ເລຂາ ESCAP ຊີ້ ວິກິດໂຄວິດເປີດໂອກາດໃຫ້ ຜູ້ສູງອາຍຸໃນອາຊີເຂົ້າເຖິງຍຸກດິຈີຕອນຫລາຍຂຶ້ນ
ເວັບໄຊໜັງສືພິມ South China Morning Post ຂອງຮົງກົງ ເຜີຍແຜ່ບົດຄວາມສະແດງຄວາມຄິດເຫັນຫລ້າສຸດຈາກ ອາມິດາ ຊັລເຊີຍະ ອາລິສຈະບານາ ເລຂາທິການບໍລິຫານຂອງຄະນະກຳມາທິການເສດຖະກິດ ແລະ ສັງຄົມແຫ່ງສະຫະປະຊາຊາດສຳລັບອາຊີ ແລະ ປາຊີຟິກ ຫລື ESCAP ເຊິ່ງຊີ້ໃຫ້ເຫັນວ່າ: ວິກິດແຜ່ລະບາດຂອງພະຍາດໂຄວິດສົ່ງຜົນໃຫ້ຜູ້ສູງອາຍຸໃນອາຊີມີໂອກາດເຂົ້າເຖິງເຕັກໂນໂລຊີໃນຍຸກດິຈີຕອນໄດ້ຫລາຍຂຶ້ນ.
ໂດຍຫລາຍປີຜ່ານມາ ອັດຕາປະຊາກອນສູງອາຍຸຂອງຫລາຍປະເທດໃນອາຊີເພີ່ມສູງຂຶ້ນຢ່າງວ່ອງໄວ ເປັນຜົນຈາກອັດຕາການເກີດຫລຸດລົງ ແລະ ປະຊາກອນມີອາຍຸຍືນຍາວຂຶ້ນ ເຊິ່ງປັດໄຈຫລັກມາຈາກການພັດທະນາດ້ານເສດຖະກິດ ແລະ ສັງຄົມ.
ຂະນະທີ່ປະຊາກອນສູງອາຍຸເປັນກຸ່ມເບາະບາງ ແລະ ໄດ້ຮັບຜົນກະທົບໜັກຈາກວິກິດແຜ່ລະບາດຂອງໂຄວິດທີ່ເກີດຂຶ້ນ, ແຕ່ຈາກເຕັກໂນໂລຊີ ແລະ ອຸປະກອນຊ່ວຍເຫລືອທີ່ພັດທະນາຂຶ້ນໃນປັດຈຸບັນ ຊ່ວຍໃຫ້ກຸ່ມຜູ້ສູງອາຍຸຈຳນວນຫລາຍສາມາດຕໍ່ສູ້ ແລະ ຮັບມືສະຖານະການແຜ່ລະບາດຂອງໂຄວິດ. ອີກທັງຍັງຮັກສາການດຳລົງຊີວິດໄດ້ຢ່າງປອດໄພຫລາຍຂຶ້ນ ໂດຍສະເພາະຜູ້ສູງອາຍຸທີ່ພິການ ຫລື ຢູ່ພຽງລຳພັງ.
ເຊິ່ງແພກຟອມໂຊຊຽວມີເດຍຖືເປັນເຕັກໂນໂລຊີສຳຄັນທີ່ສາມາດເພີ່ມການມີປະຕິສຳພັນທາງສັງຄົມຂອງຜູ້ສູງອາຍຸໃນຊ່ວງນີ້ ແລະ ຍັງຊ່ວຍຫລຸດຄວາມໂດດດ່ຽວ ແລະ ຄວາມເຫງົາທີ່ເກີດຂຶ້ນຈາກການໃຊ້ຊີວິດຢູ່ແຕ່ເຮືອນເພື່ອຫລີກລ່ຽງໂຄວິດ ຫລື ການກັກຕົວທ່າມກາງມາດຕະການລັອກດາວ.
ຂະນະທີ່ການປ່ຽນຜ່ານສູ່ຍຸກດິຈີຕອນທີ່ວ່ອງໄວ ເຮັດໃຫ້ປະຊາກອນສູງອາຍຸຈຳນວນບໍ່ໜ້ອຍຍັງເຂົ້າບໍ່ເຖິງເຕັກໂນໂລຊີໃໝ່ໆ ແລະ ມີຄວາມສ່ຽງຈະຖືກຖິ້ມໄວ້ທາງຫລັງ ເຊິ່ງສິ່ງຈຳເປັນສຳລັບການພັດທະນາຂອງປະເທດຕ່າງໆໃນຕອນນີ້ ຄືການສະໜັບສະໜູນຄວາມເທົ່າທຽມທາງດິຈີຕອນສຳລັບປະຊາຊົນທຸກຊ່ວງອາຍຸ.
ຜ່ານມາປະເທດໃນອາຊີ-ປາຊີຟິກ ມີຄວາມກ້າວໜ້າຫລາຍໃນການເຊື່ອມຕໍ່ລະຫວ່າງກັນຜ່ານເຕັກໂນໂລຊີຂໍ້ມູນຂ່າວສານ ແລະ ການສື່ສານ, ແຕ່ໃນຂະນະດຽວກັນ ປະຊາກອນທົ່ວພາກພື້ນອີກປະມານເຄິ່ງໜຶ່ງພັດຍັງເຂົ້າບໍ່ເຖິງລະບົບອິນເຕີເນັດ ເຊິ່ງກຸ່ມຜູ້ສູງອາຍຸ ໂດຍສະເພາະຜູ້ຍິງ ເປັນກຸ່ມທີ່ເຊື່ອມຕໍ່ກັບເຕັກໂນໂລຊີໃນໂລກດິຈີຕອນໜ້ອຍທີ່ສຸດ.
ບົດຄວາມຍັງຊີ້ວ່າ: ໄລຍະ 2-3 ປີຕໍ່ໜ້າ ເປັນໂອກາດສຳຄັນສຳລັບພາກພື້ນອາຊີ-ປາຊີຟິກ ໃນການຮຽນຮູ້ປະສົບການຈາກວິກິດໂຄວິດ ແລະ ຫັນມາສ້າງຄວາມສຳເລັດໃນການພັດທະນາ ໂດຍຄຳນຶງເຖິງປະຊາກອນຜູ້ສູງອາຍຸ ແລະ ການປ່ຽນຜ່ານສູ່ຍຸກດິຈີຕອນທີ່ວ່ອງໄວ ເຊິ່ງລວມທັງການສົ່ງເສີມໃຫ້ຜູ້ສູງອາຍຸສາມາດເຂົ້າເຖິງໂລກດິຈີຕອນໄດ້ງ່າຍຂຶ້ນ.
ອ້າງອີງ:
