ອັງກິດຖອດ 47 ປະເທດ-ດິນແດນ ອອກຈາກ “ບັນຊີແດງ” ສາມາດເດີນທາງເຂົ້າປະເທດໂດຍບໍ່ຕ້ອງກັກຕົວ
ລັດຖະບານອັງກິດເປີດເຜີຍວ່າ: ໄດ້ຖອດລາຍຊື່ປະເທດໃນບັນຊີແດງຈາກ 54 ປະເທດ ເຫລືອພຽງ 7 ປະເທດ ສົ່ງຜົນໃຫ້ພົນລະເມືອງຈາກປະເທດເຫລົ່ານີ້ ສາມາດເດີນທາງເຂົ້າອັງກິດໄດ້ໂດຍບໍ່ຕ້ອງກັກຕົວ ຖ້າໄດ້ຮັບວັກຊີນຄົບໂດສຈາກ 4 ຍີ່ຫໍ້ຫລັກ ເຊິ່ງຖືເປັນບາດກ້າວສຳຄັນໃນການເປີດປະເທດຮັບການທ່ອງທ່ຽວຫລັງພະຍາດລະບາດ.
ເມື່ອກ່ອນອັງກິດອອກກົດໃຫ້ປະຊາຊົນທີ່ເດີນທາງຈາກປະເທດໃນບັນຊີແດງໃນຮອບ 10 ວັນ ຕ້ອງກັກຕົວໃນໂຮງແຮມເປັນເວລາ 10 ວັນ ໂດຍເສຍຄ່າໃຊ້ຈ່າຍເອງ ເພື່ອປ້ອງກັນການລະບາດຂອງໂຄວິດຈາກຕ່າງປະເທດ, ແຕ່ ແກຣນ ແຊບ ລັດຖະມົນຕີກະຊວງຄົມມະນາຄົມຂອງອັງກິດ ເປີດເຜີຍວ່າ: ການປ່ຽນແປງລາຍຊື່ປະເທດຄັ້ງນີ້ຈະເລີ່ມມີຜົນບັງຄັບໃຊ້ໃນວັນທີ 11 ຕຸລານີ້.
ສຳລັບ 7 ປະເທດທີ່ຢູ່ໃນບັນຊີແດງຂອງອັງກິດເວລານີ້ ປະກອບມີ: ປານາມາ, ໂຄລອມເບຍ, ເວເນຊູເອລາ, ເປຣູ, ເອກົວດໍ, ເຮຕິ ແລະ ສາທາລະນະລັດໂດມິນິກັນ.
ທ່ານ ແຊບ ລະບຸວ່າ: ການປ່ຽນແປງບັນຊີລາຍຊື່ຄັ້ງນີ້ຈະຊ່ວຍໃຫ້ຫລາຍຄອບຄົວທີ່ຕ້ອງແຍກກັນຢູ່ສາມາດພົບໜ້າ ແລະ ຢູ່ພ້ອມໜ້າກັນອີກ.
ທ່ານກ່າວອີກວ່າ: ການຫລຸດຜ່ອນຂໍ້ຈຳກັດຈະເຮັດໃຫ້ຄົນສາມາດເດີນທາງໄດ້ຫລາຍຂຶ້ນ.
ເຖິງຢ່າງໃດກໍຕາມ, ມີຂໍ້ກຳນົດຈາກກະຊວງຄົມມະນາຄົມວ່າ: ຜູ້ທີ່ເດີນທາງເຂົ້າອັງກິດຈາກປະເທດທີ່ບໍ່ໄດ້ຢູ່ໃນບັນຊີແດງຕ້ອງສັກວັກຊີນຄົບໂດສຈາກຍີ່ຫໍ້ທີ່ກຳນົດ ແລະ ກວດຫາເຊື້ອຫລັງເດີນທາງເຖິງອັງກິດ 2 ວັນ.
ອ້າງອີງ:
