ນ້ອມຈົດຈຳລໍ້າລຶກບຸນຄຸນຂອງຄູ

ໂດຍ: ທິດກໍ່າ

ວັນທີ 7 ຕຸລາ 2021 ນີ້ ເປັນວັນຄູແຫ່ງຊາດ. ຕໍ່ກັບວັນປະຫວັດສາດດັ່ງກ່າວ ຫລາຍທ່ານຫລາຍສະຫາຍຍັງບໍ່ທັນເຂົ້າໃຈຢ່າງເລິກເຊິ່ງວ່າຕົ້ນເຫດທີ່ໄປທີ່ມາຂອງວັນຄູແຫ່ງຊາດນັ້ນເປັນແນວໃດ, ມາຈາກໃສ. ເວົ້າແຈ້ງແມ່ນທາງພັກ ແລະ ລັດຖະບານເຮົາໄດ້ກຳນົດເອົາມື້ທີ່ນາຍຄູຄຳ ເຊິ່ງເປັນຄົນລາວຜູ້ທຳອິດທີ່ໄດ້ເປັນຄູສອນ ແລະ ໄດ້ເລີ່ມເຮັດວຽກສິດສອນໃນຍຸກຈັກກະພັດຝຣັ່ງປົກຄອງລາວ ໃນວັນທີ 7 ຕຸລາ 1909. ສຳລັບໂຮງຮຽນທີ່ເພິ່ນໄດ້ເຂົ້າສິດສອນໃນມື້ທຳອິດມີຊື່ວ່າ: “ຕາຟໍແຣງ” (Taforing) ທີ່ຕັ້ງຢູ່ບ້ານອານຸ ເຊິ່ງປັດຈຸບັນໄດ້ກາຍເປັນໂຮງຮຽນປະຖົມມັດທະຍົມສົມບູນອານຸ ທາງທິດເໜືອສະໜາມກິລາເຈົ້າອານຸວົງນັ້ນເອງ. ພາຍຫລັງນາຍຄູຄຳໄດ້ເຮັດໜ້າທີ່ສິດສອນມາເປັນເວລາຫລາຍປີ ຈຶ່ງໄດ້ເຫັນທາດແທ້ການກົດຂີ່ຂູດຮີດຂອງພວກຈັກກະພັດຝຣັ່ງທີ່ມີຕໍ່ຄົນລາວຢ່າງປ່າເຖື່ອນຫລາຍອັນ ຈຶ່ງມີແນວຄິດຕໍ່ຕ້ານ ແລະ ກາຍເປັນຜູ້ນຳພາຂະບວນການຄົນລາວທີ່ຮັກຊາດຢູ່ນະຄອນຫລວງວຽງຈັນ ທຳການປະທ້ວງຕໍ່ສູ້ກັບພວກຈັກກະພັດຝຣັ່ງ, ແຕ່ສຸດທ້າຍກໍຖືກປາບປາມຈຶ່ງໜີຂ້າມຂອງໄປອາໄສຢູ່ນຳພີ່ນ້ອງຢູ່ຝຣັ່ງໄທ ຕໍ່ມາບໍ່ພໍເທົ່າໃດປີ ທ່ານກໍໄດ້ເສຍຊີວິດຢູ່ທີ່ນັ້ນ. ນີ້ຄືປະຫວັດສາດທີ່ໄດ້ຈາລຶກໄວ້ມາຮອດເຊັ່ນລູກເຊັ່ນຫລານພວກເຮົາເຈົ້າຂ້ອຍຈົນຜອງເທົ່າທຸກວັນນີ້.

ເພາະສະນັ້ນ, ວັນທີ 7 ຕຸລາ ຈຶ່ງກາຍເປັນວັນຄູແຫ່ງຊາດຈົນຮອດທຸກວັນນີ້. ຖ້າເຮົາຈະປຽບໃສ່ຍຸກລະບອບເກົ່າແມ່ນບໍ່ທັນເຄີຍມີວັນຄູແຫ່ງຊາດເທື່ອ. ນີ້ກໍສະແດງໃຫ້ເຮົາເຫັນວ່າ ນັບແຕ່ມື້ສ້າງຕັ້ງລະບອບໃໝ່ ສາທາລະນະລັດ ປະຊາທິປະໄຕ ປະຊາຊົນລາວ, ພັກ-ລັດເຮົາໄດ້ເຫັນຄວາມໝາຍຄວາມສຳຄນ ທັງຍົກສູງຖານະບົດບາດຂອງຄູໃຫ້ສູງຂຶ້ນຕາມຂະບວນວິວັດແຫ່ງການສ້າງສາພັດທະນາປະເທດຊາດໃນຍຸກໃໝ່ສະໄໝໃໝ່.

ແຕ່ແນວໃດກໍຕາມ, ຕະຫລອດໄລຍະປະຫວັດສາດ ເຮົາເຫັນໄດ້ວ່າອາຊີບຄູ ຫລືວ່າ ໜ້າທີ່ຂອງຄູ-ອາຈານເປັນອາຊີບທີ່ໜັກໜ່ວງ, ມີກຽດສະຫງ່າ ແລະ ປອດໃສຂາວສະອາດ ຈົນໄດ້ຮັບສາຍານາມວ່າ: ເບົ້າຫລໍ່ຫລອມຄົນ ຫລື ເວົ້າອີກຢ່າງໜຶ່ງ ຄືວິສະວະກອນແຫ່ງດວງວິນຍານ. ຕະຫລອດໄລຍະປົກປັກຮັກສາ ແລະ ພັດທະນາປະເທດຊາດ ຄູເຮົາໄດ້ເຕີບໃຫຍ່ ແລະ ເຂັ້ມແຂງທາງດ້ານປະລິມານ ແລະ ຄຸນນະພາບຂຶ້ນເລື້ອຍໆ. ສິ່ງທີ່ສະແດງໃຫ້ເຫັນຢ່າງປະຈັກ ກໍຄືຄຸນນະພາບການສຶກສາ, ຈຳນວນສະຖາບັນການສຶກສາທຸກຊັ້ນທຸກຂັ້ນໄດ້ເພີ່ມຂຶ້ນຢ່າງໄວວາ, ຈຳນວນຄູ-ອາຈານແຕ່ລະຂັ້ນແຕ່ລະຊັ້ນຮຽນກໍເພີ່ມຂຶ້ນດ້ວຍຄຸນນະພາບໃໝ່. ຄຸນນະພາບການຮຽນ-ການສອນນັບມື້ດີຂຶ້ນເລື້ອຍໆ. ນອກຈາກເຮັດໜ້າທີ່ການສິດສອນແລ້ວ ຄູ-ອາຈານທີ່ໄດ້ຖືກສັບຊ້ອນໄປເຮັດວຽກອື່ນກໍເຫັນໄດ້ວ່າເປັນຕົວຢ່າງທີ່ດີ, ກາຍເປັນພະນັກງານຫລັກແຫລ່ງການນຳທີ່ສຳຄັນຂອງຊາດ ແລະ ຮັບໃຊ້ປະຊາຊົນ ນັບແຕ່ຂັ້ນສູນກາງລົງຮອດທ້ອງຖິ່ນ ດັ່ງຕົວຢ່າງທ່ານປະທານປະເທດເຮົາ ປັດຈຸບັນເພິ່ນກໍມາຈາກຄູສອນ, ທ່ານນາຍົກເຮົາກໍມາຈາກຄູສອນ, ຫລາຍທ່ານກໍໄດ້ເປັນລັດຖະມົນຕີ, ຮອງລັດຖະມົນຕີ, ພະນັກງານຫລັກແຫລ່ງການນຳໃນທຸກຂົງເຂດ ແລະ ທຸກລະດັບຂອງຊາດ.

ນີ້ລະຄືສັກສີຂອງການເປັນຄູ-ອາຈານ, ເປັນຄົນບຸກເບີກພາລະກິດໃຫ້ຊາດບ້ານເມືອງ. ໃນຊີວິດຂອງຄູ-ອາຈານສ່ວນຫລາຍແລ້ວໄປຢູ່ໃສກໍບໍ່ຕໍ່າຕ້ອຍ, ຕົກນ້ຳບໍ່ໄຫລຕົກໄຟບໍ່ໄໝ້ ຍ້ອນຄູໄດ້ຝຶກຝົນຫລໍ່ຫລອມຈາກແປວໄຟປະຕິວັດ ຈາກຄູຜູ້ຮຽນຮູ້ນັ້ນເອງ. ຜູ້ໃດລືມບຸນຄຸນຂອງຄູ ຖືວ່າຜູ້ນັ້ນເປັນຄົນປຶກຫຶກໜາ ເພາະຄູເປັນຄົນທີ່ມີຄຸນງາມຄວາມດີຕໍ່ເຮົາເອງ ແລະ ຊາດບ້ານເມືອງ. ເພາະສະນັ້ນ ໃນໂອກາດວັນທີ 7 ຕຸລາ 2021 ນີ້ ພວກເຮົາຂໍນ້ອມຈົດຈຳລຳລຶກບຸນຄຸນຂອງຄູດ້ວຍຄວາມຊາບຊຶ້ງ ແລະ ບໍລິສຸດໃຈ !.