ປັບໃໝເຈົ້າຂອງຮ້ານອິນເຕີເນັດ STY ທີ່ລະເມີດຄໍາສັ່ງ ພ້ອມທັງຢຶດອຸປະກອນຄອມພິວເຕີ

ອີງຕາມກອງບັນຊາການປ້ອງກັນຄວາມສະຫງົບນະຄອນຫລວງວຽງຈັນ ລາຍງານວ່າ: ເຈົ້າໜ້າທີ່ພະແນກຕໍາຫລວດປ້ອງກັນເສດຖະກິດ ຫ້ອງຕໍາຫລວດ ປກສ ນະຄອນຫລວງວຽງຈັນ ໄດ້ປັບໄໝ ແລະ ຢຶດອຸປະກອນ ຮ້ານອິນເຕີເນັດກາເຟ STY ຕັ້ງຢູ່ບ້ານຈັນສະຫວ່າງ ເມືອງສີໂຄດຕະບອງ ນະຄອນຫລວງວຽງຈັນ ທີ່ລະເມີດຄໍາສັ່ງເລກທີ 15/ນຍ ແລະ ແຈ້ງການເລກທີ 015/ຈນວ ພ້ອມທັງຢຶດອຸປະກອນຄອມພິວເຕີ 1 ຊຸດ, ເຄື່ອງປິ່ນເຊີ້ 1 ເຄື່ອງ ມາໄວ້ຫ້ອງຕໍາຫລວດ ປກສ ນວ.

ພັຕ ບຸນພອນ ຈິດຕະວົງ ຮອງກອງປ້ອງກັນເສດຖະກິດ ພະແນກຕໍາຫລວດປ້ອງກັນເສດຖະກິດ ຫ້ອງຕໍາຫລວດ ປກສ ນວ ໃຫ້ຮູ້ວ່າ: ໃນວັນທີ 15 ກັນຍາ 2021, ເຈົ້າໜ້າທີ່ພະແນກຕໍາຫຼວດປ້ອງກັນເສດຖະກິດ ໄດ້ສົບທົບກັບພາກສ່ວນກ່ຽວຂ້ອງ ລົງກວດກາຮ້ານອິນເຕີເນັດ ທີ່ຍັງລັກລອບເປີດໃຫ້ບໍລິການ ຫລິ້ນເກມທາງອອນລາຍຂອງ ນາງ ທິບທິດາ ເຊິ່ງຕັ້ງຢູ່ບ້ານຈັນສະຫວ່າງ ເມືອງສີໂຄດຕະບອງ ເຈົ້າໜ້າທີ່ຈຶ່ງໄດ້ສຶກສາອົບຮົມ ແລະ ປັບໄໝຕາມແຈ້ງການ ເລກທີ 20/ສພກ, ລົງວັນທີ 3 ສິງຫາ 2021.

ເພື່ອປ້ອງກັນສະກັດກັ້ນ, ຄວບຄຸມການແພ່ລະບາດຂອງພະຍາດໂຄດວິດ-19 ກອງບັນຊາການ ປກສ ນວ, ຂໍຮຽກຮ້ອງມາຍັງບັນດາອິນເຕີເນັດກາເຟໃຫ້ຢຸດເຊົາ ພ້ອມທັງປະຕິບັດຕາມຄໍາສັ່ງ ແລະ ແຈ້ງການຢ່າງເຂັ້ມງວດ ເພາະຢູ່ໃນໄລຍະພະຍາດໂຄວິດ-19 ຍັງແພ່ລະບາດ. ຖ້າຫາກຍັງມີການລັກເປີດໃຫ້ບໍລິການ ແມ່ນຈະນໍາໃຊ້ມາດຕະການປັບໃໝຢ່າງເຂັ້ມງວດ ໂດຍບໍ່ມີຂໍ້ຍົກເວັ້ນ.