ໄປບໍ່ລອດ! ຕົວການກໍ່ເຫດທຸບແວ່ນລົດ ມີປະຫວັດມາແລ້ວ 10 ກວ່າຄັ້ງ
ເຈົ້າໜ້າທີ່ພະແນກຕຳຫຼວດ ປກສ ເມືອງສີໂຄດຕະບອງ ໄດ້ຮັບແຈ້ງຈາກ ປກສ ກຸ່ມສີຖານເໜືອ ໃຫ້ຮູ້ວ່າ: ວັນທີ 20 ກັນຍາ 2021 ໄດ້ຈັບຄົນຮ້າຍທີ່ກໍ່ເຫດທຸບແມ່ນລົດ ແລ້ວລັກຊັບໃນລົດນັ້ນ ເຊິ່ງເຫດການເກີດຂຶ້ນແຕ່ວັນທີ 17 ກັນຍາ 2021 ຢູ່ບ້ານອຸບມຸງ ເມືອງສີໂຄດຕະບອງ ຜູ້ກ່ຽວຂີ່ລົດຈັກຮອນດ້າຄລິກໄອ ສີສົ້ມດຳ ມາທຸບແວ່ນລົດ ໂຕໂຍຕ້າປຣາຣາໂດ ທີ່ຈອດໄວ້ແຄມທາງ ເມື່ອສຳເລັດແລ້ວຈຶ່ງໜີໄປ ເຈົ້າໜ້າທີ່ຈຶ່ງນຳຈັບ.
ຜູ້ກໍ່ເຫດຊື່ ທ້າວ ມີນາ ອາຍຸ 39 ປີ ປະຊາຊົນ ບ້ານພະຂາວ ເມືອງໄຊທານີ ພົບເຫັນຂໍ້ມູນຫຼັກຖານທີ່ໃຊ້ກໍເຫດ ພ້ອມເງິນ 1.300.000 ກີບ, ມາດໍາເນີນຄະດີ.
ຜູ້ກ່ຽວ ຮັບສາລະພາບວ່າ: ໃນວັນທີ 17 ກັນຍາ 2021 ຕົນໄດ້ໂທຊວນໜູ່ຄົນໜຶ່ງ ໄປຊອກທຸບແວ່ນລົດໃຫຍ່ 2 ຄັນ, ໄດ້ກະເປົາ 1 ໜ່ວຍ ແລະ ອີກຄັນໜຶ່ງໄດ້ກະເປົາ 1 ໜ່ວຍ ໃນກະເປົາມີເງິນ 7 ລ້ານກີບ, 600 ຢວນ ແລະ ເອກະສານຈຳນວນໜຶ່ງຈິ່ງໄດ້ປັນເງິນກັນຈາກນັ້ນກໍແຍກຍ້າຍກັນກັບບ້ານ, ເຊິ່ງຜ່ານມາເຄີຍທຸບແວ່ນລົດໃຫຍ່ມາແລ້ວ 10 ຄັ້ງ.
ປັດຈຸບັນຄະດີດັ່ງກ່າວ ເຈົ້າໜ້າທີ່ໜ່ວຍງານວິຊາສະເພາະ ປກສ ເມືອງສີໂຄດຕະບອງ ພວມເລັ່ງສືບສວນ-ສອບສວນ ຂະຫຍາຍຜົນຊອກຫາກຸ່ມແກ້ງຮ່ວມຂະບວນການມາ ດຳເນີນຄະດີຕາມຂັ້ນຕອນຂອງກົດໝາຍ.
