ອາເມລິກາ ກຽມເປີດປະເທດເດືອນພະຈິກນີ້ ໃຫ້ຊາວຕ່າງປະເທດທີ່ສັກວັກຊີນຄົບ ສາມາດເດີນທາງເຂົ້າໄດ້

ຜູ້ທີ່ສັກວັກຊີນຄົບໂດສຈະສາມາດເດີນທາງເຂົ້າອາເມລິກາໄດ້ ໂດຍໃຊ້ຫລັກຖານການສັກວັກຊີນ ແລະ ຜົນກວດເປັນລົບກ່ອນເດີນທາງເທົ່ານັ້ນ ເລີ່ມຕົ້ນເດືອນພະຈິກນີ້.

ວັນທີ 20 ກັນຍາ 2021, ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂຈ ໄບເດນ ຂອງອາເມລິກາ ກຳລັງຈະເປີດຮັບຊາວຕ່າງປະເທດທີ່ສັກວັກຊີນປ້ອງກັນພະຍາດໂຄວິດ-19 ຄົບແລ້ວ ໃຫ້ເດີນທາງເຂົ້າປະເທດໄທ ໂດຍໃຊ້ພຽງໃບຮັບຮອງການສັກວັກຊີນ ແລະ ຜົນກວດເຊື້ອເປັນລົບພາຍໃນ 72 ຊົ່ວໂມງກ່ອນເດີນທາງ.

ຂໍ້ກຳນົດໃໝ່ນີ້ຈະເຮັດໃຫ້ຜູ້ທີ່ເດີນທາງມາຈາກປະເທດໃນກຸ່ມເຊງເກັ້ນ, ອັງກິດ, ໄອແລນ, ຈີນ, ອິນເດຍ, ອາຟຣິກາໃຕ້, ອີຣານ ແລະ ບຣາຊິລ ເຊິ່ງສ່ວນຫລາຍຍັງບໍ່ສາມາດເດີນທາງເຂົ້າອາເມລິກາໄດ້ໃນຕອນນີ້ ສາມາດເດີນທາງເຂົ້າໄດ້ໃນອີກ 2 ເດືອນຕໍ່ໜ້າ.

ໃນທາງກົງກັນຂ້າມ, ລັດຖະບານອາເມລິກາຈະປັບປຸງມາດຕະການໃຫ້ຮັດກຸມຍິ່ງຂຶ້ນ ສຳລັບຊາວອາເມລິກາທີ່ຍັງບໍ່ໄດ້ສັກວັກຊີນ ໂດຍຈະຕ້ອງມີຜົນກວດເຊື້ອເປັນລົບຈາກປະເທດຕົ້ນທາງ ແລະ ເມື່ອເດີນທາງມາເຖິງອາເມລິກາແລ້ວ ຕ້ອງສະແດງຫລັກຖານການຈ່າຍເງິນສຳລັບການຈອງຄິວກວດເຊື້ອ ແລະ ການກວດເຊື້ອອີກຮອບໜຶ່ງ.

ປັດຈຸບັນຍັງບໍ່ມີການລະບຸວັນທີແນ່ນອນວ່າຈະເລີ່ມເປີດໃຫ້ຜູ້ທີ່ສັກວັກຊີນຄົບສາມາດເດີນທາງເຂົ້າໄດ້ເມື່ອໃດ ໂດຍທ່ານ ເຈບ ໄຊເອນ ທີ່ປຶກສາປະຈຳທຳນຽບຂາວ ຜູ້ທີ່ອອກມາໃຫ້ຂໍ້ມູນເລື່ອງນີ້ ລະບຸວ່າ: ເປັນຊ່ວງຕົ້ນເດືອນພະຈິກ.

ຜ່ານມາ ອາເມລິກາອະນຸຍາດໃຫ້ຊາວຕ່າງປະເທດ 150 ກວ່າປະເທດ ສາມາດເດີນທາງເຂົ້າໄດ້, ແຕ່ຕໍ່ຈາກນີ້ຈະປ່ຽນຈາກລະບົບເກົ່າທີ່ເບິ່ງຈາກປະເທດຕົ້ນທາງເປັນຫລັກ ມາເບິ່ງຈາກສະຖານະການສັກວັກຊີນແທນ.

ອີກໜຶ່ງເລື່ອງທີ່ຍັງບໍ່ໄດ້ຮັບການຢືນຢັນ ຄືຍີ່ຫໍ້ວັກຊີນທີ່ສັກ ເຊິ່ງຕອນນີ້ອາເມລິກາຮັບຮອງວັກຊີນພຽງ 3 ຍີ່ຫໍ້ຄື: ໄຟເຊີ, ໂມເດິນາ ແລະ ຈອນສັນແອນຈອນສັນເທົ່ານັ້ນ.

ໃນເລື່ອງນີ້ ທຳນຽບຂາວຈະສົ່ງເລື່ອງຕໍ່ໃຫ້ສູນຄວບຄຸມ ແລະ ປ້ອງກັນພະຍາດແຫ່ງຊາດ ຫລື CDC ເປັນຜູ້ພິຈາລະນາ ແລະ ຈະປະກາດຂໍ້ກຳນົດທີ່ແນ່ນອນອອກມາອີກ.

ອ້າງອີງ:

https://edition.cnn.com/…/biden…/index.html

https://www.france24.com/…/20210920-us-to-end-travel…

https://www.cnbc.com/…/us-to-ease-travel-restrictions…