ຜູ້ນຳອາເມລິກາ, ຍີ່ປຸ່ນ, ອິນເດຍ, ອົດສະຕຣາລີ ຮ່ວມປະຊຸມກຸ່ມ Quad ເນັ້ນການຮ່ວມມືໃນພາກພື້ນອິນໂດ-ປາຊີຟິກ
ປະທານາທິບໍດີ ໂຈ ໄບເດນ ຂອງອາເມລິກາ ພ້ອມນາຍົກລັດຖະມົນຕີ ໂຢຊິຮິເດະ ຊູງະ ຂອງຍີ່ປຸ່ນ, ນາຍົກລັດຖະມົນຕີ ສະກອດ ມໍຣິສັນ ຂອງອົດສະຕຣາລີ ແລະ ນາຍົກລັດຖະມົນຕີ ນາເຣນທຣາ ໂມດີ ຂອງອິນເດຍ ອອກຖະແຫລງການຮ່ວມ ພາຍຫລັງກອງປະຊຸມ “ຈະຕຸພາຄີດ້ານຄວາມໝັ້ນຄົງ” ຫລື Quad (Quadrilateral Security Dialogue) ເຊິ່ງເປັນກຸ່ມການຮ່ວມມືດ້ານຄວາມໝັ້ນຄົງໃນພາກພື້ນອິນໂດ-ປາຊີຟິກ ທີ່ທຳນຽບຂາວໃນນະຄອນຫລວງວໍຊິງຕັນ ດີ.ຊີ. ເມື່ອວັນທີ 24 ກັນຍາ 2021 ໂດຍປະກາດຈຸດຢືນຮ່ວມກັນໃນການສົ່ງເສີມຄວາມສະຫງົບຮຽບຮ້ອຍຢ່າງເປີດກວ້າງ ແລະ ເສລີຕາມຫລັກກົດໝາຍສາກົນ ເພື່ອສະໜັບສະໜູນຄວາມໝັ້ນຄົງ ແລະ ຄວາມຈະເລີນຮຸ່ງເຮືອງໃນພາກພື້ນອິນໂດ-ປາຊີຟິກ ພ້ອມທັງຂະຫຍາຍການຮ່ວມມືທັງດ້ານວັກຊີນໂຄວິດ, ພະລັງງານສະອາດ, ເຕັກໂນໂລຊີ 5G ແລະ ເຕັກໂນໂລຊີອະວະກາດ.
“ເຮົາຢືນຢູ່ບ່ອນນີ້ນຳກັນໃນພາກພື້ນອິນໂດ-ປາຊີຟິກ ພາກພື້ນທີ່ເຮົາປາຖະໜາໃຫ້ມີເສລີພາບ ແລະ ປາສະຈາກການບີບບັງຄບ ບ່ອນທີ່ສິດທິປະຊາທິປະໄຕຂອງທຸກປະເທດໄດ້ຮັບການເຄົາລົບ ແລະ ບ່ອນທີ່ການແກ້ໄຂຂໍ້ຂັດແຍ່ງຕ່າງໆເປັນໄປຢ່າງສັນຕິ ແລະ ເປັນໄປຕາມກົດໝາຍສາກົນ” ຖະແຫລງການລະບຸ.
ນອກຈາກນີ້ ກອງປະຊຸມຍັງໄດ້ມີການຫາລືເລື່ອງການຮ່ວມມືທີ່ສຳຄັນໃນດ້ານຕ່າງໆ ເພື່ອຮັບມືຄວາມທ້າທາຍທີ່ເພີ່ມຂຶ້ນເຊັ່ນ:
- ສະຖານະການໂຄວິດ ເຊິ່ງກອງປະຊຸມໄດ້ມີຂໍ້ລິເລີ່ມດ້ານວັກຊີນ ນັບແຕ່ກອງປະຊຸມຄັ້ງກ່ອນເມື່ອ 6 ເດືອນກ່ອນ ແລະ ມີຄວາມຄືບໜ້າໃນການເພີ່ມກຳລັງການຜະລິດວັກຊີນໃຫ້ເຖິງ 1 ພັນລ້ານໂດສ. ຂະນະທີ່ຜູ້ນຳອິນເດຍຢືນຢັນວ່າ: ກຽມກັບມາສົ່ງອອກວັກຊີນອີກໃນເດືອນຕຸລາ.
- ເລັ່ງດຳເນີນງານເພື່ອຮັບມື ແລະ ເພີ່ມການເຝົ້າລະວັງບັນຫາສະພາບອາກາດປ່ຽນແປງ ແລະ ການສະໜັບສະໜູນການປ່ຽນຜ່ານສູ່ພະລັງງານສະອາດ ເພື່ອເປົ້າໝາຍໃນການຫລຸດການແຜ່ກະຈາຍຂອງແກັສກາກບອນໄດອອກໄຊຈົນເຫລືອສູນ.
- ການຂະຫຍາຍການຮ່ວມມືໃນການພັດທະນາສະພາບແວດລ້ອມທີ່ເອື້ອອຳນວຍຕໍ່ການຕິດຕັ້ງ ແລະ ກະຈາຍສັນຍານ 5G.
- ການແບ່ງປັນຂໍ້ມູນເຮັດປະມົງຜິດກົດໝາຍ ແລະ ບັນຫາທີ່ກ່ຽວຂ້ອງກັບສະຖານະການທາງທະເລ.
- ການຈັດຕັ້ງຄະນະເຮັດວຽກເພື່ອການຮ່ວມມືດ້ານເຕັກໂນໂລຊີອະວະກາດ.
- ການເພີ່ມການຮ່ວມມືດ້ານຄວາມປອດໄພທາງໄຊເບີໃນລະດັບຜູ້ນຳ.
ເຊິ່ງໃນຕອນຕົ້ນຂອງກອງປະຊຸມ ປະທານາທິບໍດີ ໂຈ ໄບເດນ ຍັງສະເໜີໂຄງການມອບທຶນໃຫ້ນັກສຶກສາຈາກປະເທດໃນກຸ່ມ Quad ສາມາດເຂົ້າສຶກສາລະດັບປະລິນຍາ ທັງດ້ານວິທະຍາສາດ, ເຕັກໂນໂລຊີ, ວິສະວະກຳ ແລະ ຄະນິດສາດ ຢູ່ມະຫາວິທະຍາໄລໃນອາເມລິການຳອີກ.
ທັງນີ້ກອງປະຊຸມຂອງກຸ່ມ Quad ມີຂຶ້ນຫລັງຈາກອາເມລິກາຈັບມືກັບອັງກິດ ແລະ ອົດສະຕຣາລີ ຕັ້ງພັນທະມິດໄຕພາຄີດ້ານຄວາມໝັ້ນຄົງໃນພາກພື້ນອິນໂດ-ປາຊີຟິກ ທີ່ເອີ້ນວ່າ AUKUS ໃນກາງເດືອນກັນຍາຜ່ານມາ ໂດຍຖືເປັນການເຄື່ອນໄຫວທີ່ສະແດງໃຫ້ເຫັນເຖິງຄວາມພະຍາຍາມຕໍ່ຕ້ານການຂະຫຍາຍອິດພິພົນຂອງຈີນໃນພາກພື້ນ. ຂະນະທີ່ ນາຍົກລັດຖະມົນຕີ ຊູງະ ຜູ້ນຳຍີ່ປຸ່ນ ກ່າວໃນກອງປະຊຸມວ່າ: ການຕັ້ງກຸ່ມ AUKUS ນັ້ນມີບົດບາດສຳຄັນໃນການຮັກສາສະຖຽນລະພາບ ແລະ ສັນຕິພາບໃນພາກພື້ນອິນໂດ-ປາຊີຟິກ.
ອ້າງອີງ:
- https://www.reuters.com/world/china/quad-leaders-meet-white-house-amid-shared-china-concerns-2021-09-24/
- https://www.aljazeera.com/news/2021/9/24/quad-announces-cooperative-initiatives-in-first-in-person-summit
- https://www.usatoday.com/story/news/politics/2021/09/24/china-looms-large-over-bidens-meeting-quad-leaders/5819902001/
- https://www.wionews.com/world/quad-leaders-to-announce-working-group-on-space-supply-chain-initiative-and-5g-deployment-diversification-effort-white-house-415627
