ບຸກຄະລາກອນສາທາລະນະສຸກຝຣັ່ງ ຖືກສັ່ງພັກວຽກ 3.000 ຄົນ ເຫດຍັງບໍ່ຍອມໄປສັກວັກຊີນ
ຝຣັ່ງສັ່ງພັກວຽກບຸກຄະລາກອນສາທາລະນະສຸກທີ່ປະຕິເສດເຂົ້າຮັບການສັກວັກຊີນ ເຮັດໃຫ້ໂຮງໝໍບາງແຫ່ງເລີ່ມປະສົບບັນຫາຂາດຄົນແລ້ວ.
ວັນທີ 16 ກັນຍາ 2021, ສຳນັກຂ່າວບີບີຊີ (BBC) ລາຍງານວ່າ: ຝຣັ່ງເລີ່ມບັງຄັບໃຊ້ມາດຕະການກຳນົດໃຫ້ບຸກຄະລາກອນສາທາລະນະສຸກ ຈຳເປັນຕ້ອງເຂົ້າຮັບການສັກວັກຊີນປ້ອງກັນພະຍາດໂຄວິດ-19 ເພື່ອຈະສາມາດປະຕິບັດໜ້າທີ່ໄດ້ ເຮັດໃຫ້ມີຜູ້ທີ່ຖືກສັ່ງພັກວຽກໄປແລ້ວປະມານ 3.000 ຄົນ.
ມາດຕະການນີ້ຄວບຄຸມບຸກຄະລາກອນທົ່ວປະເທດ 2,7 ລ້ານຄົນ ທັງແພດ, ພະຍາບານ, ພະນັກງານໂຮງໝໍ, ອາສາສະໝັກ, ຜູ້ເບິ່ງແຍງຕາມເຮືອນ ແລະ ພະນັກງານມອດໄຟ.
ທ່ານ ໂອລິວິເຍ ເວີຣານ ລັດຖະມົນຕີກະຊວງສາທາລະນະສຸກຝຣັ່ງ ເປີດເຜີຍວ່າ: ການພັກວຽກສ່ວນຫລາຍມີຜົນພຽງຊົ່ວຄາວເທົ່ານັ້ນ.
ກ່ອນໜ້ານີ້, ປະທານາທິບໍດີ ເອັມມານູເອລ ມາຄຣົງ ເຄີຍປະກາດແຈ້ງເຕືອນລ່ວງໜ້າແຕ່ວັນທີ 12 ກໍລະກົດແລ້ວ ເພື່ອໃຫ້ກຸ່ມບຸກຄະລາກອນມີເວລາໃນການສັກວັກຊີນຢ່າງໜ້ອຍ 1 ໂດສ ພາຍໃນວັນທີ 15 ກັນຍາ ບໍ່ສະນັ້ນກໍໃຫ້ລາອອກຈາກວຽກ.
ຫລັງຈາກປະທານາທິບໍດີໄດ້ປະກາດອອກມາ, ເວັບໄຊສຳລັບການຈອງສັກວັກຊີນຄື Doctolib ປະສົບບັນຫາລົ້ມທັນທີ ຈາກການທີ່ຄົນຈຳນວນຫລາຍພະຍາຍາມເຂົ້າໄປຈອງຄິວ.
ເຖິງຢ່າງໃດກໍຕາມ, ເຖິງວ່າຈະຮອດເສັ້ນຕາຍທີ່ກຳນົດແລ້ວ ແຕ່ຍັງມີອີກຫລາຍພັນຄົນທີ່ບໍ່ຍອມໄປສັກ ເຮັດໃຫ້ເກີດຄວາມກັງວົນວ່າຈະເກີດບັນຫາດ້ານການບໍລິການສາທາລະນະສຸກຂຶ້ນ.
ເຊັ່ນໂຮງໝໍແຫ່ງໜຶ່ງໃນເມືອງນີດທາງຕອນໃຕ້ຂອງຝຣັ່ງ ມີບຸກຄະລາກອນເກືອບ 450 ຄົນທີ່ຖືກພັກວຽກ ເຮັດໃຫ້ພວກເຂົາອອກມາປະທ້ວງຢູ່ໜ້າໂຮງໝໍ.
ເຊັ່ນດຽວກັບ ໂຮງໝໍໃນເມືອງມອນເຕລິມາ ຕ້ອງມີການຍົກເລີກຄິວຜ່າຕັດທີ່ບໍ່ຮີບດ່ວນອອກໄປກ່ອນ ຫລັງປະສົບບັນຫາບໍ່ມີແພດພຽງພໍ ເນື່ອງຈາກຍັງບໍ່ໄດ້ສັກວັກຊີນ.
ປັດຈຸບັນ ຝຣັ່ງມີປະຊາກອນໄວຜູ້ໃຫຍ່ທີ່ໄດ້ຮັບວັກຊີນແລ້ວເກືອບ 90% ແລະ ກຳລັງຈະເລີ່ມກະຈາຍວັກຊີນສູ່ເດັກອາຍຸ 12 ປີຂຶ້ນໄປ ລວມທັງສັກກະຕຸ້ນເຂັມທີ 3 ໃຫ້ກຸ່ມເບາະບາງຕໍ່ໄປ.
ອ້າງອີງ:
https://www.bbc.com/news/world-europe-58581682
