ເປັນຫ່ວງຂີ້ເຫຍື້ອຍາມຝົນ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ຫລາຍທ່ານອາດມີຄວາມຮູ້ສຶກດັ່ງຂ້າພະເຈົ້າຜູ້ຂຽນຄໍລຳນີ້ ບໍ່ຮູ້ວ່າດ້ວຍເຫດຜົນໃດ ການແກ້ໄຂ ແລະ ການເກັບມ້ຽນຂີ້ເຫຍື້ອຢູ່ນະຄອນຫລວງວຽງຈັນເຮົາຈຶ່ງເປັນບັນຫາເຮັດໄດ້ຍາກ ຄືຢູ່ແຕ່ລະສາຍທາງຈະມີລົດອອກເກັບມ້ຽນຂີ້ເຫຍື້ອພຽງອາທິດລະຄັ້ງ ຈຶ່ງເຮັດໃຫ້ມີສະພາບຂີ້ເຫຍື້ອຈາກເຮືອນຊານປະຊາຊົນອັ່ງຂັງໄວ້ເປັນຈຳນວນຫລາຍ ແລະ ເມື່ອເປັນແນວນັ້ນ ກໍສົ່ງຜົນໃຫ້ເກີດກິ່ນເໝັນເໜົ່າຫລາຍຂຶ້ນ ສ້າງພາບພົດບໍ່ດີໃຫ້ແກ່ສະພາບແວດລ້ອມໃນຕົວເມືອງເປັນຈຳນວນບໍ່ໜ້ອຍ ໂດຍສະເພາະຍາມຝົນນີ້ຍິ່ງຮ້າຍແຮງ ເຊິ່ງຜ່ານມາພາກສ່ວນເກັບມ້ຽນຂີ້ເຫຍື້ອໃນຕົວເມືອງອ້າງວ່າຂາດເຂີນພາຫະນະ ແລະ ສ່ວນໜຶ່ງໄດ້ມອບໃຫ້ຝ່າຍເອກະຊົນເປັນຜູ້ຮັບຜິດຊອບ ໂດຍໄດ້ເຮັດສັນຍາເກັບຄ່າຂີ້ເຫຍື້ອເປັນແຕ່ລະເຂັງນຳຄອບຄົວປະຊາຊົນ, ແຕ່ເຖິງປານນັ້ນກໍເຮັດໄດ້ເປັນພຽງອາທິດລະຄັ້ງໃນການອອກເກັບມ້ຽນຂີ້ເຫຍື້ອຕາມຈຸດຕ່າງໆ ເຊິ່ງເປັນໄລຍະຍາວເກີນໄປຕໍ່ການເກັບມ້ຽນຂີ້ເຫຍື້ອໃນຕົວເມືອງ, ຖ້າຄືປະເທດເພິ່ນພັດທະນາແລ້ວ ສິ່ງດັ່ງກ່າວເພິ່ນຈະເຮັດເປັນແຕ່ລະມື້ຢ່າງບໍ່ຂາດ ຈຶ່ງຈະເຮັດໃຫ້ຕົວເມືອງມີຄວາມສະອາດຈົບງາມ ແລະ ປະເທດເຮົາເດ ? ໂດຍສະເພາະນະຄອນຫລວງວຽງຈັນຈະມີວິທີການແນວໃດເພື່ອການຈັດເກັບຂີ້ເຫຍື້ອໃຫ້ຖີ່ຂຶ້ນ ຢ່າງໜ້ອຍອາທິດລະ 2-3 ຄັ້ງ ແມ່ນເປັນການດີທີ່ສຸດ ເພື່ອຮັບປະກັນໃຫ້ ສ.ສະອາດ ຂອງນະຄອນຫລວງວຽງຈັນປາກົດຜົນເປັນຈິງຫລາຍຂຶ້ນ, ສ້າງໂສມໜ້າໃໝ່ຂອງຕົວເມືອງໃຫ້ນັບມື້ສະອາດຈົບງາມ ແລະ ສີວິໄລ.
