ການສັກວັກຊີນແມ່ນການສ້າງພູມຕ້ານທານໃຫ້ກັບຮ່າງກາຍ ຫລຸດຄວາມຮຸນແຮງເມື່ອຕິດເຊື້ອ ບໍ່ແມ່ນສັກເພື່ອໃຫ້ຄົນປະໝາດ

ທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ຊີແຈງຕໍ່ສັງຄົມໃນໂອກາດຖະແຫລງຂ່າວປະຈຳວັນທີ ວັນທີ 8 ຕຸລາ 2021 ຜ່ານມານີ້ວ່າ: ການສັກວັກຊີນກັນພະຍາດໂຄວິດ-19 ມັນບໍ່ໄດ້ປ້ອງກັນການຕິດເຊື້ອຂອງພະຍາດໂຄວິດໄດ້ 100% ໝາຍຄວາມວ່າຖ້າພວກເຮົາບໍ່ມີມາດຕະການໃນການປ້ອງກັນແມ່ນມີຄວາມສາມາດຕິດເຊື້ອໄດ້ ແຕ່ຖ້າໄດ້ສັກວັກຊີນ ແມ່ນພວກເຮົາຈະສ້າງພູມຕ້ານທານໃຫ້ກັບຮ່າງກາຍຫຼຸດຜ່ອນຄວາມຮຸນແຮງໃນການເຈັບເປັນ ແລະ ການເສຍຊີວິດຂອງພະຍາດດັ່ງກ່າວໄດ້ ເພາະສະນັ້ນ ຢາກໃຫ້ປະຊາຊົນເຂົ້າໃຈວ່າ ການສັກວັກຊີນກັນພະຍາດໂຄວິດນີ້ ແມ່ນການສ້າງພູມຕ້ານທານໃຫ້ກັບຮ່າງກາຍ ບໍ່ແມ່ນການປ້ອງກັນການຕິດເຊື້ອ ສະນັ້ນການປ້ອງກັນການຕິດເຊື້ອ ພວກເຮົາມີຄວາມຈຳເປັນທີ່ຕ້ອງໄດ້ໃຊ້ຜ້າອັດປາກ-ດັງ, ລ້າງມືທຸກຄັ້ງ, ຈຳກັດໄລຍະຫ່າງໃຫ້ມັນໄດ້ ພວກເຮົາຈຶ່ງປາສະຈາກການຕິດເຊື້ອໄດ້ ນັ້ນແມ່ນສິ່ງທີ່ສຳຄັນ ເພາະສະນັ້ນ ການສັກວັກຊິນນີ້ເປັນວິທີທີ່ປ້ອງກັນໄດ້ດີທີ່ສຸດ ຄືກັນກັບຫຼາຍໆປະເທດທີ່ໄດ້ຮັບຜົນສຳເລັດມາແລ້ວ, ຜູ້ທີ່ສັກວັກຊີນແລ້ວຍັງຕິດເຊື້ອໄດ້ສ່ວນໜຶ່ງແມ່ນຂຶ້ນກັບພູມຕ້ານທານຂອງແຕ່ລະຄົນ ແຕ່ການຕິດເຊື້ອແມ່ນບໍ່ມີອາການຮຸນແຮງ ແລະ ບໍ່ມີການເສຍຊີວິດ ນີ້ຄືຜົນດີຂອງການສັກວັກຊິນ.

ຮຽກຮ້ອງມາຍັງປະຊາຊົນ ໂດຍສະເພາະກຸ່ມຜູ້ສູງອາຍຸ ແລະ ກຸ່ມຜູ້ທີ່ມີພະຍາດປະຈຳຕົວ ບໍ່ໃຫ້ລັງເລ ໃນສະພາບປັດຈຸບັນ ສປປ ລາວ ສັກວັກຊີນໄດ້ 5 ລ້ານກວ່າຄົນແລ້ວ (ລວມການສັກວັກຊີນທັງເຂັມ 1 ແລະ ເຂັມ 2 ), ຜ່ານມາບໍ່ມີໃຜທີ່ເສຍຊີວິດຍ້ອນການສັກວັກຊີນ ເພາະສະນັ້ນ ຈຶ່ງຢາກໃຫ້ບັນດາທ່ານທີ່ຢູ່ໃນກຸ່ມສ່ຽງ ຊຶ່ງໃນ 22 ຄົນທີ່ເສຍຊີວິດຜ່ານມາແມ່ນຍ້ອນອາຍຸສູງ ແລະ ມີພະຍາດປະຈຳຕົວ ບໍ່ໄດ້ຮັບການສັກວັກຊີນ.

ດັ່ງນັ້ນ, ຈຶ່ງຮຽກຮ້ອງໃຫ້ບັນດາທ່ານຜູ້ທີ່ມີພະຍາດປະຈຳຕົວ ແລະ ຜູ້ສູງອາຍຸຄວນໄດ້ເຂົ້າເຖິງການສັກວັກຊິນໃຫ້ມັນໄດ້ ເນື່ອງຈາກປັດຈຸບັນຕາໜ່າງການສັກວັກຊີນແມ່ນມີຢູ່ຂັ້ນໂຮງໝໍເມືອງໄປຈົນຮອດໂຮງໝໍສູນກາງແມ່ນໄດ້ມີການບໍລິການ, ໂດຍສະເພາະໃນໄຕມາດທີ 4 ນີ້ ພວກເຮົາຍັງສືບຕໍ່ລະດົມເອົາວັກຊີນເຂົ້າມາບໍລິການສັກໃຫ້ກັບປະຊາຊົນ ໃຫ້ມັນໄດ້ຫຼາຍເທົ່າທີ່ຈະຫຼາຍໄດ້ ຊຶ່ງເຂັມທີ 1 ກວມໄດ້ 41% ຄາດໝາຍຂອງລັດຖະບານຈະໃຫ້ມັນໄດ້ຫຼາຍກວ່າ 50% ສະນັ້ນໃນອາທິດທີ່ຈະມາເຖິງນີ້ພວກເຮົາຈະມີວັກຊີນເຂົ້າມາ 1.500.000 ໂດສ.

ເພາະສະນັ້ນຮຽກຮ້ອງມາຍັງປະຊາຊົນໂດຍສະເພາະຜູ້ເປັນລູກ ເປັນຫຼານໃຫ້ນໍາເອົາຜູ້ສູງອາຍຸ ຜູ້ທີ່ມີພະຍາດປະຈຳຕົວໄປຮັບການສັກວັກຊີນໄວເທົ່າທີ່ຈະໄວໄດ້ ບໍ່ໃຫ້ລັງເລນໍາຜົນຂ້າງຄຽງຂອງການສັກວັກຊີນ ຊຶ່ງພວກເຮົາໄດ້ມີລະບົບການຕິດຕາມປະຕິປັກທີ່ເກີດຂຶ້ນພາຍຫຼັງການສັກວັກຊີນ ບໍ່ໃຫ້ປະຊາຊົນຢ້ານຕໍ່ເຫດການຜົນຂ້າງຄຽງທີ່ເກີດຂຶ້ນ ໃຫ້ຢ້ານວ່າເຮົາຈະເສຍຊີວິດຍ້ອນການຕິດພະຍາດຫຼາຍກ່ອນ. ຮຽກຮ້ອງມາຍັງປະຊາຊົນໃຫ້ໄດ້ເອົາໃຈໃສ່ນໍາເອົາຜູ້ສູງອາຍຸ ແລະ ຜູ້ມີພະຍາດປະຈຳຕົວໄປຮັບວັກຊິນໃຫ້ໄດ້ໄວທີ່ສຸດ.