ໄຕ້ຝຸ່ນ “ມິນດອນເລ” ກຽມຖະຫລົ່ມຍີ່ປຸ່ນ ເຕືອນໄພຝົນຕົກໜັກ ຄື້ນສູງ 11 ແມັດ ກະທົບເກາະອິຊຸ ເຖິງນະຄອນຫລວງໂຕກຽວ

ໄຕ້ຝຸ່ນ “ມິນດອນເລ” ໄຕ້ຝຸ່ນໝາຍເລກ 16 ຂອງປີນີ້ ກຽມຖະຫລົ່ມເກາະອິຊຸຂອງຍີ່ປຸ່ນໃນວັນທີ 1 ຕຸລານີ້ ເຕືອນເກີດຄື້ນສູງສຸດ 11 ແມັດ ແລະ ເກີດຝົນຕົກໜັກລົມແຮງໃນຫລາຍພື້ນທີ່ ລວມທັງນະຄອນຫລວງໂຕກຽວ.

ອຸຕຸນິຍົມວິທະຍາຍີ່ປຸ່ນ ຫລື JMA ລາຍງານຫລ້າສຸດເມື່ອເວລາ 5:00 ໂມງ ເຊົ້າວັນທີ 1 ຕຸລາ ຕາມເວລາທ້ອງຖິ່ນວ່າ: ໄຕ້ຝຸ່ນມິນດອນເລຢູ່ຫ່າງຈາກຊາຍຝັ່ງທາງໃຕ້ຂອງເກາະຮາຈິໂຈຈິມະ 260 ກິໂລແມັດ ເປັນເກາະໜຶ່ງໃນໝູ່ເກາະອິຊຸ ມີຄວາມໄວລົມໃກ້ສູນກາງພາຍຸ 162 ກິໂລແມັດຕໍ່ຊົ່ວໂມງ.

JMA ເຕືອນວ່າ: ມິນດອນເລມີກຳລັງແຮງຫລາຍ ແລະ ເຕືອນເກາະຮາຈິໂຈຈິມະ ແລະ ເກາະອາໂອກາຊິມະ 2 ເກາະທີ່ມີຢູ່ໃນໝູ່ເກາະອິຊຸ ຢູ່ໃນເສັ້ນທາງພາຍຸໂດຍກົງ, ຄາດຈະເກີດຄື້ນສູງສຸດ 11 ແມດອ້ອມໝູ່ເກາະແຫ່ງນີ້ ແຈ້ງເຕືອນປະຊາຊົນໃຫ້ຢູ່ພາຍໃນເຮືອນ.

ນອກຈາກນີ້ ພາກພື້ນຄັນໂຕ ເຊິ່ງລວມທັງນະຄອນຫລວງໂຕກຽວ ກໍໄດ້ຮັບການແຈ້ງເຕືອນອາດເກີດລົມພັດແຮງຄວາມໄວ 108-144 ກິໂລແມັດຕໍ່ຊົ່ວໂມງ ກະທົບກັບການເດີນທາງໃນນະຄອນຫລວງໂຕກຽວໄດ້ ແລະ ມີອີກຫລາຍພື້ນທີ່ ລວມທັງແຂວງຊິຊຸໂອກະ ໄດ້ຮັບຄຳເຕືອນລົມພັດແຮງເຊັ່ນກັນ.

ອ້າງອີງ:

https://www.facebook.com/351495409269379/posts/539980967087488/