ແນວລາວສ້າງຊາດນະຄອນຫລວງວຽງຈັນອອກແຈ້ງການ ບໍ່ອະນຸຍາກໃຫ້ເຂດທີ່ຕິດເຊື້ອຈັດງານບຸນຫໍ່ເຂົ້າສະຫລາກ

ໂດຍອີງໃສ່ສະພາບການລະບາດ ຂອງພະຍາດ COVID-19 ຢູ່ພາຍໃນນະຄອນຫຼວງວຽງຈັນ ເຫັນວ່າ ຍັງມີກໍລະນີຜູ້ຕິດເຊື້ອໃນຊຸມຊົນເພີ່ມຂື້ນຫຼາຍ ຊຶ່ງມີຄວາມສ່ຽງສູງ ທີ່ຈະແຜ່ລະບາດໃນຊຸມຊົນ ແລະຂະຫຍາຍເປັນວົງກວ້າງ ເພື່ອເປັນການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ
ຂອງພະຍາດ COVID-19; ພ້ອມທັງເປັນການຫຼຸດຜ່ອນຄວາມສ່ຽງ ທີ່ອາດຈະເກີດຂຶ້ນ ຕໍ່ສຸຂະພາບ ແລະ ຊີວິດ ຂອງປະຊາຊົນບັນດາເຜົ່າ ໃນທົ່ວນະຄອນຫຼວງວຽງຈັນ; ແນວລາວສ້າງຊາດ ນະຄອນຫຼວງວຽງຈັນ ຂໍຖືເປັນກຽດແຈ້ງມາຍັງ ແນວລາວສ້າງຊາດ 09 ຕົວເມືອງ, ແນວລາວສ້າງຊາດບ້ານ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າ ທົ່ວນະຄອນຫຼວງວຽງຈັນ ໃຫ້ປະຕິບັດດັ່ງນີ້:
1. ໃຫ້ເອົາໃຈໃສ່ຈັດຕັ້ງປະຕິບັດ ແຈ້ງການຂອງຄະນະສະເພາະກິດ ນະຄອນຫຼວງວຽງຈັນ, ສະບັບເລກທີ 28/ສພກ.ນວ, ລົງວັນທີ 16 ກັນຍາ 2021, ກ່ຽວກັບການເພີ່ມທະວີ ຈັດຕັ້ງປະຕິບັດມາດຕະການປ້ອງກັນຄວບຄຸມ ແລະ ສະກັດກັ້ນການລະບາດ ຂອງພະຍາດ COVID-19 ຢູ່ນະຄອນຫຼວງວຽງຈັນ ໃນໄລຍະວັນທີ 16-30 ກັນຍາ 2011 ຢ່າງເຂັ້ມງວດ.

2. ສຳລັບບຸນຫໍ່ເຂົ້າສະຫຼາກ ວັນທີ 21 ກັນຍາ 2021 ແມ່ນເຫັນດີໃຫ້ແຕ່ລະວັດຕັ້ງບາດ, ເຮັດພິທີທາງສາສະໜາ ດ້ວຍວິທີ ທີ່ບໍ່ໃຫຍ່ໂຕ, ຄົນຮ່ວມບໍ່ຫຼາຍ, ຮັກສາໄລຍະຫ່າງເວລາໃສ່ບາດແລ້ວ ໃຫ້ລົງຢາດນ້ຳ ແລະກັບບ້ານເລີຍ, ການມາໃສ່ບາດ ກໍ່ບໍ່ຄວນມາເວລາດຽວກັນ ສຳລັບບ້ານ/ວັດ ທີ່ບໍ່ນອນຢູ່ໃນພື້ນທີ່ສີແດງ.

3. ຫ້າມຈັດງານບຸນປະເພນີ (ວັນບຸນຫໍ່ເຂົ້າສະຫຼາກ) ໃນວັນທີ 21 ກັນຍາ 2021 ຢູ່ບ້ານວັດ ໃນພື້ນທີ່ ເຂດ/ບ້ານແດງ ໃນນະຄອນຫຼວງວຽງຈັນ ຢ່າງເດັດຂາດ.

4. ໃນພື້ນທີ່ແດງ ບໍ່ໃຫ້ອອກປີນບາດ ເພາະສ່ຽງຕໍ່ການລະບາດ ນັບທັງຜູ້ຕັກ ແລະ ພຣະສົງ.

5. ມອບໃຫ້ແນວລາວສ້າງຊາດ 09 ຕົວເມືອງ, ແນວລາວສ້າງຊາດບ້ານ ສົມທົບກັບ ອົງການປົກຄອງເມືອງ, ບ້ານ ແລະ ການຈັດຕັ້ງກ່ຽວຂ້ອງ ທຸກພາກສ່ວນ ແຈ້ງໃຫ້ພະນັກງານ – ລັດຖະກອນ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າ ທົ່ວນະຄອນຫຼວງວຽງຈັນ ຢ່າງທົ່ວເຖິງ.

6. ມອບໃຫ້ແນວລາວສ້າງຊາດ 09 ຕົວເມືອງ, ແນວລາວສ້າງຊາດບ້ານ ສົມທົບກັບ ເຈົ້າໜ້າທີ່ປ້ອງກັນຄວາມສະຫງົບຂັ້ນເມືອງ, ຂັ້ນບ້ານ ແລະ ການຈັດຕັ້ງກ່ຽວຂ້ອງ ທຸກພາກສ່ວນ ເປັນເຈົ້າການເຄື່ອນໄຫວຕິດຕາມກວດກາ; ຖ້າພົບເຫັນມີການລະເມີດໃນການຈັດງານບຸນ ໃຫ້ເຈົ້າໜ້າທີ່ປະຕິບັດຕາມຄໍາສັ່ງເລກທີ015/ຈນວ ແລະ ແຈ້ງການ ເລກທີ 28/ສພກ.ນວ ຢ່າງເຂັ້ມງວດ.

ດັ່ງນັ້ນ, ຈື່ງແຈ້ງມາຍັງບັນດາທ່ານ ພ້ອມກັນຈັດຕັ້ງປະຕິບັດ ຕາມເນື້ອໃນແຈ້ງການສະບັບນີ້ດ້ວຍ.
ຄະນະກຳມະການ
ແນວລາວສ້າງຊາດ ນະຄອນຫຼວງວຽງຈັນ