ພົບຊາຍນອນເສຍຊີວິດຢູ່ໃກ້ກັບລາງລົດໄຟລາວ-ຈີນ ຈຸດເມືອງນາຊາຍທອງ ຄ້າຍຄືຖືກໄຟໄໝ້ ພ້ອມອຸປະກອນຫລາຍຢ່າງ
ອີງຕາມຂໍ້ມູນຈາກ ລັດວິສາຫະກິດໄຟຟ້າລາວ ແຈ້ງໃຫ້ຮູ້ວ່າ: ເວລາ 11:30 ໂມງ ຂອງວັນທີ 17 ຕຸລາ 2021, ປກສ ກຸ່ມບ້ານແຈ້ງສະຫວ່າງ ໄດ້ຮັບແຈ້ງວ່າ: ເກີດເຫດມີຄົນເສຍຊີວິດ ຢູ່ໃກ້ກັບລາງລົດໄຟ ໃນບໍລິເວນຂອງໂຄງການເສັ້ນທາງລົດໄຟລາວ-ຈີນ ບ້ານແຈ້ງສະຫວ່າງ ເມືອງນາຊາຍທອງ ນະຄອນຫລວງວຽງຈັນ, ຜູ້ເສຍຊີວິດເປັນເພດຊາຍ ຢູ່ບໍລິເວນຕີນຂອງຜູ້ເສຍຊີວິດມີຮອຍໄໝ້ສີດໍາ ຄ້າຍຄືຮອຍຖືກໄຟໄໝ້ ແລະ ຢູ່ໃກ້ກັບຜູ້ເສຍຊີວິດ ເຈົ້າໜ້າທີ່ພົບເຫັນອຸປະກອນປະເພດ ມີດປາຍແຫລມ, ຄັດເຕີ, ເລື່ອຍ, ໄຂຄວງ, ມີດຕັດເລັບ. ພ້ອມດຽວກັນນັ້ນ, ຍັງກວດພົບຮອບສາຍໄຟຟ້າທີ່ຖືກປອກ. ຈາກສະພາບແວດລ້ອມວັດຖຸ ທີ່ພົບເຫັນຢູ່ສະຖານທີ່ເກີດເຫດ ສັນນິຖານໃນເບື້ອງຕົ້ນວ່າຖືກໄຟຟ້າຊ໋ອດ, ເນື່ອງຈາກຜູ້ກ່ຽວ ໄດ້ພະຍາຍາມຈະລັກຕັດເອົາສາຍໄຟຟ້າທີ່ນຳໃຊ້ໃນໂຄງການດັ່ງກ່າວ ຈຶ່ງເຮັດໃຫ້ເກີດໄຟຟ້າຊ໋ອດ ແລະ ເສຍຊີວິດຄາທີ່.
ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ເສຍຊີວິດ ຊື່ ທ້າວ ສີ ອາຍຸ 27 ປີ ປະຊາຊົນບ້ານ ນາປ່າໄພ ເມືອງໝື່ນ ແຂວງວຽງຈັນ ອາຊີບກຳມະກອນ.
ຕໍ່ບັນຫາດັ່ງກ່າວນີ້ສະແດງເຖິງການລັກອຸປະກອນໄຟຟ້າ ເຊິ່ງມີຄວາມຜິດທາງກົດໝາຍ ແລະ ຈະເປັນອັນຕະລາຍເຖິງຊີວິດໄດ້.
