ປັນຍາຄວາມຮູ້ແມ່ນຄູ-ອາຈານເປັນຜູ້ໃຫ້

ຄົນເຮົາເກີດມາ, ນັບແຕ່ນ້ອຍຫາໃຫຍ່, ນັບແຕ່ຕ່ຳຫາສູງ ມີລະດັບຂັ້ນປະລິນຍາຕີ, ໂທ, ເອກ ຫລື ຊາວໄຮ່ຊາວນາ ຫລື ເປັນກຳມະກອນແບກຫາມສາມລໍ້ ຂຶ້ນໄປຮອດເຈົ້າໃຫຍ່ນາຍໂຕ ກໍລ້ວນແລ້ວແຕ່ແມ່ນຄູ-ອາຈານ ເປັນຜູ້ສິດສອນ, ຖ່າຍເທວິຊາ ຄວາມຮູ້ຄວາມຫລັກໃຫ້.

ຄູ-ອາຈານປຽບເໝືອນແມ່ພິມຂອງຊາດ. ສະຫລຸບແລ້ວນັບແຕ່ (ກ) ໄກ່, (ຂ)ໄຂ່, (ຄ) ຄວາຍ, (ນ) ນົກ, ເລົ່າບັ້ງສູດນັບແຕ່ບັ້ງ 2 ຈົນຮອດບັ້ງ 10 ແລະ ນັບແຕ່ 1,2,3 ຈົນຮອດ 100 ຮອດ 1.000 ຮອດໝື່ນຮອດແສນ ກໍແມ່ນຄູ-ອາຈານເປັນຜູ້ສິດສອນດ້ວຍກັນທັງນັ້ນ.

ມີບາງຄັ້ງຄູໃຫ້ນັກຮຽນເລົ່າຫລືໃຫ້ທ່ອງຂຶ້ນໃຈຫລາຍຄັ້ງ, ຫລາຍຫົນແຕ່ນັກຮຽນຍັງ ບໍ່ຈື່ຈົນເພິ່ນກໍໄດ້ອົດທົນພະຍາຍາມເພື່ອສ້າງລູກສ້າງຫລານ ຂອງພວກເຮົາໃຫ້ເປັນຄົນດີ ຂອງພໍ່ແມ່ ແລະ ເປັນຊັບພະຍາ ກອນ ຜູ້ປະເສີດຂອງປະເທດຊາດບ້ານເມືອງ.

ໃນແນວທາງນະໂຍບາຍ ຂອງພັກ ແລະ ລັດຖະບານເຮົາ ໃນຜ່ານມາກໍຄືໃນ ປັດຈຸບັນ ເພິ່ນໄດ້ກຳນົດເອົາວຽກງານ ສ້າງຊັບພະຍາກອນມະນຸດເປັນ 1 ໃນ 4 ບຸກທະລຸ ແລະ ການສ້າງຄົນໃນຍຸກໃໝ່ຕ້ອງໄດ້ ຜ່ານ 5 ຫລັກມູນ ຂອງການສຶກສາເປັນຕົ້ນຄື: ປັນຍາສຶກສາ, ຄຸນສົມບັດສຶກສາ, ສິລະປະສຶກ ສາ, ພາລະສຶກສາ ແລະ ແຮງ ງານສຶກສາ. ສ່ວນວ່າໃນເກນອາຍຸຂອງການຮຽນໃນແຕ່ລະໄລຍະນັ້ນ ກໍແມ່ນເລີ່ມຈາກອານຸບານ, ຂັ້ນປະຖົມສຶກສາ, ມັດທະຍົມ ສຶກສາ ແລະ ກ້າວຂຶ້ນຮອດມະຫາວິທະຍາໄລຕາມເກນອາຍຸກະສຽນໃນແຕ່ລະຂັ້ນ ແລະ ແຕ່ລະຊັ້ນຮຽນ.

ແນວໃດກໍຕາມ, ເວົ້າເຖິງພາລະກິດຂອງການສຶກສາຮ່ຳຮຽນຂອງນັກຮຽນ ແລະ ການສິດສອນຂອງຄູ-ອາຈານ ໃນສະພາບປັດຈຸບັນກໍເຫັນວ່າມີການພັດທະນາດີຂຶ້ນຫລາຍຖ້າທຽບໃສ່ຍຸກກ່ອນ. ໂດຍສະເພາະນັບແຕ່ພັກ ແລະ ລັດຖະບານເຮົາກໍຄືກະຊວງສຶກສາໄດ້ມີການປັບປຸງໂຄງການສິດສອນໂດຍຫັນເອົາປະລິມານກ້າວສູ່ຄຸນນະພາບໃໝ່ ຈຶ່ງເຮັດໃຫ້ການຮຽນການສອນນັບມື້ມີການປ່ຽນແປງ, ຄຸນນະພາບຂອງນັກ, ຮຽນນັກສຶກສາໃນແຕ່ລະຂັ້ນ, ແຕ່ລະຊັ້ນກໍນັບມື້ດີຂຶ້ນຖ້າທຽບໃສ່ຊາວສາມສິບປີຜ່ານມາ.

ໃນໂອກາດວັນທີ 7 ເດືອນ ຕຸລາ ທີ່ຈະມາເຖິງນີ້ພວກເຮົາ ທັງຫລາຍທີ່ໄດ້ຜ່ານຊີວິດການເປັນນັກຮຽນ, ກ້າວຂຶ້ນເປັນນັກສຶກສານັບແຕ່ຕອນຍັງນ້ອຍເທົ່າໃຫຍ່ຈົ່ງພ້ອມກັນຈົດຈຳລຳລຶກເຖິງບຸນຄຸນຂອງຄູ-ອາຈານທີ່ໄດ້ໃຫ້ຄວາມຮູ້ຄວາມຫລັກ, ມີວິຊາອາຊີບຕິດໂຕໃນ ທຸກສາຂາອາຊີບກໍແມ່ນຍ້ອນ ຄູ-ອາຈານ ເປັນຜູ້ໃຫ້ຜູ້ໃດຟັງຄວາມຄູ ດຸໝັ້ນຮ່ຳຮຽນກໍໄດ້ ດິບໄດ້ດີ, ເປັນເຈົ້າເປັນນາຍ, ຜູ້ໃດຂີ້ຄ້ານຮຽນ ຫລື ຮຽນບໍ່ເກັ່ງກໍພໍມີອາຊີບຕິດໂຕກຸ້ມປາກກຸ້ມທ້ອງ.

ເຖິງຢ່າງໃດກໍດີ, ໃນເງື່ອນໄຂທີ່ເສດຖະກິດ-ສັງຄົມ ຂອງປະເທດພວມຢູ່ໃນໄລຍະສ້າງສາພັດທະນາ ກໍຍັງມີຫລາຍປັດໄຈ ທີ່ເປັນອຸປະສັກໃຫ້ແກ່ ຄູ-ອາຈານ ຜູ້ເຮັດໜ້າທີ່ສິດສອນສົ່ງຄວາມຮູ້ໃຫ້ແກ່ຄົນຮຸ້ນໃໝ່ເຊັ່ນ: ປີນີ້ບ້ານເຮົາ ແລະ ທົ່ວໂລກແມ່ນກຳລັງປະສົບກັບການແຜ່ລະບາດຂອງພະຍາດໂຄວິດ-19 ຢ່າງໜັກ ອັນມີຜົນກະທົບບໍ່ໜ້ອຍຕໍ່ຊີວິດການເປັນຢູ່ຂອງຄູ-ອາຈານ ເຖິ່ງແມ່ນວ່າໂຮງຮຽນຫລາຍແຫ່ງໃນທົ່ວປະເທດໄດ້ປິດໂຮງຮຽນຢູ່ໂຮງຮຽນ ແຕ່ຄູ່ອາຈານກໍຍັງໄດ້ແຕ່ງບົດສອນສົ່ງຄວາມຮູ້ຜ່ານສື່ອອນລາຍ ຫລື ເຮົາເອີນກັນວ່າການຮຽນການສອນອອນລາຍໃນຂະນະທີເຮົາກຳລັງປະຕິບັດຢູ່ປັດຈຸບັນນີ້ ຍ້ອນຍັງມີການແຜ່ລະບາດຂອງພະຍາດໂຄວິດໃນຊຸມຊົນຈຳນວນຫລາຍໃນຫລາຍແຂວງທົ່ວປະເທດ.

ນອກນັ້ນ, ກໍຍັງມີຄູອາສາ ຫລາຍພັນຫລາຍໝື່ນທີ່ເຮັດ ໜ້າທີ່ສິດສອນຢູ່ຊົນນະບົດ, ເຂດຫ່າງໄກສອກຫລີກ, ບັນ ດາຄູ-ອາຈານ ເຫລົ່ານີ້ ເຖິງວ່າ ບໍ່ ທັນໄດ້ເຂົ້າເປັນລັດຖະກອນແຕ່ ພວກເພິ່ນກໍເຮັດໜ້າທີ່ສິດສອນ ດ້ວຍຄວາມຮັກຊາດ, ຮັກແຜ່ນ ດິນ, ມີຄວາມຈົງຮັກພັກດີຕໍ່ປະເທດຊາດ, ມີຈັນຍາບັນຕໍ່ໜ້າ ທີ່ຢ່າງໜັກແໜ້ນສົມກັບວ່າ ປັນຍາຄວາມຮູ້ນັ້ນ, ແມ່ນຄູ- ອາຈານເປັນຜູ້ໃຫ້./.