂອງກົມຈັດຕັ້ງ ແລະ ພະນັກງານ ສະບັບເລກທີ 1527/ກງ, ລົງວັນທີ 22 ກັນຍາ 2021, ຄໍາສັ່ງແນະນໍາຂອງຄະນະປະຈໍາພັກແຂວງ ສະບັບເລກທີ 02/ຄປພຂ, ລົງວັນທີ 6 ພຶດສະພາ 2021, ບົດແນະນໍາຂອງຄະນະຈັດຕັ້ງແຂວງ ສະບັບເລກທີ172/ຄຈຂ, ລົງວັນທີ9ມິຖຸນາ2021, ຜ່ານບົດແນະນຳຂອງຄະນະຈັດຕັ້ງແຂວງ ສະບັບເລກທີ 172/ຄຈຂ, ແລະ ຜ່ານມາດຕະຖານລວມຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ 3 ມັງກອນ 2018.
ໃນກອງປະຊຸມບັນດາສະມາຊິກພັກພະນັກງານລັດຖະກອນພາຍໃນຂົງເຂດສ່ວຍສາອາກອນ ປະຈຳແຂວງອັດຕະປື, ໄດ້ປ່ອນບັດທາບທາມຄັດເລືອກບຸກຄະລາກອນນໍາພາ-ຄຸ້ມຄອງໂດຍຜ່ານຮອບ 1, ຮອບ 2 ແລະ ຮອບ 3 ເພື່ອຄັດເລືອກເອົາບຸກຄະລາກອນໄດ້ມາດຕະຖານ ເພື່ອບັນຈຸເຂົ້າແຜນກໍານົດພະນັກງານນໍາພາ-ຄຸ້ມຄອງໃນ 5 ປີຕໍ່ ໜ້າບັນລຸຕາມຄາດໝາຍທີ່ວາງໄວ້.
