ສປປ ເກົາຫລີ ເຜີຍທົດລອງລູກສອນໄຟໄລຍະໄກລຸ້ນໃໝ່ສຳເລັດ ກ່ອນຜູ້ແທນອາເມລິກາ, ຍີ່ປຸ່ນ ແລະ ສ.ເກົາຫລີ ເລັ່ງຫາລືເຈລະຈາປົດອາວຸດນິວເຄຼຍອີກ
ວັນທີ 12 ກັນຍາ 2021: ສຳນັກຂ່າວທາງການ ສປປ ເກົາຫລີ ລາຍງານຜົນສຳເລັດຂອງການທົດລອງລູກສອນໄຟໄລຍະໄກລຸ້ນໃໝ່ທີ່ມີການພັດທະນາໃນໄລຍະ 2 ປີຜ່ານມາ ໂດຍສາມາດຍິງເຂົ້າສູ່ເປົ້າມາຍທີ່ຢູ່ອອກໄປໄກເຖິງ 1.500 ກິໂລແມັດ ໄດ້ສຳເລັດ. ເຖິງຢ່າງໃດກໍຕາມ, ກອງທັບ ສ.ເກົາຫລີ ຍັງບໍ່ໄດ້ຢືນຢັນເລື່ອງການທົດລອງລູກສອນໄຟໃນຄັ້ງນີ້ແຕ່ຢ່າງໃດ.
ໂດຍ ສປປ ເກົາຫລີ ປະກາດຜົນສຳເລັດໃນຄັ້ງນີ້ກ່ອນໜ້າຜູ້ແທນທາງການອາເມລິກາ, ຍີ່ປຸ່ນ ແລະ ສ.ເກົາຫລີ ຈະເຂົ້າຮ່ວມປະຊຸມຫາລືເຖິງແນວທາງໃນການກັບມາເປີດພື້ນທີ່ເຈລະຈາ ເພື່ອປົດອາວຸດນິວເຄຼຍຂອງ ສປປ ເກົາຫລີ ອີກ ຢູ່ນະຄອນຫລວງໂຕກຽວພຽງ 1 ວັນເທົ່ານັ້ນ.
ທາງການ ສປປ ເກົາຫລີ ຍັງລະບຸອີກວ່າ: ລູກສອນໄຟໄລຍະໄກລຸ້ນໃໝ່ນີ້ຈະເປັນອາວຸດທາງຍຸດທະສາດທີ່ສຳຄັນທີ່ຕອບຮັບກັບວິໄສທັດຂອງທ່ານ ກິມຈອງອຸນ ຜູ້ນຳສູງສຸດຂອງ ສປປ ເກົາຫລີ ທີ່ຕ້ອງການຈະເສີມສ້າງຄວາມເຂັ້ມແຂງໃຫ້ກອງທັບ ເຊິ່ງໃນຄັ້ງນີ້ທ່ານ ກິມຈອງອຸນ ບໍ່ໄດ້ເດີນທາງມາເບິ່ງການທົດລອງແຕ່ຢ່າງໃດ, ແຕ່ເປັນທ່ານ ພັກຈຸງຊອນ ໜຶ່ງໃນໂປລິດບູໂຣຄົນສຳຄັນຂອງພັກແຮງງານເກົາຫລີ.
ກ່ອນໜ້ານີ້, ທາງການ ສປປ ເກົາຫລີ ທົດລອງລູກສອນໄຟຄັ້ງຫລ້າສຸດໃນເດືອນມີນາ ແລະ ຫລັງຈາກທີ່ປະທານາທິບໍດີ ໂຈ ໄບເດນ ເຂົ້າຮ່ວມພິທີສາບານເຂົ້າຮັບຕຳແໜ່ງຜູ້ນຳຄົນໃໝ່ຂອງອາເມລິກາ ໄດ້ພຽງບໍ່ເທົ່າໃດຊົ່ວໂມງ ໃນເດືອນກໍລະກົດ 2021 ໂດຍທ່ານ ໄບເດນ ລະບຸວ່າ: ຊ່ອງທາງໃນການເຈລະຈາທາງການທູດກັບ ສປປ ເກົາຫລີ ເພື່ອປົດອາວຸດນິວເຄຼຍຍັງເປີດຢູ່, ແຕ່ຍັງບໍ່ມີຄວາມຕັ້ງໃຈທີ່ຈະຫລຸດຜ່ອນມາດຕະການຂວ້ຳບາດຕໍ່ ສປປ ເກົາຫລີ ໃນບັນຫານີ້.
ອ້າງອີງ:
- https://www.aljazeera.com/news/2021/9/12/north-korea-says-it-tests-new-long-range-cruise-missile
- https://www.politico.com/news/2021/09/12/north-korea-cruise-missiles-511586
- https://www.theguardian.com/world/2021/sep/13/north-korea-says-it-has-test-fired-long-range-cruise-missile
