ຍ້ອນຄວາມຖືເບົາຂອງປະຊາຊົນເຮັດໃຫ້ມີຜູ້ຕິດເຊື້ອໃນຊຸມຊົນເພີ່ມສູງຂຶ້ນຈາກແຂວງຫາແຂວງ

ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ລາຍງານໃນວັນທີ 13 ກັນຍາ 2021 ນີ້ວ່າ: ປັດຈຸບັນເຫັນວ່າມີແຂວງຈຳນວນໜຶ່ງຍັງປະເຊີນໜ້າກັບການລະບາດໃນຊຸມຊົນ ເຊິ່ງມີທ່າອ່ຽງເພີ່ມຂຶ້ນໃນແຕ່ລະວັນ, ເຊິ່ງ 2 ວັນຜ່ານຜ່ານມາທີ່ໂຕເລກຕິດເຊື້ອໃນຊຸມຊົນສູງກ່ວາໂຕເລກຕິດເຊື້ອນຳເຂົ້າຈາກຕ່າງປະເທດ,  ສາເຫດກໍຍ້ອນວ່າມີປະຊາຊົນຈຳນວນໜຶ່ງຍັງຖືເບົາ, ຫລະເຫລີງ ບໍ່ເອົາໃຈໃສ່ປະຕິບັດຕາມເທົ່າທີ່ຄວນ, ໃນໄລຍະຜ່ານມາສັງເກດເຫັນວ່າການຕິດເຊື້ອໃນຊຸມຊົນເກີດຈາກການໄປຮ່ວມງານຊາປານາກິດສົບ, ງານກຳ, ງານບຸນ, ງານສູ່ຂັວນຄອບຄົວ  ແລະ ງານອື່ນໆ, ເຊິ່ງມີຍາດຕິພີ່ນ້ອງຊັ້ນຈຳ ຈຳນວນຫລາຍຄົນໄປເຕົ້າໂຮມກັນ ໂດຍຂາດມາດຕະການປ້ອງກັນການຕິດເຊື້ອ ແລະ ຮັກສາໄລຍະຫ່າງໄດ້ ຈຶ່ງເຮັດໃຫ້ມີການແຜ່ເຊື້ອໄປໃນຊຸມຊົນເປັນວົງກ້ວາງ ຈາກແຂວງໜຶ່ງໄປສູ່ອີກແຂວງໜຶ່ງດັ່ງທີ່ພວກເຮົາປະເຊີນໜ້າໃນປັດຈຸບັນ.

ຕໍ່ກັບບັນຫາດັ່ງກ່າວ ຈຶ່ງຮຽກຮ້ອງມາຍັງປະຊາຊົນ, ພະນັກງານນັກຮົບ ແລະ ທຸກພາກສ່ວນໃນສັງຄົມຕ້ອງໄດ້ເອົາໃຈໃສ່ຕໍ່ບັນຫາດັ່ງກ່າວ, ຮູ້ປ້ອງກັນຕົນເອງ, ຄວນຫລີກລ່ຽງສະຖານທີ່ສ່ຽງ ແລະ ງານທີ່ມີຄົນຈຳນວນຫລາຍ, ຖ້າມີຄວາມຈຳເປັນກໍໃຫ້ໃສ່ຜ້າປິດປາກ-ດັງ, ຮັກສາໄລຍະຫ່າງ, ໝັ່ນລ້າງມືດ້ວຍນ້ຳສະອາດໃສ່ສະບູ ຫລື ເຈວທີ່ມີທາດເຫລົ້າ, ພາຍຫລັງກັບມາເຮືອນໃຫ້ອາບນ້ຳປ່ຽນເຄື່ອງນຸ່ງທັນທີ.

ສິ່ງສໍາຄັນທີ່ສຸດເປັນຜູ້ສຳຜັດໃຫ້ຊິດກັບຜູ້ຕິດເຊື້ອແມ່ນໃຫ້ຮີບຮ້ອນໄປເກັບຕົວຢ່າງກວດຫາເຊື້ອ ຕາມສະຖານທີ່ກຳນົດໄວ້ ແລະ ພາຍຫລັງເກັບຕົວຢ່າງແມ່ນໃຫ້ຈຳກັດບໍລິເວນຕົນເອງ ແລະ ແຍກປ່ຽວຈາກຄອບຄົວ, ຄົນອ້ອມຂ້າງຈົນກ່ວາຈະຄົບ 14 ວັນ ຫລື ໃຫ້ເຮັດວຽກຢູ່ບ້ານ, ໃຫ້ໝັ່ນຕິດຕາມອຸນຫະພູມຂອງຕົນເອງ, ຖ້າມີອາການໄຂ້, ໄອ, ດັງບໍ່ໄດ້ກີ່ນ, ຫາຍໃຈຍາກ ແມ່ນໃຫ້ໂທສອບຖາມສາຍດ່ວນ 165/166   ຫລື ໄປພົບແພດທັນທີ.