ເກີດເຫດຍິງກັນໃນມະຫາວິທະຍາໄລແຫ່ງໜຶ່ງໃນຣັດເຊຍ ເສຍຊີວິດຢ່າງໜ້ອຍ 6 ຄົນ ຂະນະທີ່ມືປືນບາດເຈັບຫລັງຂັດຂືນການຈັບກຸມ
ວັນທີ 20 ກັນຍາ 2021, ມີລາຍງານວ່າ: ນັກສຶກສາຄົນໜຶ່ງກໍ່ເຫດຍິງປືນຢູ່ Perm State University ໃນເມືອງເພິມຂອງຣັດເຊຍ ເຊິ່ງຢູ່ຫ່າງຈາກນະຄອນຫລວງມອສໂກໄປທາງຕາເວັນອອກປະມານ 1.300 ກິໂລແມັດ ເຮັດໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ບາດເຈັບອີກຫລາຍຄົນ.
ພາບທີ່ປາກົດຈາກສື່ສະແດງໃຫ້ເຫັນນັກສຶກສາຫລາຍຄົນທີ່ໂດດຈາກປ່ອງຢ້ຽມຊັ້ນ 1 ເພື່ອໜີອອກຈາກອາຄານ ກ່ອນຈະໜີໄປບ່ອນປອດໄພ ແລະ ນັກສຶກສາຄົນໜຶ່ງຍັງໃຫ້ສຳພາດຕໍ່ Reuters ວ່າ: ພວກເຂົາສ້າງເຄື່ອງກີດຂວາງໂດຍໃຊ້ຕັ່ງ ບໍ່ໃຫ້ຜູ້ກໍ່ເຫດເຂົ້າມາໃນຫ້ອງຮຽນຂອງພວກເຂົາ.
ຄະນະກຳມະການສອບສວນລະບຸວ່າ: ຜູ້ກໍ່ເຫດເປັນນັກສຶກສາຂອງມະຫາວິທະຍາໄລແຫ່ງໜຶ່ງ ເຊິ່ງໄດ້ຮັບປືນໄຣເຟິລສຳລັບລ່າສັດມາເມື່ອເດືອນພຶດສະພາ, ລາວໄດ້ຮັບບາດເຈັບຫລັງຈາກຂັດຂືນການຈັບກຸມ ແລະ ກຳລັງຮັບການປິ່ນປົວຢູ່ໂຮງໝໍ, ສ່ວນສື່ທ້ອງຖິ່ນລະບຸວ່າ: ຜູ້ກໍ່ເຫດເປັນນັກສຶກສາອາຍຸ 18 ປີ ແລະ ກ່ອນໜ້ານີ້ ລາວໄດ້ໂພສຮູບຂອງຕົນເອງລົງສື່ສັງຄົມອອນລາຍກັບປືນໄຣເຟິລ, ໝວກກັນກະທົບ ແລະ ລູກປືນ, ແຕ່ Reuters ລະບຸວ່າ: ຍັງບໍ່ສາມາດຢືນຢັນພາບຖ່າຍດັ່ງກ່າວໄດ້. ລາຍງານຂ່າວລະບຸວ່າ: ຜູ້ກໍ່ເຫດກະທຳການພຽງຄົນດຽວ ແລະ ຜູ້ກໍ່ເຫດບອກວ່າລາວບໍ່ໄດ້ມີແຮງຈູງໃຈທາງການເມືອງ ຫລື ສາສະໜາ ພຽງແຕ່ກະທຳໄປດ້ວຍຄວາມກຽດຊັງ.
ເຫດການໃນຄັ້ງນີ້ເປັນເຫດກາດຍິງຄັ້ງຫລ້າສຸດ ໂດຍໃນເດືອນພຶດສະພາຜ່ານມາກໍມີເຫດກາດຍິງຢູ່ໂຮງຮຽນແຫ່ງໜຶ່ງໃນເມືອງຄາຊານ ໂດຍຜູ້ກໍ່ເຫດເປັນໄວລຸ້ນ ເຊິ່ງເຮັດໃຫ້ມີຜູ້ເສຍຊີວິດ 9 ຄົນ ແລະ ບາດເຈັບຈຳນວນຫລາຍເຊັ່ນກັນ. ຣັດເຊຍໄດ້ແກ້ກົດໝາຍເພີ່ມອາຍຸຂັ້ນຕໍ່າໃນການຊື້ອາວຸດປືນຈາກ 18 ປີ ເປັນ 21 ປີ ຫລັງເຫດກາດຍິງໃນເມືອງຄາຊານ ແຕ່ກົດໝາຍໃໝ່ນີ້ຍັງບໍ່ມີຜົນບັງຄັບໃຊ້.
ອ້າງອີງ:
