ແພດໝໍຄືນັກຮົບປະຈັນບານທີ່ຕໍ່ສູ້ກັບການຮຸກຮານຂອງໂຄວິດ-19
ໂດຍ: ທິດກໍ່າ
ນັບແຕ່ເຊື້ອພະຍາດສາຍພັນໃໝ່ໂຄໂຣນາ ຫລື ທີ່ເອີ້ນກັນວ່າ ໂຄວິດ-19 ເລີ່ມແຜ່ລະບາດຢູ່ປະເທດເຮົາ, ໃຜກໍຄົງບໍ່ປະຕິເສດໄດ້ວ່າ ຜູ້ທີ່ຜະເຊີນໜ້າໂດຍກົງໃນການເບິ່ງແຍງປິ່ນປົວເພື່ອກູ້ເອົາຊີວິດອິນຊີຜູ້ຕິດເຊື້ອໂຄວິດ-19 ນັ້ນແມ່ນແພດໝໍລາວ ເຊິ່ງປຽບເໝືອນນັກຮົບປະຈັນບານກັບສັດຕູຜູ້ຮຸກຮານທີ່ຮ້າຍກາດໂດຍກົງ.
ນອກຈາກເຮັດໜ້າທີ່ປິ່ນປົວໂດຍກົງໃນສູນປິ່ນປົວແລ້ວ ແພດໝໍໃນໂຮງໝໍແຕ່ລະແຫ່ງເຂດແຂວງ ນັບແຕ່ຂັ້ນສູນກາງລົງຮອດທ້ອງຖິ່ນຍັງໄດ້ເຮັດໜ້າທີ່ຫລາຍຢ່າງເຊັ່ນ: ວັດອຸນຫະພູມ, ວິເຄາະຫາເຊື້ອພະຍາດ, ສັກວັກແຊງ ນັບທັງບໍລິຫານຈັດການນຳສົ່ງຜູ້ຕິດເຊື້ອເຂົ້າກັກກັນ ແລະ ປິ່ນປົວຈົນໃຫ້ຄົນທີ່ຕິດເຊື້ອຫາຍດີແລ້ວນຳສົ່ງກັບບ້ານ ແລະ ຍັງເຮັດໜ້າວຽກອື່ນໆທີ່ກ່ຽວຂ້ອງກັບການຕໍ່ສູ້ກັບສັດຕູຕົວອັນຕະລາຍຮ້າຍກາດແບບໄຮ້ຕົນຕົວ, ໄຮ້ກິ່ນ, ໄຮ້ສຽງ ເຊິ່ງວິທະຍາສາດໄດ້ຂະໜານນາມວ່າເປັນສັດຕູຊີວະພາບທີ່ອັນຕະລາຍຮ້າຍກາດໃນຍຸກໂລກາພິວັດ.
ສິ່ງທີ່ໜ້າເຫັນໃຈ ແລະ ສັນລະເສີນແພດໝໍລາວເຮົາອີກປະການໜຶ່ງ ກໍຄືທ່ານໃດມີໜ້າທີີ່ຕໍ່ສູ້ກັບໂຄວິດ-19 ຕ້ອງໄດ້ໃສ່ຊຸດຂາວທີ່ຮ້ອນອົບເອົ້າຫໍ່ຫຸ້ມຕົນຕົວ ທັງປິດໜ້າ, ປິດຕາ, ປິດປາກ, ປິດດັງຢູ່ຕະຫລອດ ແມ້ກະທັງດື່ມນ້ຳກິນເຂົ້າກໍບໍ່ມີໂອກາດໄດ້ປົດອອກຢ່າງສະດວກສະບາຍ ເວົ້າໄດ້ວ່າໃນຊ່ວງປະຕິບັດໜ້າທີ່ ບາງທ່ານຕ້ອງໄດ້ໃຊ້ໝົດເວັນໝົດຄືນກໍເກືອບບໍ່ມີໂອກາດໄດ້ແກ້ອອກ.
ຈາກສະພາບທີ່ກ່າວມາຂ້າງເທິງນີ້ ຈຶ່ງເຮັດໃຫ້ແພດໝໍບາງທ່ານບາງຄົນຕິດເຊື້ອຕໍ່ຈາກຄົນທີ່ໄດ້ເຂົ້າໄປປິ່ນປົວຢູ່ໂຮງໝໍໃນບາງແຫ່ງ, ຊ້ຳບໍ່ໜຳ ແພດໝໍທຸກທ່ານທຸກຄົນເມື່ອສຳເລັດພາລະກິດແລ້ວຍັງບໍ່ມີໂອກາດໄດ້ກັບບ້ານກັບເຮືອນຫາຄອບຫາຄົວ ຫລື ຫາລູກຫາເມຍ ຍັງຈຳຕ້ອງໄດ້ໄປກັກຕົວຢູ່ສູນກັກກັນເປັນເວລາ 14 ວັນ ຫລື 28 ວັນ ຈົນກວ່າແນ່ໃຈວ່າບໍ່ມີການຕິດເຊື້ອແລ້ວຈຶ່ງກັບບ້ານໄດ້.
ນີ້ຄືພາລະກິດ ແລະ ທາດແທ້ຂອງນັກຮົບເສື້ອຂາວທີ່ໄດ້ອຸທິດຊີວິດເລືອດເນື້ອເພື່ອຊາດ ແລະ ເພື່ອປະຊາຊົນຢ່າງແທ້ຈິງ. ສິ່ງທີ່ໜ້າຍ້ອງຍໍຊົມເຊີຍແພດໝໍລາວອີກຢ່າງໜຶ່ງ ຄືນັບແຕ່ມີການປິ່ນປົວຜູ້ຕິດເຊື້ອໂຄວິດ-19 ມານີ້ ແມ່ນຫາກໍມີຄົນເສຍຊີວິດພຽງ 16 ຄົນ ຖ້າທຽບໃສ່ຈຳນວນຜູ້ຕິດເຊື້ອມີເຖິງຫລັກ 2 ໝື່ນກວ່າຄົນ.
ຂໍຊົມເຊີຍ ແລະ ຈາລຶກຄຸນງາມຄວາມດີຂອງແພດໝໍລາວທີ່ໄດ້ຮັບໃຊ້ຊາດ, ຮັບໃຊ້ປະຊາຊົນຢ່າງເດັດດ່ຽວ ແລະ ຕັ້ງໜ້າສ້າງຜົນງານມາໃຫ້ຕົນເອງ ແລະ ໃຫ້ປະເທດຊາດ. ໃນໄລຍະຜ່ານມາ ເຖິງວ່າຈະມີຄົນຈັງໄຮວິພາກວິຈານວ່າແພດໝໍລາວບໍ່ເກັ່ງຄືບ້ານເຂົາ ໂຮງໝໍກໍເກົ່າລ້າສະໄໝ ແຕ່ແພດລາວສາມາດປິ່ນປົວໂຄວິດໄດ້ດີສຸດຍອດ. ສົມແລ້ວແພດໝໍລາວຄືນັກຮົບປະຕິວັດທີ່ປະຈັນບານຕໍ່ສູ້ກັບສັດຕູທີ່ຮ້າຍກາດຢ່າງໂຄວິດ-19 ແນ່ນອນ ແລະ ເດັດຂາດຕ້ອງໄດ້ຮັບໄຊຊະນະສົມກັບພັກ-ລັດຖະບານ ກໍຄືປະເທດຊາດ ແລະ ປະຊາຊົນໄດ້ມອບໝາຍໃຫ້.
