ກະຊວງການເງິນ-ບໍລິສັດ ຫົວເຫວີຍ ລົງນາມບັນທຶກຄວາມເຂົ້າໃຈສຳຫຼວດອອກແບບໂຄງການລະບົບຄຸ້ມຄອງການເງິນພາກລັດເປັນດິຈີຕອນ
ໃນວັນທີ 16 ກັນຍາ 2021 ທີ່ຫ້ອງປະຊຸມໃຫຍ່ກົມສ່ວຍສາອາກອນ, ກະຊວງການເງິນ ແລະ ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ, ໄດ້ລົງນາມເຊັນບົດບັນທຶກຄວາມເຂົ້າໃຈເພື່ອສຳຫຼວດອອກແບບໂຄງ ການລະບົບຄຸ້ມຄອງການເງິນພາກລັດ ແລະ ສ້າງແຜນຍຸດທະສາດພັດທະນາຄຸ້ມຄອງງົບປະມານແຫ່ງລັດລາຍຮັັບ-ລາຍຈ່າຍ ເປັນດິຈີຕອນ.
ໂດຍຕາງໜ້າລົງນາມຂອງທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ກັບ ທ່ານ ເຄວິນ ຫູ ປະທານ ບໍລິສັດ ຫົວເຫວີຍ ເທັກໂນໂລຢີ (ລາວ) ຈໍາກັດຜູ້ດຽວ, ໂດຍການເປັນກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີກະຊວງ ເຕັກໂນໂລຊີ ແລະ ການສື່ສານ, ມີທ່ານ ໄຊຊະນະ ສິດທິພອນ ປະທານຄະນະກຳມະການຮ່ວມມືລາວ-ຈີນ,ທ່ານ ຫົວໜ້າຫ້ອງການກະຊວງການເງິນ, ຫົວໜ້າສະຖາບັນ, ຮອງຫົວໜ້າກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂຄງການລະບົບຄຸ້ມຄອງການເງິນພາກລັດເປັນດິຈີຕອນ, ເພື່ອເປັນການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ແຜນງົບປະມານແຫ່ງລັດ 5 ປີ (2021-2025) ລັດຖະບານ ສປປ ລາວ, ໄດ້ມີນະໂຍບາຍ ແລະ ມາດຕະການປະຕິຮູບແບບຮອບດ້ານ.ໃນນັ້ນ, ກໍແມ່ນການປະຕິຮູບວຽກງານຂະແໜງ ການເງິນເປັນອັນສຳຄັນ, ຊຶ່ງຕະຫຼອດໄລຍະ 10 ຜ່ານມາ, ກະຊວງການເງິນໃນນາມເປັນຜູ້ຈັດຕັ້ງຜັນຂະຫຍາຍນະ ໂຍບາຍດັ່ງກ່າວໄດ້ຖືເອົາການຫັນວຽກງານຂະແໜງການເງິນເປັນທັນສະໄໝເປັນບຸລິມະສິດ ໂດຍມີວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ຊຶ່ງໃນຍຸດທະສາດທີ 7 ກໍຄືການພັດທະນາຂະ ແໜງການເງິນພາກລັດເປັນທັນສະໄໝທຽບເທົ່າພາກພື້ນ ແລະ ສາກົນ,ພ້ອມນັ້ນກໍໄດ້ກຳນົດເຂົ້າໃນ 7 ທິດທາງລວມ ແລະ ຄາດໝາຍສູ້ຊົນແຜນພັດທະນາຂະແໜງການເງິນໄລຍະ 5 ປີ (2021-2025).
ການພັດທະນາລະບົບຄຸ້ມຄອງຂໍ້ມູນຂ່າວສານການເງິນ-ງົບປະມານ ແລະ ການບໍລິຫານລັດດ້ວຍກົດໝາຍໃຫ້ມີຄວາມສັກສິດ, ເປັນທັນສະໄໝ ແລະ ກ້າວໄປສູ່ລະບົບດີຈີຕອນ, ໃນສະພາບຄວາມຫຍຸ້ງຍາກທາງດ້ານການເງິນ-ງົບປະມານ ກະຊວງການເງິນໄດ້ສຸມໃສ່ປະຕິຮູບ ແລະ ພັດທະນາຂະແໜງການເງິນຢ່າງຮອບດ້ານໃຫ້ເປັນຮູບປະທຳ, ສຸມໃສ່ປັບປຸງນະໂຍບາຍ, ມາດຕະການ ແລະ ກົນໄກເພື່ອເປັນເຄື່ອງມືຄຸ້ມຄອງງົບປະມານແຫ່ງລັດໃຫ້ມີປະສິດທິພາບ, ຫຼຸດຂອດຂັ້ນ ແລະ ສິ່ງອຸດຕັນຕ່າງໆ, ອັດ ແລະ ຫຼຸດຊ່ອງຫວ່າງການຮົ່ວໄຫຼ ແລະ ປະກົດການຫຍໍ້ທໍ້ໃນຂະແໜງການເງິນ.
ອີງຕາມຄວາມຮຽກຮ້ອງຕ້ອງການໃນປັດຈຸບັນ ການຫັນເປັນດີຈີຕອນ ເພື່ອເປັນເຄື່ອງມືອັນໜັກແໜ້ນໃນການບັນລຸຍຸດທະສາດ ແລະ ຄາດໝາຍສູ້ຊົນລວມຂອງຂະແໜງການເງິນ ກ້າວສູ່ລະບົບຄຸ້ມຄອງການເງິນແຫ່ງລັດ ເປັນທັນສະໄໝທີ່ມີຄວາມເຂັ້ມແຂງ, ໂປ່ງໃສ, ເປັນດີຈີຕອນ ແລະ ຍຸຕິທຳ, ໂຄງການລະບົບຄຸ້ມຄອງການເງິນພາກລັດເປັນດິຈີຕອນ, ໂດຍແມ່ນບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ, ເປັນຜູ້ສໍາຫຼວດ, ອອກແບບກ່ຽວກັບລະບົບພາສີອັດສະລິຍະ (Smart Customs); ລະບົບຄຸ້ມຄອງອາກອນແບບລວມສູນ (Integrated Tax Information Systems); ສູນວິເຄາະວິໃຈການເງິນພາກລັດ (Public Financial Data Analytic Center for Big Data Platform);ລະບົບຄຸ້ມຄອງຫ້ອງການແບບດິຈິຕອນ (Digital Office Automation Platform) ແລະ ລະບົບຄຸ້ມຄອງບຸກຄະລາກອນ (Personnel Management System); ລະບົບຄຸ້ມຄອງລັດວິສາຫະກິດ (State Owned Enterprise Management Systems); ລະບົບເຊື່ອມຕໍ່ຂໍ້ມູນບັນຊີຂອງຫົວໜ່ວຍທຸລະກິດ (Interfacing with Enterprises Accounting Systems); ລະບົບການຊໍາລະສະສາງແບບດິຈິຕອນ (Digital Payment Gateway); ພື້ນຖານໂຄງລ່າງເຄືອຂ່າຍ ແລະ ຄວາມປອດໄພແບບຄລາວ (MOF Cloud).
ໂດຍໂຄງການດັ່ງກ່າວບໍລິສັດ ຫົວເຫວີຍ ຈະເຮັດການສໍາຫຼວດ, ອອກແບບ ແລະ ພັດທະນາລະບົບຄຸ້ມຄອງການເງິນພາກລັດແບບດິຈີຕອນ, ກຳນົດກົນລະຍຸດການປ່ຽນແປງທາງດິຈີຕອນໃຫ້ສຳເລັດໃນໄລຍະເວລາ 03 ເດືອນພາຍຫຼັງເຊັນບົດບັນທຶກເຂົ້າໃຈ ແລະ ກະຊວງການເງິນຈະໄດ້ນໍາສະເໜີຕໍ່ລັດຖະບານ,ເພື່ອພິຈາລະນາຮັບຮອງເອົາການຫັນວຽກງານການເງິນເປັນດິຈີຕອນ ເຂົ້າເປັນແຜນງານຂອງລັດຖະບານ ສປປ ລາວ, ກ່ອນການເຂົ້າສູ່ການ ຈັດຕັ້ງປະຕິບັດຕົວຈິງໃນປີ 2022-2023.
ນອກນັ້ນ, ກະຊວງການເງິນ ຍັງຈະໄດ້ມີການປະສານສົມທົບ ແລະ ເຮັດວຽກຮ່ວມກັບບັນດາຂະແໜງ ການທີ່ກ່ຽວຂ້ອງ, ເພື່ອຮັບປະກັນໃຫ້ລະບົບຄຸ້ມຄອງການເງິນພາກລັດ, ໄດ້ມາດຕະຖານ, ສາມາດເຊື່ອມຕໍ່ກັບຂະ ແໜງການທີ່ກ່ຽວຂ້ອງໄດ້ຢ່າງມີປະສິດທິພາບ ປະສິດທິຜົນ ນຳອີກດ້ວຍ.
