ໄຟໄໝ້ໂຮງໝໍປິ່ນປົວຜູ້ຕິດເຊື້ອໂຄວິດໃນໂຣມາເນຍຄັ້ງທີ 3 ໃນຮອບ 1 ປີ ມີຜູ້ເສຍຊີວິດ 9 ຄົນ

ເສຍຊີວິດ 9 ຄົນ ໄຟໄໝ້ໂຮງໝໍປິ່ນປົວຜູ້ຕິດເຊື້ອໂຄວິດຢູ່ໂຣມາເນຍ ເປັນຄັ້ງທີ 3 ໃນຮອບ 1 ປີ ສົ່ງຜົນໃຫ້ເກີດຄວາມກັງວົນກ່ຽວກັບມາດຕະຖານຄວາມປອດໄພຂອງໂຮງໝໍ.

ສຳນັກຂ່າວອັລຈາຊີຣາ ລາຍງານວ່າ: ເມື່ອວັນທີ 1 ຕຸລາ ເກີດເຫດໄຟໄໝ້ໂຮງໝໍຜູ້ປ່ວຍພະຍາດລະບາດຕິດເຊື້ອ ໃນເມືອງຄອນສະແຕນຕາ ທາງຕາເວັນອອກສຽງໃຕ້ຂອງໂຣມາເນຍ ເຊິ່ງເປັນສະຖານທີ່ປິ່ນປົວຜູ້ຕິດເຊື້ອໄວຣັສໂຄວິດ-19 ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 9 ຄົນ ທັງໝົດເປັນຜູ້ຕິດເຊື້ອໂຄວິດ-19 ທີ່ຮັບການປິ່ນປົວຢູ່ຫ້ອງໄອຊີຢູ.

ຮັກສາການລັດຖະມົນຕີກະຊວງສາທາລະນະສຸກຂອງໂຣມາເນຍ ເປີດເຜີຍວ່າ: ຂະນະເກີດເຫດມີຜູ້ປ່ວຍຮັບການປິ່ນປົວຢູ່ໂຮງໝໍແຫ່ງນີ້ 113 ຄົນ ໃນຈຳນວນນີ້ເປັນຜູ້ປ່ວຍຫ້ອງໄອຊີຢູ 10 ຄົນ ສ່ວນສາເຫດຂອງໄຟໄໝ້ຍັງບໍ່ຮູ້ແນ່ນອນ.

ທ່ານ ເຊເກ້ ແອດຕິລາ ຫົວໜ້າສຳນັກງານບັນເທົາໄພສຸກເສີນຂອງໂຣມາເນຍ ເປີດເຜີຍວ່າ: ເບື້ອງຕົ້ນກວດພົບຄວາມຜິດປົກກະຕິຢູ່ລະບົບຕິດຕັ້ງໄຟຟ້າຂອງໂຮງໝໍ ເຊິ່ງຕອນນີ້ທາງໄອຍະການກຳລັງສືບສວນຢ່າງລະອຽດ.

ທັງນີ້, ເຫດໄຟໄໝ້ໂຮງໝໍຄັ້ງນີ້ ຖືເປັນແຫ່ງທີ 3 ຂອງໂຣມາເນຍໃນຮອບ 1 ປີຜ່ານມາ ສົ່ງຜົນໃຫ້ເກີດຄວາມກັງວົນກ່ຽວກັບມາດຕະຖານຄວາມປອດໄພຂອງໂຮງໝໍໃນປະເທດ ໂດຍໃນເດືອນມັງກອນຜ່ານມາ ຫາກໍເກີດໄຟໄໝ້ໂຮງໝໍປິ່ນປົວຜູ້ຕິດເຊື້ອໂຄວິດ-19 ໃນນະຄອນຫລວງບູຄາເຣສ ມີຜູ້ເສຍຊີວິດ 5 ຄົນ ແລະ 2 ເດືອນກ່ອນໜ້ານັ້ນ ກໍເກີດໄຟໄໝ້ຢູ່ໂຮງໝໍໃນເມືອງປິອາຕຣາ ນິມ ເຮັດໃຫ້ມີຜູ້ເສຍຊີວິດ 10 ຄົນ.

ປະທານາທິບໍດີ ເດລາ ໂຢຮານນິສ ກ່າວວ່າ: ເຫດໄຟໄໝ້ຄັ້ງນີ້ເປັນການເນັ້ນໃຫ້ເຫັນວ່າລະບົບສາທາລະນະສຸກໂຣມາເນຍຂາດເຂີນໂຮງໝໍທີ່ດີພາຍໃຕ້ແຮງກົດດັນຈາກການແຜ່ລະບາດຂອງໂຄວິດ-19 ຮອບທີ 4 ຂອງໂຣມາເນຍ.

ອ້າງອີງ:

https://www.thairath.co.th/news/foreign/2208856