ບໍລິສັດຟິນເທັກໃນອິນເດຍ ສະເໜີໃຫ້ເຮັດວຽກພຽງ 3 ວັນຕໍ່ອາທິດ ພະນັກງານເອົາເວລາທີ່ເຫລືອ ໄປຮັບຟຣີແລນໄດ້
“ນີ້ຄືອະນາຄົດຂອງການເຮັດວຽກ ຄົນໃນຍຸກນີ້ບໍ່ໄດ້ຕ້ອງການຜູກມັດຢູ່ກັບວຽກວຽກດຽວຕະຫລອດໄປ” ເຈົ້າຂອງຟິນເທັກລາຍນີ້ ກ່າວ.
ເມື່ອເວົ້າເລື່ອງ Future of work ຫລື ອະນາຄົດຂອງການເຮັດວຽກ ເຮົາຈະໄດ້ຍິນແນວຄິດເລື່ອງການເຮັດວຽກ 4 ວັນຕໍ່ອາທິດ ກໍຖືວ່າດີແລ້ວ, ແຕ່ຫລ້າສຸດ Slice ບໍລິສັດຟິນເທັກ (FinTech) ຕັ້ງຢູ່ເມືອງບັງກາລໍ ປະເທດອິນເດຍ ສະເໜີແນວຄິດໃຫ້ເຮັດວຽກພຽງ 3 ວັນຕໍ່ອາທິດ, ແຕ່ມີເງື່ອນໄຂວ່າ: ພະນັກງານຈະໄດ້ຮັບເງິນເດືອນພຽງ 80% ຈາກລາຄາຕະຫລາດເທົ່ານັ້ນ, ສ່ວນດ້ານສະຫວັດດີການ ແລະ ຜົນປະໂຫຍດທຸກຢ່າງ ຈະໄດ້ຮັບເທົ່າກັນກັບພະນັກງານປະຈຳຄົນອື່ນໆທຸກປະການ.
ໂດຍຕຳແໜ່ງວຽກທີ່ຕ້ອງການຄື: ວິສະວະກອນໄອທີ (engineers), ຜູ້ຈັດການຜະລິດຕະພັນ (product managers) ແລະ ນັກອອກແບບ (designer) ເພື່ອມາຮ່ວມເຮັດໂຄງການໃໝ່ເຊັ່ນ: Cryptocurrency ຫລື ສະກຸນເງິນດິຈີຕອນ.
Rajan Bajaj ຜູ້ສ້າງຕັ້ງບໍລິສັດ Slice ບອກເຖິງເຫດຜົນເບື້ອງຫລັງນະໂຍບາຍເຮັດວຽກ 3 ວັນວ່າ: “ນີ້ຄືອະນາຄົດຂອງການເຮັດວຽກ ຄົນໃນຍຸກນີ້ບໍ່ໄດ້ຕ້ອງການຜູກມັດກັບວຽກວຽກດຽວຕະຫລອດໄປ”.
ຜູ້ສ້າງຕັ້ງບໍລິສັດ Slice ບອກອີກວ່າ: ກົນລະຍຸດແບບນີ້ Win-Win ເພາະບໍລິສັດຕ້ອງການດຶງດູດຄົນເກັ່ງໆມາເຮັດວຽກນຳ, ສ່ວນພະນັກງານກໍເຮັດວຽກໄດ້ເງິນ, ມີສະຫວັດດີການຈາກບໍລິສັດຮອງຮັບ, ແຕ່ມີອິດສະຫລະເພີ່ມຂຶ້ນ ແລະ ຍັງມີເວລາເຫລືອໄປເຮັດແນວອື່ນໃນຊີວິດໄດ້.
ພະນັກງານຈະມີເວລາໄປເຮັດໃນສິ່ງທີ່ຮັກຫລາຍຂຶ້ນ ບາງຄົນຢາກໃຊ້ເວລາເພື່ອເຮັດຕາມ passion ຫລື ບາງຄົນອາດຈະເອົາເວລາໄປຮັບງານຟຣີແລນເພີ່ມກໍໄດ້ບໍລິສັດບໍ່ໄດ້ຫ້າມ.
ເຖິງຢ່າງໃດກໍຕາມ, ຟິນເທັກອິນເດຍ ປັດຈຸບັນມີພະນັກງານທັງໝົດ 450 ຄົນ, ແຕ່ຫລັງຈາກປະກາດນະໂຍບາຍເຮັດວຽກ 3 ວັນຕໍ່ອາທິດອອກໄປ ທາງບໍລິສັດຄາດຫວັງວ່າຈະດຶງດູດຄົນເກັ່ງໆເຂົ້າມາເປັນພະນັກງານໄດ້ອີກ 1.000 ກວ່າຄົນ.
ນີ້ຄືແນວຄິດໃໝ່ທີ່ກຳລັງເກີດຂຶ້ນໃນໂລກອະນາຄົດຂອງການເຮັດວຽກ, ຜູ້ສ້າງຕັ້ງຟິນເທັກອິນເດຍຄົນນີ້ບອກວ່າ: ນະໂຍບາຍເຮັດວຽກ 3 ວັນຕໍ່ອາທິດ ຈະເຮັດໃຫ້ເຮົາໄດ້ຄົນເກັ່ງໆມາເຮັດວຽກນຳ ແລະ ສຳຄັນນີ້ເປັນນະໂຍບາຍທີ່ບໍລິສັດເຕັກໂນໂລຊີລາຍໃຫຍ່ຄື Google ຫລື Amazon ກໍເຮັດບໍ່ໄດ້.
ອ້າງອີງ:
https://code-in-3.sliceit.com/
https://www.bloomberg.com/…/a-three-day-work-week-one…
https://economictimes.indiatimes.com/…/art…/86757433.cms
