ທ່ານ ນິໂກລາ ຊາໂກຊີ ອະດີດປະທານາທິບໍດີຝຣັ່ງ ຖືກຕັດສິນຕິດຄຸກ ຂໍ້ຫາໃຊ້ເງິນຫາສຽງເກີນກົດໝາຍກຳນົດ
ທ່ານ ນິໂກລາ ຊາໂກຊີ ອະດີດປະທານາທິບໍດີຂອງຝຣັ່ງ ຖືກຕັດສິນຕິດຄຸກ 1 ປີ ໃນຂໍ້ຫາໃຊ້ເງິນຫາສຽງເກີນກວ່າກົດໝາຍກຳນົດໃນລະຫວ່າງການຫາສຽງເລືອກຕັ້ງສະໄໝທີ 2 ຂອງທ່ານເມື່ອປີ 2012 ເຊິ່ງເຮັດໃຫ້ທ່ານ ຊາໂກຊີ ເປັນປະທານາທິບໍດີຝຣັ່ງຄົນທຳອິດໃນປະຫວັດສາດສະໄໝໃໝ່ທີ່ໄດ້ຮັບໂທດຕິດຄຸກ 2 ວາລະ.
“ນິໂລາ ຊາໂກຊີ ຮູ້ວົງເງິນການໃຊ້ຈ່າຍ” ຜູ້ພິພາກສາກ່າວ “ທ່ານຮູ້ວ່າບໍ່ຄວນເກີນວົງເງິນນັ້ນ”
ທັງນີ້ ຈຳເລີຍຮ່ວມທັງ 13 ຄົນໃນຄະດີນີ້ຖືກຕັດສິນວ່າມີຄວາມຜິດ. ຂະນະທີ່ຜູ້ພິພາກສາກ່າວອີກວ່າ: ທ່ານ ຊາໂກຊີ ອາຍຸ 66 ປີ ສາມາດຮັບໂທດຕິດຄຸກຢູ່ເຮືອນດ້ວຍການໃສ່ສາຍແຂນເອເລັກໂຕຣນິກ.
ນີ້ຄືຄະດີອາຍາຄະດີທີ 2 ທີ່ກ່ຽວຂ້ອງກັບທ່ານ ຊາໂກຊີ ຫລັງຈາກໃນເດືອນມີນາຜ່ານມາ ທ່ານໄດ້ຮັບໂທດຕິດຄຸກ 3 ປີ ໃນຂໍ້ຫາສໍ້ລາດບັງຫລວງ, ແຕ່ໂທດຕິດຄຸກ 2 ຈາກ 3 ປີດັ່ງກ່າວນັ້ນໃຫ້ລໍລົງອາຍາ ໂດຍທ່ານຖືກຕັດສິນວ່າພະຍາຍາມຕິດສິນບົນຜູ້ພິພາກສາເມື່ອປີ 2014 ຫລັງພົ້ນຈາກຕຳແໜ່ງ.
ສຳລັບຄະດີທີ່ມີການຕັດສິນໃນຄັ້ງນີ້ ເລີ່ມຕົ້ນຂຶ້ນໃນເດືອນມີນາ 2014 ໂດຍໃນການສອບສວນຄະດີອາຍາທີ່ເອີ້ນວ່າ: “ຄະດີ Bygmalion” ພົບວ່າທ່ານ ຊາໂກຊີ ແລະ ທີມຫາສຽງຂອງທ່ານຕັ້ງໃຈປິດບັງບັນຊີລາຍຮັບລາຍຈ່າຍໃນຊ່ວງຫາສຽງເລືອກຕັ້ງປີ 2012 ດ້ວຍການປອມໃບແຈ້ງໜີ້ ໂດຍທ່ານ ຊາໂກຊີ ໃຊ້ເງິນໄປຫລາຍກວ່າ 54 ລ້ານໂດລາ ໃນລະຫວ່າງການຫາສຽງ ເຊິ່ງສູງກວ່າເພດານ 24 ລ້ານໂດລາ ທີ່ກຳນົດໂດຍກົດໝາຍການເລືອກຕັ້ງຂອງຝຣັ່ງ.
ທ່ານ ຊາໂກຊີ ຜະເຊີນກັບການຕໍ່ສູ້ທາງກົດໝາຍທີ່ຍາວນານ ໂດຍທ່ານພະຍາຍາມບໍ່ໃຫ້ການພິຈາລະນາຄະດີເກີດຂຶ້ນ, ແຕ່ຄຳອຸທອນຂອງທ່ານຖືກປະຕິເສດໃນທ້າຍປີ 2018 ແລະ ການພິຈາລະນາເລີ່ມຕົ້ນຂຶ້ນໃນທີ່ສຸດເມື່ອວັນທີ 20 ພຶດສະພາ 2021 ຫລັງຈາກຊັກຊ້າໄປ 2 ເດືອນ ເນື່ອງຈາກທະນາຍຄວາມຂອງຈຳເລີຍສຳຄັນເຂົ້າຮັບການປິ່ນປົວຢູ່ໂຮງໝໍເນື່ອງຈາກຕິດໂຄວິດ.
ລາຍງານລະບຸວ່າ: ພາຍໃນທີມຫາສຽງຂອງທ່ານ ຊາໂກຊີ ຮູ້ກັນດີເລື່ອງວົງເງິນທີ່ກົດໝາຍເລືອກຕັ້ງກຳນົດ ໂດຍທ່ານ ກິໂຍມ ລອມແບ ຜູ້ຈັດການຫາສຽງຂອງທ່ານ ຊາໂກຊີ ໃນປີ 2012 ໃຫ້ສຳພາດຕໍ່ສະຖານີໂທລະພາບ France 2 ເມື່ອຕົ້ນປີນີ້ວ່າ: ພວກເຂົາໄດ້ຮັບບັນທຶກຂໍ້ຄວາມສະບັບທຳອິດຈາກຝ່າຍບັນຊີເມື່ອວັນທີ 7 ມີນາ 2012 ເພື່ອເຕືອນເລື່ອງຄ່າໃຊ້ຈ່າຍໃນການຫາສຽງທີ່ເພີ່ມຂຶ້ນຢ່າງວ່ອງໄວ ພ້ອມເລັ່ງໃຫ້ພວກເຂົາຟ້າວແກ້ໄຂ.
ທ່ານ ລອມແບ ກ່າວວ່າ: ທ່ານບອກທ່ານ ຊາໂກຊີ ກ່ຽວກັບບັນທຶກຂໍ້ຄວາມດັ່ງກ່າວ ແລະ ຊີ້ໃຫ້ເຫັນເຖິງຄວາມຈຳເປັນໃນການຫລຸດຄ່າໃຊ້ຈ່າຍໃນການຫາສຽງ, ຂະນະທີ່ທ່ານ ຊາໂກຊີ ຢືນຢັນວ່າ: ທ່ານບໍ່ມີຄວາມຮູ້ເລື່ອງການໃຊ້ຈ່າຍເກີນ.
ທັງນີ້, ທ່ານ ຊາໂກຊີ ດຳລົງຕຳແໜ່ງປະທານາທິບໍດີຝຣັ່ງໃນລະຫວ່າງປີ 2007-2012 ກ່ອນຈະເສຍໄຊໃຫ້ທ່ານ ຟຣອງຊົວ ໂອນລອງ ໃນການລົງສະໝັກຊີງຕຳແໜ່ງປະທານາທິບໍດີສະໄໝທີ 2 ເຮັດໃຫ້ທ່ານເປັນປະທານາທິບໍດີຝຣັ່ງຄົນທຳອິດນັບແຕ່ປີ 1981 ທີ່ໄດ້ດຳລົງຕຳແໜ່ງພຽງສະໄໝດຽວ.
ອ້າງອີງ:
