ໄບເດນ ກຽມພົບ ມາຄຣົງ ທ້າຍເດືອນຕຸລານີ້ ເລັ່ງຟື້ນຟູການພົວພັນ ຫລັງຝຣັ່ງເອີ້ນທູດກັບປະເທດ ກໍລະນີ AUKUS ຍົກເລີກສັນຍາເຮືອດຳນ້ຳ
ວັນທີ 22 ກັນຍາ 2021, ຖະແຫລງການຮ່ວມລະຫວ່າງລັດຖະບານອາເມລິກາ ແລະ ຝຣັ່ງ ລະບຸວ່າ: ປະທານາທິບໍດີ ໂຈ ໄບເດນ ຜູ້ນຳອາເມລິກາ ແລະ ປະທານາທິບໍດີ ເອັມມາຮູເອລ ມາຄຣົງ ຜູ້ນຳຝຣັ່ງ ໄດ້ໂທລະສັບສົນທະນາກັນ ແລະ ເຫັນພ້ອມຈະເດີນທາງມາພົບປະຫາລືກັນໃນເອີຣົບທ້າຍເດືອນຕຸລານີ້ ເພື່ອເລັ່ງຟື້ນຟູການພົວພັນທາງການທູດ ຫລັງຝຣັ່ງເອີ້ນທູດປະຈຳອາເມລິກາ ແລະ ອົດສະຕຣາລີກັບປະເທດ ຈາກກໍລະນີໄຕພາຄີ AUKUS ລະຫວ່າງອົດສະຕຣາລີ, ອັງກິດ ແລະ ອາເມລິກາ ນຳໄປສູ່ການຍົກເລີກສັນຍາເຮືອດຳນ້ຳລະຫວ່າງ ຝຣັ່ງ ແລະ ອົດສະຕຣາລີ.
ກ່ອນໜ້ານີ້, ທ່ານ ໝອງ-ອີບ ເລີ ດຣິຢອງ ລັດຖະມົນຕີຕ່າງປະເທດຝຣັ່ງ ລະບຸວ່າ: ສົນທິສັນຍາຄວາມໝັ້ນຄົງໄຕພາຄີ AUKUS ສ້າງຄວາມບໍ່ພໍໃຈໃຫ້ລັດຖະບານຝຣັ່ງ ເຊິ່ງໄຕພາຄີຈະນຳໄປສູ່ການຊ່ວຍໃຫ້ກອງທັບຂອງອົດສະຕຣາລີມີເຮືອດຳນ້ຳພະລັງງານນິວເຄຼຍ ເພື່ອຮ່ວມມືປະຕິບັດພາລະກິດດ້ານຄວາມໝັ້ນຄົງກັບອີກ 2 ປະເທດ ແລະ ສົ່ງຜົນກະທົບຕໍ່ດີລມູນຄ່າຫລາຍພັນລ້ານທີ່ລັດຖະບານອົດສະຕຣາລີເຄີຍລົງນາມຈະຊື້ເຮືອດຳນ້ຳຝຣັ່ງເມື່ອປີ 2016 ສົ່ງຜົນໃຫ້ຝຣັ່ງໃນສະຖານະປະເທດເອີຣົບທີ່ເປັນພັນທະມິດທີ່ຍາວນານຂອງອົດສະຕຣາລີຖືກສັ່ນຄອນ.
ດ້ານທູດຝຣັ່ງປະຈຳອາເມລິກາຈະເດີນທາງກັບວໍຊິງຕັນໃນອາທິດໜ້າ ຫລັງຜູ້ນຳທັງສອງປະເທດຕັດສິນໃຈຈະເປີດພື້ນທີ່ປຶກສາຫາລືທາງເລິກ ມຸ້ງສ້າງເງື່ອນໄຂ ແລະ ຫລັກປະກັນທີ່ຈະດຳເນີນນະໂຍບາຍ ເພື່ອໃຫ້ບັນລຸວັດຖຸປະສົງທີ່ທັງສອງປະເທດມີຮ່ວມກັນ.
ອ້າງອີງ:
- https://www.aljazeera.com/news/2021/9/22/biden-and-macron-agree-to-meet-next-month-in-push-to-repair-ties
- https://www.yahoo.com/news/macron-send-envoy-back-u-162456914.html
- https://uk.news.yahoo.com/analysis-french-break-blow-bidens-201759963.html
