ທ່ານ ສີຈິ້ງຜິງ ຢ້ຳຈີນບໍ່ຄິດຮຸກຮານປະເທດອື່ນ ໃຊ້ກຳລັງທະຫານແຊກແຊງບໍ່ຊ່ວຍຫຍັງ ພ້ອມບໍລິຈາກວັກຊີນອີກ 100 ລ້ານໂດສ
ຜູ້ນຳຈີນກ່າວໃນເວທີສະຫະປະຊາຊາດ ຢ້ຳຈີນບໍ່ຄິດຮຸກຮານປະເທດອື່ນ ພ້ອມປະກາດຢຸດສ້າງໂຮງໄຟຟ້າຖ່ານຫີນຂຶ້ນໃໝ່ນອກປະເທດ ແລະ ກຽມສົ່ງມອບວັກຊີນໃຫ້ໄດ້ 2 ພັນລ້ານໂດສພາຍໃນປີນີ້.
ວັນທີ 21 ກັນຍາ 2021, ປະທານປະເທດ ສີຈິ້ນຜິງ ອອກຖະແຫລງການຕໍ່ຜູ້ນຳທົ່ວໂລກໃນກອງປະຊຸມສະມັດຊາໃຫຍ່ສະຫະປະຊາຊາດ ເພື່ອສະແດງຈຸດຢືນຂອງຈີນໃນບັນຫາຕ່າງໆຜ່ານການສົ່ງວິດີໂອທີ່ອັດໄວ້ລ່ວງໜ້າ ເພື່ອມາເປີດໃນກອງປະຊຸມ.
ຜູ້ນຳຈີນເລືອກຈະບໍ່ເດີນທາງມາປະຊຸມດ້ວຍຕົນເອງຢູ່ມະຫານະຄອນນິວຢອກ ສະຫະລັດອາເມລິກາ ເຊັ່ນດຽວກັບຜູ້ນຳອີກປະມານ 1 ໃນ 3 ທີ່ເລືອກເຂົ້າປະຊຸມຜ່ານລະບົບວິດີໂອຄອນເຟີເຣນແທນ.
ທ່ານ ສີຈິ້ນຜິງ ເລີ່ມດ້ວຍການກ່າວວ່າ: ປະຊາທິປະໄຕບໍ່ແມ່ນສິດພິເສດສຳລັບບາງປະເທດ, ແຕ່ເປັນສິດຂອງທຸກປະເທດທີ່ຈະນຳມາໃຊ້, ການນຳເອົາກຳລັງທະຫານເຂົ້າໄປແຊກແຊງຈາກພາຍນອກ ແລະ ອ້າງວ່າຈະປ່ຽນຮູບແບບການປົກຄອງໄປສູ່ປະຊາທິປະໄຕ ບໍ່ໄດ້ຊ່ວຍຫຍັງນອກຈາກຈະເຮັດໃຫ້ເກີດອັນຕະລາຍ.
ໃນຖະແຫລງການຍັງເນັ້ນວ່າ: ຈີນຈະບໍ່ຮຸກຮານປະເທດອື່ນ ແລະ ຈະບໍ່ເຮັດຕົວເປັນເຈົ້າໂລກ.
ສ່ວນກໍລະນີທີ່ອາເມລິກາຈັບມືກັບອົດສະຕຣາລີ ແລະ ອັງກິດ ສ້າງຕັ້ງພັນທະມິດ AUKUS ເພື່ອຄັດຄ້ານອຳນາດຈີນໃນພາກພື້ນອິນໂດປາຊີຟິກນັ້ນ, ທ່ານ ສີຈິ້ນຜິງ ບໍ່ໄດ້ເອີ່ຍຊື່ໂດຍກົງ ໂດຍກ່າວພຽງວ່າ: ຂໍໃຫ້ບັນດາປະເທດປະຕິເສດການຈັດຕັ້ງກຸ່ມນ້ອຍໆ ທີ່ຕ້ອງມີຜູ້ແພ້ ແລະ ຜູ້ຊະນະ. ການທີ່ປະເທດໜຶ່ງຈະປະສົບຜົນສຳເລັດ ບໍ່ໄດ້ໝາຍຄວາມວ່າອີກປະເທດຕ້ອງລົ້ມເຫລວ ໂລກໜ່ວຍນີ້ກວ້າງພໍທີ່ທຸກປະເທດຈະພັດທະນາ ແລະ ກ້າວໄປທາງໜ້າໄດ້.
ນອກຈາກບັນຫາການເມືອງລະຫວ່າງປະເທດແລ້ວ, ໃນຫົວຂໍ້ຫລັກຂອງກອງປະຊຸມປີນີ້ເປັນການເລັ່ງໃສ່ການຕໍ່ສູ້ກັບໂຄວິດ-19 ແລະ ຮັບມືກັບສະພາບອາກາດປ່ຽນແປງ.
ທ່ານ ສີຈິ້ນຜິງ ປະກາດວ່າ: ຈີນຈະຢຸດສ້າງໂຮງໄຟຟ້າພະລັງຖ່ານຫີນຂຶ້ນໃໝ່ໃນຕ່າງປະເທດ ແລະ ຈະສະໜັບສະໜູນປະເທດກຳລັງພັດທະນາໃນການປ່ຽນຜ່ານສູ່ພະລັງງານສະອາດ ແລະ ພະລັງງານທີ່ປ່ອຍກາກບອນໃນລະດັບຕໍ່າ.
ແລະ ຈີນຈະສົ່ງມອບວັກຊີນປ້ອງກັນພະຍາດໂຄວິດ-19 ໃຫ້ໄດ້ 2 ພັນລ້ານໂດສ ພາຍໃນປີນີ້ ແລະ ຫລັງຈາກກ່ອນໜ້ານີ້ໄດ້ບໍລິຈາກເງິນ 100 ລ້ານໂດລາ ໃຫ້ໂຄງການໂຄແວກ (COVAX) ໄປແລ້ວ, ຈີນຈະບໍລິຈາກວັກຊີນໃຫ້ປະເທດກຳລັງພັດທະນາອີກ 100 ລ້ານໂດສໃນປີນີ້.
ອ້າງອີງ:
https://www.chinadaily.com.cn/…/WS614a30e8a310cdd39bc6a…
