ປກສ ເມືອງນາໝໍ້ຈັບໄວລຸ້ນແກວ່ງກ້ອນຫີນໃສ່ລົດໃຫຍ່
ເມື່ອບໍ່ດົນມານີ້, ເຈົ້າໜ້າທີ່ ປກສ ເມືອງນາໝໍ້ແຂວງອຸດົມໄຊ, ໄດ້ຈັບຕົວທ້າວ ບຸນຢືນ ອາຍຸ 19 ປີ, ທ້າວ ສົມ ອາຍຸ 18 ປີ, ທ້າວ ບຸນມີ (ໂງກ) ອາຍຸ 19 ປີ, ທ້າວ ບຸນມີ ອາຍຸ 18 ປີ ແລະ ທ້າວ ຄຳ ອາຍຸ 18 ປີທັງໝົດ ຢູ່ບ້ານນາໝໍ້ເໜືອເມືອງນາໝໍ້ແຂວງອຸດົມໄຊ ມາດໍາເນີນຄະດີຕາມລະບຽບກົດໝາຍ, ພາຍຫລັງຮ່ວມກັນກໍເຫດແກວ່ງກ້ອນຫີນໃສ່ລົດໃຫຍ່ທີ່ແລ່ນຜ່ານໃນເສັ້ນທາງລະຫວ່າງເມືອງນາໝໍ້ຫາດ່ານພູຫລັກຄໍາຊາຍແດນຈີນ, ຊຶ່ງມີລົດໃຫຍ່ 3 ຄັນໄດ້ຮັບຜົນເສຍຫາຍ (ແວ່ນລົດແຕກ) ແລະ ມີຜູ້ບາດເຈັບໜຶ່ງຄົນ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກຜູ້ເສຍຫາຍວ່າມີຄົນບໍ່ດີຈໍານວນໜຶ່ງໄດ້ແກ່ວງກ້ອນຫີນໃສ່ແວ່ນດ້ານໜ້າລົດໃຫຍ່ ແລະ ມີຜູ້ໄດ້ຮັບບາດເຈັບ, ກໍໄດ້ຮີບຮ້ອນຈັດກຳລັງລົງກວດກາສະຖານທີ່, ພ້ອມຂຶ້ນເປົ້າໝາຍຕິດຕາມກຸ່ມຄົນບໍ່ດີດັ່ງກ່າວ ແລະ ຕໍ່ມາບໍ່ດົນກໍສາມາດຈັບຕົວຜູ້ກໍ່ເຫດຄືດັ່ງກ່າວມາດໍາເນີນຄະດີຕາມລະບຽບກົດໝາຍໄດ້ ແລະ ຜ່ານການສືບສວນ-ສອບສວນຂອງເຈົ້າໜ້າທີ່ພວກເຂົາຮັບສາລະພາບວ່າ: ໄດ້ຮ່ວມກັນລົງມືແກ່ວງກ້ອນຫີນໃສ່ລົດໃຫຍ່ແທ້ ເນື່ອງຈາກເກີດຄວາມລໍາຄານ ທີ່ລົດໃຫຍ່ແລ່ນຜ່ານໃນຍາມຄໍ່າຄືນໄດ້ເປີດຕາໄຟສູງໃສ່ເຮັດໃຫ້ເຫລື້ອຕາຈຶ່ງພາກັນຈັບກ້ອນຫີນແກວ່ງໃສ່ລົດດັ່ງກ່າວແລ້ວພາກັນເອົາຕົວຫລົບໜີ ແລະ ມື້ຕໍ່ມາກໍຖືກຈັບຕົວມາດໍາເນິນຄະດີ ແລະ ໃນມື້ກໍ່ເຫດພວກຕົນກໍຢູ່ໃນອາການມືນເມົາສົມຄວນຍ້ອນພາກັນອອກມາຈາກຮ້ານອາຫານແຫ່ງໜຶ່ງຢູ່ໃກ້ຄຽງຈຸດກໍ່ເຫດ.
