ແຂວງ ບໍ່ແກ້ວ ຈູດທຳລາຍຢາບ້າ 13.624.983 ເມັດ ແລະ ຢາເສບຕິດປະເພດອື່ນໆອີກຫລາຍລາຍການ.

ວັນທີ 15 ຕຸລາ 2021ນີ້ ທີ່ສະໜາມບິນ ຫ້ວຍຊາຍ ເມືອງຫ້ວຍຊາຍ ແຂວງບໍ່ແກ້ວ ໄດ້ມີພິທີສະເຫລີມສະຫລອງ ວັນຕ້ານຢາເສບຕິດແຫ່ງຊາດຄົບຮອບ 20 ປີ ແລະ ຈັດພິທີທໍາລາຍຢາເສບຕິດຈຳນວນທີ່ສານໄດ້ຕັດສິນຄະດີສີ້ນສຸດແລ້ວ. ໂດຍການເຂົ້າຮ່ວມ ຂອງ ທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ປະທານຄະນະກຳມະການກວດກາແລະ ຄວບຄຸມ ຢາເສບຕິດ ຂັ້ນແຂວງ, ມີການນຳຂັ້ນແຂວງ,ການນຳຂັ້ນເມືອງ, ແຂກຖືກເຊີນ, ພະນັກງານ,ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ອຳນາດການປົກຄອງບ້ານເຂົ້າຮ່ວມ.

ທ່ານ ພັນໂທ ຈັນພອນເພັດ ຄໍາສີ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ໃຫ້ຮູ້ວ່າ: ໃນ 1 ປີ ຜ່ານມາ, ເຈົ້າໜ້າທີ ແຂວງ ບໍ່ແກ້ວ ສາມາດມ້າງຄະດີຢາເສບຕິດໄດ້ທັງໝົດ 338 ເລື່ອງ, ກັກຜູ້ຖືກຫາໄດ້ທັງໝົດ 393 ຄົນ, ຍິງ 35 ຄົນ, ຕ່າງ ປະເທດ 67 ຄົນ ( ຄົນຈີນ 29 ຄົນ, ມຽນມາ 36 ຄົນ, ໄທ 1 ຄົນ ແລະ ຄົນຫວຽດນາມ 1 ຄົນ ) ຢຶດຂອງກາງຢາເສບຕິດປະເພດຕ່າງໆຄື: ຢາບ້າຈຳນວນ 23.151.807 ເມັດ ໜັກ 2.315 ກິໂລ, ຢາໄອ່ 866 ກິໂລ, ເຮໂລອີນ 156 ແທ່ງໜັກ 60 ກິໂລ, ແປ້ງຝຸ່ນ 16.250 ກິໂລ, ຝືນ 700 ກະລາມ, ປືນສັ້ນ 03 ກະບອກພ້ອມລູກ 22 ລູກ, ລົດໃຫຍ່ 11 ຄົນ, ລົດຈັກ 25 ຄັນ ແລະ ວັດຖຸເຄື່ອງຂອງອີກຈຳນວນຫລາຍລາຍການ ແລະ ລົງທຳລາຍສວນຝິ່ນໄດ້ 24 ເຮັກຕາ.

ພ້ອມທັງລົງໂຄສະນາຜົນຮ້າຍ, ໄພອັນຕະລາຍຂອງຢາເສບຕິດຢູ່ໂຮງຮຽນ ຢູ່ຕາມບ້ານ ມີຜູ້ເຂົ້າຮ່ວມທັງໝົດ 1.559 ຄົນ, ຍິງ 494 ຄົນ ບຳບັດປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດຢູ່ສູນບຳບັດນ້ຳຈ້ວມໄດ້ຈໍານວນ 155 ຄົນ, ຍິງ 6 ຄົນ.

ການຈູດທຳລາຍຢາເສບຕິດປະເພດຕ່າງໆຄັ້ງນີ້ແມ່ນສານໄດ້ຕັດສີນຄະດີສິ້ນສຸດແລ້ວ ແລະ ມີຂໍ້ຕົກລົງໃຫ້ທຳລາຍຖີ້ມປະກອບມີ: ຢາບ້າ 13.624.983 ເມັດໜັກ 1.362 ກິໂລ, ຢາໄອ້ 534 ຫໍ່ໜັກ 534 ກິໂລ, ເຮໂລອິນ 156 ແຫ່ງໜັກ 60 ກິໂລ, ແປ້ງຝຸ່ນ 158 ເປົ້າໜັກ 3.950 ກິໂລ, ໂຄເຄນ 2 ຖົງນ້ອຍໜັກ 0,44 ກະລາມ,  ກັນຊາແຫ້ງ 1 ຖົງນ້ອຍໜັກ 8,6 ກະລາມ, ເຟຕິມີນ 44 ເມັດໜັກ 13,2 ກະລາມ, ແລະ ຢາອີ 2 ຖົງນ້ອຍໜັກ 2,619 ກະລາມ .