ນາຍົກລັດຖະມົນຕີສິງກະໂປ ສັກວັກຊີນເຂັມກະຕຸ້ນ ໝັ້ນໃຈເພີ່ມພູມຕ້ານທານຕ້ານໂຄວິດ

ນາຍົກລັດຖະມົນຕີ ລີຊຽນລຸງ ຂອງສິງກະໂປ ເຂົ້າຮັບການສັກວັກຊີນຕ້ານໂຄວິດເຂັມທີ 3 ຫລື ເຂັມກະຕຸ້ນ (Booter Shot) ທີ່ Singapore General Hospital ເພື່ອກະຕຸ້ນການສ້າງພູມຕ້ານທານ ຫລັງຈາກທີ່ໄດ້ຮັບການສັກວັກຊີນ Pfizer-BioNTech ຄົບ 2 ໂດສແລ້ວໃນທ້າຍເດືອນມັງກອນຜ່ານມາ.

ການສັກວັກຊີນເຂັມກະຕຸ້ນຂອງຜູ້ນຳສິງກະໂປມີຂຶ້ນຫລັງຈາກລັດຖະບານສິງກະໂປປະກາດໃນຕົ້ນເດືອນກັນຍາຜ່ານມາວ່າ: ຈະເລີ່ມຕົ້ນການສັກວັກຊີນເຂັມກະຕຸ້ນໃຫ້ປະຊາຊົນໃນກຸ່ມທີ່ມີພູມຕ້ານທານບົກຜ່ອງລະດັບປານກາງເຖິງຮຸນແຮງ ແລະ ກຸ່ມຜູ້ມີອາຍຸ 60 ປີຂຶ້ນໄປ ລວມທັງຜູ້ທີ່ອາໄສໃນສະຖານເບິ່ງແຍງຜູ້ສູງອາຍຸ.

ເຊິ່ງກະຊວງສາທາລະນະສຸກສິງກະໂປຊີ້ວ່າ: ກຸ່ມຜູ້ສູງອາຍຸມີຄວາມສ່ຽງຈະປ່ວຍໜັກຖ້າຕິດເຊື້ອໂຄວິດ ແລະ ອາດມີການສ້າງພູມຕ້ານທານຂ້ອນຂ້າງຕໍ່າ ເຖິງວ່າຈະສັກວັກຊີນຄົບ 2 ໂດສ.

ຂະນະທີ່ ນາຍົກລັດຖະມົນຕີ ລີຊຽນລຸງ ເຊິ່ງອາຍຸ 69 ປີ ໄດ້ໂພສວິດີໂອ ແລະ ຂໍ້ຄວາມຜ່ານ Facebook ຫລັງສັກວັກຊີນ ໂດຍສະໜັບສະໜູນໃຫ້ປະຊາຊົນທີ່ເຂົ້າຂ່າຍຮີບເຂົ້າຮັບວັກຊີນເຂັມກະຕຸ້ນຖ້າໄດ້ຮັບການສະເໜີໃຫ້ສັກ ເພື່ອຊ່ວຍຫລຸດໂອກາດໃນການປ່ວຍໜັກຈາກການຕິດເຊື້ອໂຄວິດ.

ທັງນີ້, ຄະນະກຳມະການຜູ້ຊ່ຽວຊານດ້ານວັກຊີນໂຄວິດຂອງສິງກະໂປແນະນຳໃຫ້ປະຊາຊົນອາຍຸ 60 ປີ ແລະ ເກີນກວ່ານັ້ນ ຄວນໄດ້ຮັບການສັກວັກຊີນເຂັມກະຕຸ້ນທີ່ເປັນວັກຊີນຊະນິດ mRNA ໃນໄລຍະ 6-9 ເດືອນຫລັງຈາກສັກວັກຊີນຫລັກຄົບ 2 ໂດສ.

ເຊິ່ງຜູ້ສູງອາຍຸທີ່ໄດ້ຮັບການສັກວັກຊີນຄົບ 2 ໂດສຢ່າງໜ້ອຍ 6 ເດືອນ ຈະໄດ້ຮັບ SMS ພ້ອມລິງສຳລັບນັດໝາຍເຂົ້າຮັບການສັກວັກຊີນເຂັມກະຕຸ້ນ.

ສຳລັບສະຖານະການການລະບາດຂອງໂຄວິດໃນສິງກະໂປພົບວ່າ: ໃນອາທິດຜ່ານມາມີຜູ້ຕິດເຊື້ອໃໝ່ເພີ່ມຂຶ້ນສະເລ່ຍ 800-900 ຄົນ ແລະ ມີຜູ້ຕິດເຊື້ອສະສົມປະມານ 74.000 ຄົນ, ເສຍຊີວິດ 59 ຄົນ ເຊິ່ງສູງທີ່ສຸດໃນຮອບຫລາຍເດືອນ ເຖິງວ່າປັດຈຸບັນ ສິງກະໂປຈະເປັນໜຶ່ງໃນປະເທດທີ່ມີອັດຕາການສັກວັກຊີນສູງທີ່ສຸດໃນໂລກ ໂດຍມີປະຊາຊົນໄດ້ຮັບການສັກວັກຊີນຄົບໂດສແລ້ວຫລາຍກວ່າ 81% ຈາກປະຊາກອນທັງໝົດປະມານ 5,9 ລ້ານຄົນ.

ອ້າງອີງ:

https://www.channelnewsasia.com/singapore/pm-lee-receive-covid-19-vaccine-booster-third-dose-2184256