ພະນົມເປັນເປີດໂຮງຮຽນມັດທະຍົມ ເລີ່ມໃຫ້ນັກຮຽນກຳປູເຈຍໄປໂຮງຮຽນ ນັບແຕ່ 15 ກັນຍາ ເປັນຕົ້ນໄປ
ເຈົ້າຄອງນະຄອນຫລວງພະນົມເປັນໄຟຂຽວເປີດໂຮງຮຽນມັດທະຍົມ ເລີ່ມໃຫ້ນັກຮຽນໄປໂຮງຮຽນນັບແຕ່ວັນທີ 15 ກັນຍາ ເປັນຕົ້ນໄປ ຫລັງກຳປູເຈຍສັກວັກຊີນຕ້ານໂຄວິດໄດ້ຕາມເປົ້າໝາຍ.
ວັນທີ 10 ກັນຍາ 2021, ສຳນັກຂ່າວຊິນຮົວ ແລະ ເວັບໄຊ The Phnom Penh Post ສື່ກຳປູເຈຍ ລາຍງານວ່າ: ທ່ານ ເຄືອງ ສະເຮັງ ເຈົ້າຄອງນະຄອນຫລວງພະນົມເປັນ ຂອງກຳປູເຈຍ ເປີດເຜີຍວ່າ: ໂຮງຮຽນລະດັບມັດທະຍົມໃນນະຄອນຫລວງພະນົມເປັນທຸກແຫ່ງມີກຳນົດກັບມາເປີດການຮຽນການສອນອີກນັບແຕ່ວັນທີ 15 ກັນຍາເປັນຕົ້ນໄປ ໂດຍທຸກໂຮງຮຽນຕ້ອງດຳເນີນມາດຕະການທີ່ກະຊວງສຶກສາທິການ, ເຍົາວະຊົນ ແລະ ກິລາກຳນົດ ເພື່ອປ້ອງກັນການລະບາດຂອງພະຍາດໂຄວິດ-19.
ໂດຍເບື້ອງຕົ້ນລັດຖະບານກຳປູເຈຍກຳນົດເກນໃຫ້ແຕ່ລະໂຮງຮຽນປະຕິບັດຕາມ ໂດຍມີລາຍລະອຽດທີ່ແຕກຕ່າງກັນຕາມພື້ນທີ່ການລະບາດທີ່ແບ່ງອອກເປັນ ພື້ນທີ່ທີ່ບໍ່ມີການລະບາດ, ພື້ນທີ່ທີ່ພົບການລະບາດໜ້ອຍ ແລະ ພື້ນທີ່ທີ່ໂຄວິດ-19 ລະບາດຮຸນແຮງ.
ລັດຖະບານກຳປູເຈຍສັ່ງປິດໂຮງຮຽນທົ່ວປະເທດມາແຕ່ເດືອນກຸມພາຜ່ານມາ ເຊິ່ງການຕັດສິນໃຈກັບມາເປີດໂຮງຮຽນມັດທະຍົມໃນນະຄອນຫລວງພະນົມເປັນ ມີເປົ້າໝາຍເພື່ອຊ່ວຍນັກຮຽນກຽມສອບເສັງທີ່ມີກຳນົດໃນເດືອນພະຈິກ ແລະ ທັນວາທີ່ຈະເຖິງນີ້. ຂະນະດຽວກັນ ຍັງເປັນໄປຕາມແຜນການສັກວັກຊີນຕ້ານໂຄວິດ-19 ໃນກຳປູເຈຍທີ່ປະສົບຜົນສຳເລັດຕາມເປົ້າໝາຍ.
ໂດຍກຳປູເຈຍເລີ່ມຈັດການສັກວັກຊີນນັບແຕ່ເດືອນກຸມພາ ໂດຍຕັ້ງເປົ້າສັກວັກຊີນໃຫ້ປະຊາຊົນ 12 ລ້ານຄົນ ຫລື 75% ຂອງປະຊາກອນທັງໝົດ 16 ລ້ານຄົນພາຍໃນປີນີ້ ເຊິ່ງຫລ້າສຸດມີປະຊາຊົນສັກວັກຊີນຢ່າງໜ້ອຍ 1 ເຂັມປະມານ 11,36 ລ້ານຄົນ ຫລື 71% ຂອງປະຊາກອນ, ສ່ວນຜູ້ໄດ້ຮັບວັກຊີນຄົບໂດສແລ້ວມີ 9,16 ລ້ານຄົນ ຫລື 57%. ຂະນະທີ່ຜູ້ສັກວັກຊີນເຂັມທີສາມ ຫລື ວັກຊີນກະຕຸ້ນມີ 710.730 ຄົນ.
ອ້າງອີງ:
https://www.phnompenhpost.com/…/capital-schools-allowed…
https://www.xinhuathai.com/inter/228632_20210910
