ກຸ່ມໄວໜຸ່ມໄວຄະນອງຊຸມແຊວກັນຖືກປັບໃໝຜູ້ລະ 100.000 ກີບ
ເຈົ້າໜ້າທີ່ ປກສ ກຸ່ມສີວິໄລ ເປີດເຜີຍວ່າ: ວັນ 15 ກັນຍາ 2021, ເຈົ້າໜ້າທີ່ ປກສ ກຸ່ມສີວິໄລ ປະສານສົມທົບກັບ ການຈັດຕັ້ງບ້ານ ສາຍນ້ຳເງິນ ເມືອງໄຊທານີ ໃຊ້ມາດຕະການປັບໃໝຕໍ່ໄວລຸ້ນ ຈຳນວນ 12 ຄົນ, ຍິງ 7 ຄົນ ຕັ້ງວົງຊຸມແຊວເຫຼົ້າ-ເບຍ ຢູ່ຫ້ອງແຖວແຫ່ງໜຶ່ງ ເຂດບ້ານ ສາຍນ້ຳເງິນ ຜູ້ລະ 100.000 ກີບ ຕາມແຈ້ງການຂອງຄະນະສະເພາະກິດ ນະຄອນຫຼວງວຽງຈັນ ພາຍຫຼັງສຶກສາອົບຮົມໃຫ້ຮັບຮູ້ ແລະ ເຂົ້າໃຈຕໍ່ພຶດຕິກຳທີ່ມີຄວາມສ່ຽງ.
ການກະທຳດັ່ງກ່າວເປັນການລະເມີດຕໍ່ຄໍາສັ່ງເລກທີ 051/ຈນວ ລົງວັນທີ 30 ສິງຫາ 2021 ຈຶ່ງໄດ້ນຳເອົາພວກກ່ຽວຂຶ້ນມາຫ້ອງການ ປກສ ກຸ່ມ ຜ່ານການສອບຖາມເບື້ອງຕົ້ນຮູ້ໄດ້ວ່າພວກກ່ຽວ ແມ່ນມາຈາກຕ່າງແຂວງ ທີ່ເຂົ້າມາພັກເຊົາຢູ່ ນວ. ຫຼັງຈາກນັ້ນ, ເຈົ້າໜ້າທີ່ ຈຶ່ງໄດ້ສຶກສາອົບຮົມພ້ອມທັງນຳໃຊ້ມາດຕະການປັບໃໝ ຕາມແຈ້ງການເລກທີ 24/ສພກ ລົງວັນທີ 19 ສິງຫາ 2021 ວ່າດ້ວຍການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ນະຄອນຫຼວງວຽງຈັນ.
ຖ້າພົບເຫັນກຸ່ມຄົນຕັ້ງວົງຊຸມແຊວ ແລະ ມົ້ວສຸມຢາເສບຕິດ ທີ່ລະເມີດແຈ້ງການ, ຄໍາສັ່ງທີ່ຂັ້ງເທີງວາງອອກ ໃຫ້ລາຍງານເຈົ້າໜ້າທີ່ບ່ອນໃກ້ຄຽງ ຫຼື ແຈ້ງມາທາງວອດແອັບເບີ 02028899774
