ໂຄວິດ-19 ຖ່ວງດຶງການຟື້ນໂຕຂອງເສດຖະກິດ ຢູ່ ສປປ ລາວ ຄາດວ່າຈະຂະຫຍາຍໂຕໃນອັດຕາ 2,3% ໃນປີ 2021
ອີງຕາມບົດລາຍງານຈາກ ທະນາຄານພັດທະນາອາຊີ (ADB) ທີ່ໄດ້ເຜີຍແຜ່ໃນວັນທີ 22 ກັນຍາ 2021 ວ່າ: ການຟື້ນໂຕຂອງເສດຖະກິດຂອງຢູ່ ສປປ ລາວ ໄດ້ຊັກຊ້າລົງ, ເນື່ອງຈາກການລະບາດໂຄວິດ-19ໃນຮອບນີ້ໄດ້ນຳໄປສູ່ການປິດປະເທດ ແລະ ເຮັດໃຫ້ການໃຊ້ຈ່າຍຫລຸດລົງ.
ຕາມບົດລາຍງານເສດຖະກິດການຄາດຄະເນການພັດທະນາຂອງອາຊີປະຈຳປີ 2021 ສະບັບປັບປຸງ, ເສດຖະກິດຂອງ ສປປ ລາວ ຄາດວ່າຈະຂະຫຍາຍໂຕໃນອັດຕາ 2,3% ໃນປີ 2021 ເມື່ອທຽບໃສ່ 4,0% ທີ່ໄດ້ຄາດຄະເນໄວ້ໃນ ເດືອນ ເມສາ ທີ່ຜ່ານມາ, ການຟື້ນໂຕຂອງເສດຖະກິດໃນທົ່ວໂລກຄາດວ່າຈະກະຕຸ້ນການເຕີບໂຕພາຍໃນປະເທດໃນປີ 2022, ເຖິງແມ່ນວ່າຈະຕໍ່າກວ່າທີ່ ADB ໄດ້ມີການຄາດຄະເນໄວ້ກ່ອນໜ້ານີ້.
ທ່ານ ນາງ ໂຊໂນມິ ທະນາກະ, ຜູ້ຕາງໜ້າ ADB ປະຈຳ ສປປ ລາວ ໄດ້ໃຫ້ຮູ້ວ່າ: “ບັນດານະໂຍບາຍໃນການຫລຸດຜ່ອນ ການລະບາດພະຍາດໂຄວິດ-19 ໄດ້ເຮັດໃຫ້ ການຜະລິດຂອງຂະແໜງອຸດສະຫະກຳຫລຸດລົງ ແລະ ສ້າງຜົນກະທົບຢ່າງໜັກ ໜ່ວງໃຫ້ແກ່ການເຕີບໂຕຂອງຂະແໜງ ການຄ້າຂາຍຍ່ອຍ, ການຂົນສົ່ງ ແລະ ການບໍລິການທ່ອງທ່ຽວ”. ນອກນັ້ນ, “ການຫລຸດລົງຂອງກິດຈະກໍາທາງດ້ານເສດຖະກິດ ໄດ້ເພີ່ມຈຳນວນຄົນວ່າງງານ ແລະ ຫລຸດລາຍໄດ້ຂອງຄົວເຮືອນລົງ, ໂດຍສະເພາະແມ່ນ ບັນດາແມ່ຍິງ ແລະ ຜູ້ທີ່ມີການສຶກສາບໍ່ສູງ. ການຟື້ນໂຕໄວຈາກການລະບາດພະຍາດແມ່ນຂຶ້ນກັບນະໂຍບາຍທີ່ຈະໃຫ້ການສະຫນັບສະໜູນແກ່ບັນດາທຸລະກິດ ແລະ ຄົວເຮືອນ ເພື່ອປັບໂຕເຂົ້າກັບ ‘ການດໍາລົງຊີວິດປົກກະຕິແບບໃໝ່’.”
ດ້ວຍຄວາມຕ້ອງການຢູ່ພາຍໃນປະເທດທີ່ຫລຸດລົງ ໂດຍສະເລ່ຍໃນໄລຍະ 7 ເດືອນທໍາອິດຂອງປີນີ້ ອັດຕາເງິນເຟີ້ ຢູ່ໃນລະດັບ 3,1%. ຄ່າສະກຸນເງິນກີບໄດ້ຫລຸດລົງເມື່ອທຽບກັບຄ່າສະກຸນເງິນຕາຕ່າງປະເທດ, ດ້ວຍຄວາມແຕກໂຕນຂອງ ອັດຕາແລກປ່ຽນ ລະຫວ່າງ ທາງການ ແລະ ທົ່ວໄປ ສໍາລັບເງິນກີບກັບເງິນໂດລາສະຫະລັດ ແມ່ນຫລາຍກວ່າ 20% ໃນໄລຍະ ເດືອນກໍລະກົດທີ່ຜ່ານມາ, ເຊິ່ງສະທ້ອນໃຫ້ເຫັນເຖິງການຂາດແຄນເງິນຕາຕ່າງປະເທດຢູ່ພາຍໃນ ຫລັງຈາກມີການຊໍາລະໜີ້ສິນຕ່າງປະເທດຂອງລັດຈຳນວນຫລາຍ. ການເກັບລາຍຮັບ ຍັງບໍ່ທັນກັບຄືນສູ່ລະດັບກ່ອນມີການແຜ່ລະບາດພະຍາດ ເຊິ່ງເຮັດໃຫ້ການເງິນພາກລັດຍັງຄົງຖືກຈໍາກັດ.
